އިހުޒަމާނުން ފެށިގެން މިއަދާ ހަމައަށް ސަޔަކީ ދިވެހީންގެ މެދުގައި ބުއިމަކަށް ވުރެ މާ ބޮޑު އެއްޗެކެވެ. ދުވަސް ފެށުމަށާއި ބުރަ ދުވަހެއްގައި އެ ދުވަހެއްގެ މެދުތެރެއިން ހަމަޖެހިލުމަށް ދެ މީހަކު ނުވަތަ އާއިލާއަކުން ބައްދަލުވަނީ ސަޔަކުންނެވެ. އޭރުވެސް މިހާރު ވެސް، ދިވެހީންގެ މެދުގައި ސަޔަކީ އެންމެ މަގުބޫލު އެއް ބުއިމެވެ.
މިފަހަރު އުރީދޫގެ ކަލަންޑަރު ޚާއްސަކޮށްފައިވަނީ ސަޔަށެވެ. އެގޮތުން އުރީދޫން މިއަހަރުގެ ކަލަންޑަރު ނެރުނީ "އުރީދޫ އާއެކު ސައެއް"، ނުވަތަ "ލެޓްސް ޓީ ވިތު އުރީދޫ"، މި ނަމުގައެވެ.
މިއަހަރުގެ ކަލަންޑަރު ތައާރަފްކޮށް އުރީދޫން ސޯޝަލް މީޑިއާއަށް ދޫކޮށްލި ވީޑިއޯ ފުރަތަމަ ފަށާއިރު އިވެނީ ފަތިސް ނަމާދަށް ބަންގިގޮވާ އަޑެވެ. ބަންގީގެ އަޑާއެކު ކާޅު ގޮވާ އަޑު އިވެއެވެ. އެ ވީޑިއޯގައި ދެން ފެންނަނީ ހުދު ގަމީހެއް ލައިގެން ހުރި މީހަކު މިސްކިތުން ނިކުމެ، ހުވަނދުމާ ބިންނަ މަންޒަރެވެ.
އެއަށްފަހު ދިވެހިރާއްޖޭގެ އަޑުން ކޮންމެ ދުވަހަކު ހެނދުނު ގެންނަ "ބާއްޖަވެރި ހެނދުނެއް" ޕްރޮގްރާމު ފަށާ އަޑުކޮޅާއެކު، އަންހެނަކު އިލޮށިފަތިން ވެލިތައް ކަހައި ސާފުކުރާ މަންޒަރު ދައްކާލައެވެ.
ދެން ދައްކާލަނީ ސައި ކެއްކުމަށްފަހު، ޖޯޑަށް ސައި އަޅާ މަންޒަރެވެ. އެންމެ ފަހުން ފެންނަނީ ހުވަނދުމާކޮޅު ސައި މަތީގައި ބާއްވާލާ މަންޒަރެވެ.
އުރީދޫގެ ކަލަންޑަރު ލޯންޗުކުރަން ބޭއްވި އިވެންޓުގައި ސައި އަޅަނީ --- ފޮޓޯ: އުރީދޫ
ކަލަންޑަރު ތައާރަފްކުރުމަށްފަހު އުރީދޫން ބުނީ، ކޮންމެ އަހަރަކު ވެސް އުރީދޫގެ ކަލަންޑަރުން ކިޔައިދެނީ ދިވެހި ސަގާފަތާއި އުފެއްދުންތެރިކަމުގެ ވާހަކަ ކަމަށެވެ. އެގޮތުން މިއަހަރުގެ ކަލަންޑަރުގައި ފާހަގަކުރަނީ ސައި ކަމަށް، އުރީދޫން ބުންޏެވެ.
އުރީދޫން ބުނީ، މިއަހަރުގެ ކަލަންޑަރުގައި ކޮންމެ މަހަކުވެސް ތަފާތު ސައެއްގެ ބާވަތެއް ހިމަނައިފައިވާނެ ކަމަށެވެ. އެ ކުންފުނިން ބުނީ، މި ކަލަންޑަރުގައި ގެނެސްދީފައިވާނީ ރާއްޖޭގެ އެކި ކަންކޮޅުތަކުގައި ލިބެން ހުންނަ މޭވާ އާއި މާމެލާމެލީގެ ރަހަތައް ހިމެނޭ ސަޔާއި ސައިގެ މައި ރަހައިގެ ބާވަތް ކަމަށެވެ.
އުރީދޫ މޯލްޑިވްސްގެ ސީއީއޯ އަދި މެނޭޖިން ޑިރެކްޓަރު ޚާލިދު އަލް-ޙަމާދީ ވިދާޅުވީ، އުރީދޫގެ މިއަހަރުގެ ކަލަންޑަރުން ބޭނުންވީ ދިވެހީންގެ އާދަކާދައިގެ ތެރޭ ހިމެނޭ ސައި ބުއިމުގެ ސަގާފަތް ދިރުވަން ކަމަށެވެ.
އުރީދޫން ބުނީ، މިއަހަރު މޭޒުމަތީ ބަހައްޓާ ކަލަންޑަރެއްގެ އިތުރުން ފާރުގައި އަޅުވާ ކަލަންޑަރަކާއި ޑިޖިޓަލް ކަލަންޑަރެއްވެސް ތައާރަފުކޮށްފައިވާ ކަމަށެވެ. އަދި ކޮންމެ މަހަކު ވެސް ދިވެހި ރަހަތައް ހިމެނޭ ޚާއްސަ ގްރީން ޓީ ބްލެންޑެއްގެ ޓީ ކޭކެއް މޭޒުމަތީ ކަލަންޑަރާއެކު ހިމެނިފައި ވާނެ ކަމަށް އެ ކުންފުނިން ބުންޏެވެ.