އިނގިރޭސި ޕްރިމިއާ ލީގުގެ ތާވަލުގެ އެއްވަނައިގައި އޮތް އާސެނަލް އަތުން ޔުނައިޓެޑު މޮޅުވި މެޗުގެ ނަތީޖާއަކީ ހިތްދަތި ނަތީޖާއެއް ކަމަށާއި މިއީ އެ ޓީމަށް ފިލާވަޅެއް ކަމަށް އާސެނަލްގެ ކޯޗު މިކޭލް އާޓެޓާ ބުނެފިއެވެ.
އާސެނަލްގެ އެމިރޭޓްސް ދަނޑުގައި ރޭ އެ ޓީމުން ޔުނައިޓެޑުގެ އަތްދަށުވީ ވާދަވެރި ކުޅުމަކަށްފަހު 3-2 ގެ ނަތީޖާއަކުންނެވެ.
މެޗުން ބަލިވި ނަމަވެސް އާސެނަލް އަދިވެސް އޮތީ ތާވަލުގެ އެއްވަނައިގައެވެ. އެއީ ހަތަރު ޕޮއިންޓުގެ ލީޑަކާއެކު އެވެ. މެޗުން މޮޅުވި ޔުނަައިޓެޑު ވަނީ މި މޮޅާއެކު ތާވަލުގެ ހަތަރުވަނަ މަގާމަށް ޖެހިލާފައެވެ.
އެއްވަނައިގައި ހަތް ޕޮއިންޓަށް ލީޑު ފުޅާކުރަން ލިބުނު ފުރުސަތު ގެއްލުނު މެޗަށްފަހު މީޑިއާގައި ވާހަކަދައްކަމުން އާޓެޓާ ބުނީ ކުޅުމުން ފެންނަ ގޮތަށް ބަލާއިރު، ޔުނައިޓެޑުގެ ދެ ލަނޑަކީ އާސެނަލުން ހަދިޔާއެއްގެ ގޮތުގައި ދިން ލަނޑުތަކެއް ކަމަށެވެ.
"އަހަރެމެންނަށް ގޯސްތަކެއް ހެދުނު ހިސާބުން މުޅި މެޗުގެ އޮއިވަރު ބަދަލުވި، އޭގެފަހުން ޖާދުވީ ދެ ލަނޑު ޔުނައިޓެޑުން ޖެހި ހިސާބުން އަހަރެމެން ގޭމުގެ ތެރެއަށް ވަދެ ކުރި މަސައްކަތުން އެވަރުވެސް ވީ މި މެޗުގައި، ކޫންޏާ ޖެހީ މޮޅު ގޯލެއް، ޔުނައިޓެޑުގެ ކާމިޔާބީއަށް މަރުހަބާ" އާޓެޓާ ބުންޏެވެ.
ބަލިވި މެޗުން ރަނގަޅުކުރަންވީ ކަންކަން ފެނިގެންދިޔަ ކަމަށާއި ކުރިއަށްހުރި މެޗުތަކުގައި އެ ކަންކަމަށް މަސައްކަތްކުރާނެ ކަމަށް އާޓެޓާ ބުންޏެވެ. މި ނަތީޖާއާ އެކު، ޔުނައިޓެޑް ވަނީ ލީގުގެ ހަތަރު ވަނަ އަށް ޖެހިލައިފަ އެވެ.