މަޝްހޫރު އާޓިފިޝަލް އިންޓެލިޖެންސް ކުންފުނި އެންތްރޮޕިކްގެ "ކްލޯޑް" ޗެޓްބޮޓް ބޭނުންކުރާ ފަރާތްތަކަށް، ޗެޓްބޮޓްގެ އިންޓަފޭސްގެ ތެރެއިން އެކި އެޕްލިކޭޝަންތައް ބޭނުންކުރެވޭ އާ ފީޗާއެއް ހޯމަ ދުވަހު ތައާރަފްކޮށްފިއެވެ.
މި އާ ފީޗާގެ ދަށުން، މަސައްކަތުގެ މާހައުލުގައި ބޭނުންކުރާ މުހިންމު ބައެއް ޓޫލްތައް ކްލޯޑްގެ ތެރެއިން ބޭނުންކުރެވޭނެއެވެ. މީގެ ތެރޭގައި ސްލެކް، ކެންވާ، ފިގްމާ، ބޮކްސް އަދި ކްލޭ ހިމެނެއެވެ. މީގެ އިތުރުން ސޭލްސްފޯސް ވެސް ވަރަށް އަވަހަށް މި ލިސްޓަށް އިތުރުވާނެ ކަމަށް އެންތްރޮޕިކުން ބުނެއެވެ.
މި އެޕްތައް މެދުވެރިކޮށް، ކްލޯޑްގެ ތެރޭގައި ހުރެގެން ސްލެކް މެސެޖު ފޮނުވުމާއި، ޗާޓުތައް ތައްޔާރުކުރުމާއިއެކު، އަދި ކްލައުޑްގައި ރައްކާކޮށްފައިވާ ފައިލްތަކަށް އެކްސެސްވެވޭނެއެވެ.
މި އެޕްތައް މެދުވެރިކޮށް، ކްލޯޑްގެ ތެރޭގައި ހުރެގެން ގިނަ އެޕްތަކެއް ބޭނުންކުރެވޭނެ ---
"ޑޭޓާ އެނަލައިޒް ކުރުމާއި، ކޮންޓެންޓް ޑިޒައިން ކުރުމާއި، އަދި ޕްރޮޖެކްޓްތައް މެނޭޖްކުރުމުގައި ލޮލަށް ފެންނަ އިންޓަފޭސްއެއްގެ އެހީގައި މަސައްކަތް ކުރުމަކީ މާ ފަސޭހަ ކަމެއް،" އެންތްރޮޕިކުން ނެރުނު ބަޔާނެއްގައި ބުނެފައިވެއެވެ. މީގެ ސަބަބުން ކްލޯޑްގެ އެހީތެރިކަމާއެކު މަސައްކަތްތައް ކުރިއަށްވުރެ އަވަހަށް ނިންމާލެވޭނެ ކަމަށް އެ ކުންފުނިން ފާހަގަކުރެއެވެ.
މި އާ ފީޗާ މިވަގުތު ލިބޭނީ ކްލޯޑްގެ ޕްރޯ، މެކްސް، ޓީމް އަދި އެންޓަޕްރައިޒް ސަބްސްކްރައިބަރުންނަށް އެކަންޏެވެ. ހިލޭ ބޭނުންކުރާ ފަރާތްތަކަށް މި ފީޗާ އަދި ލިބޭކަށް ނެތެވެ. މި ޚިދުމަތް އެކްޓިވޭޓް ކުރަން ބޭނުންވާ ފަރާތްތަކަށް ކްލޯޑް.އޭއައި/ޑައިރެކްޓްރީ އިން އެކަން ކުރެވޭނެއެވެ.
މި ސިސްޓަމަކީ އޯޕަން އޭއައި އިން މިދިޔަ އޮކްޓޯބަރު މަހު ތައާރަފްކުރި އެޕް ސިސްޓަމާ އެއްގޮތް ސިސްޓަމެކެވެ. މި ދެ ކުންފުނީގެ އެޕްލިކޭޝަންތައްވެސް ބިނާވެފައިވަނީ 2024 ވަނަ އަހަރު ތައާރަފްކުރި "މޮޑެލް ކޮންޓެކްސްޓް ޕްރޮޓޮކޯލް" ކިޔާ އޯޕަން ސްޓޭންޑަޑެއްގެ މައްޗަށެވެ.
މި އާ އެޕްތައް، އެންތްރޮޕިކުން މިދިޔަ ހަފްތާގައި ތައާރަފްކުރި "ކްލޯޑް ކޯވޯކް" އޭޖެންޓާ ގުޅާލުމުން އޭގެ ބޭނުންތެރިކަން ވަރަށް ބޮޑަށް އިތުރުވެގެންދާނެއެވެ. މީގެ ސަބަބުން، ބޮޑެތި ޑޭޓާ ސެޓްތައް ބޭނުންކޮށްގެން އަމިއްލައަށް މަސައްކަތްތައް ނިންމުމުގެ ފުރުސަތު ކްލޯޑަށް ލިބޭނެއެވެ. މިސާލަކަށް، ބޮކްސްގައި ހުރި އާ ޑޭޓާއެއް ބޭނުންކޮށްގެން ފިގްމާގައި ހުރި މާކެޓިން ގްރެފިކެއް އަޕްޑޭޓް ކުރުމަށް ކްލޯޑް ކޯވޯކަށް އަމުރުކުރެވިދާނެއެވެ.
ނަމަވެސް، މިފަދަ އޭޖެންޓިކް ސިސްޓަމްތަކަކީ ލަފާކުރަން ދަތި ގޮތްގޮތަށް މަސައްކަތް ކޮށްފާނެ އެއްޗަކަށް ވާތީ، އެންތްރޮޕިކުން ވަނީ ސަލާމަތީ ފިޔަވަޅުތަކަށް ސަމާލުވުމަށް އިލްތިމާސްކޮށްފައެވެ. ޚާއްސަކޮށް މާލީ ލިޔެކިޔުންތަކާއި އަމިއްލަ ސިއްރު މައުލޫމާތުތަކަށް ކްލޯޑަށް ބްރޯޑް އެކްސެސް ނުދިނުމަށާއި، މަސައްކަތް ކުރުމަށް ވަކި ޚާއްސަ ފޯލްޑަރެއް ކަނޑައެޅުމަށް އެ ކުންފުނިން ލަފާދެއެވެ.