ސާފް ފުޓްސަލް ޗެމްޕިއަންޝިޕްގައި ރާއްޖޭގެ ޤައުމީ ފިރިހެން ޓީމް ހޯދި ކާމިޔާބީ ފާހަގަކުރުމަށް މާދަމާ ރޭ ހަވާއެރުވާއެކު އާޓިފިޝަލް ބީޗުގައި ކުލަގަދަ ހަރަކާތެއް ބާއްވަން ނިންމައިފިއެވެ.
ކުޅިވަރާބެހޭ ވުޒާރާއިން ބުނީ ޤައުމީ ފުޓްސަލް ޓީމް ހޯދި ކާމިޔާބީ ފާހަގަކުރުމުގެ ގޮތުން ހަވާއެރުވުމާއެކު މާދަމާ ރޭ ކުލަގަދަ ހަރަކާތްތަކެއް ބާއްވާނެ ކަމަށެވެ. އަދި މި ހަރަކާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެވަޑައިގަންނަވާނެ ކަމަށެވެ.
އެހެންކަމުން ޓީމަށް މަރުހަބާކިއުމަށް ވީހާވެސް ގިނަ ބަޔަކު އާޓިފިޝަލް ބީޗު ސަރަހައްދަށް ދިއުމަށް ސަރުކާރުން ވަނީ އެދިފައެވެ. ކުރިއަށްގެންދާ ހަރަކާތްތަކުގެ ތެރޭގައި ޓީމާއެކު ފޮޓޯ ނެގުންވެސް ހިމެނެއެވެ.
ކުޅުނު ހުރިހާ މެޗެއް ކާމިޔާބުކޮށްގެން ރާއްޖެ މި މުބާރާތް ނިންމާލިއިރު، މިއީ ސަރަހައްދީ ގޮތުން ބޭއްވި ފުރަތަމަ ފުޓްސަލް މުބާރާތެވެ. މި މުބާރާތުގެ ކާމިޔާބީއާއެކު ސަރުކާރުން ވަނީ އިތުރު އިންވެސްޓުމަންޓު ތަކެއް ފުޓްސަލްއަށް ކުރުމަށް ނިންމާފައެވެ. އެގޮތުން ފުޓްސަލް އިންޑޯއެއް އެޅުމުގެ މަސައްކަތް ކުރިއަށްވުރެ ބާރު ސްޕީޑެއްގައި ކުރިއަށްގެންދަން ނިންމަވާފައިވާ ކަމަށް ވަޒީރު ޢަބްދުﷲ ރާފިއު ވަނީ ވިދާޅުވެފައެވެ.