މި ފަހުން ފިލްމު އިންޑަސްޓްރީއަށް ތައާރަފުވެ ބެލުންތެރިންގެ މެދުގައި ބޮޑު މަގުބޫލުކަމެއް ހޯދި ތިން ޒުވާނުން ކަމަށްވާ ރަޝާ ތަޑާނީ އާއި ނިތާންޝީ ގޮއެލްގެ އިތުރުން ރޯހިތު ސަރަފް އެކީގައި ފިލްމަކަށް ތައްޔާރުވަމުން އަންނަ ކަމަށް ރިޕޯޓުތަކުން ބުނެފިއެވެ.
ބޮލީވުޑްގެ ޚަބަރުތަކުން ބުނެފައިވާ ގޮތުގައި މި ތިން ތަރިން މުހިއްމު ރޯލަކުން ފެންނާނެ މި ފިލްމަކީ ވަރަށް އަސަރުގަދަ ތިނެސްކަން ލޯބީގެ ވާހަކައެއްގެ މައްޗަށް ބިނާކޮށް އުފައްދާ ފިލްމެކެވެ.
މި ފިލްމަށް ޑައިރެކްޓަރަކު ހޯދުމުގެ މަސައްކަތް ކުރިއަށްދާއިރު ފިލްމަށް ގެންނާނީ މިހާރުގެ ޒަމާނީ ވިސްނުން ހުންނަ ޒުވާން ފިލްމު ޑައިރެކްޓަރަކު ކަމަށް މިޑް-ޑޭގެ ރިޕޯޓެއްގައި ބުނެފައިވެއެވެ.
ރޯހިތު ބަތަލާ ޕްރަޖަކްތާއާ އެކު--ފޮޓޯ/ޕިންކްވިލަ
ބޮލީވުޑްގެ މަޝްހޫރު ބަތަލާ ރަވީނާ ޓަންޑަންގެ ދަރިފުޅު ރަޝާ އިތުރު ފިލްމަކަށް ތައްޔާރުވަމުން އަންނައިރު އޭނާ އަންނަނީ މިހާރުވެސް ދެ ފިލްމެއްގައި މަސައްކަތް ކުރަމުންނެއެވެ. އެއީ މި އަހަރުގެ ޖޫން މަހު ރިލީޒްކުރާ ފިލްމު "ލައިކޭ ލައިކާ" އަދި ތެލުގޫ ފިލްމެކެވެ.
ނެޓްފްލިކްސްގެ ވެބް ސީރީސް "މިސްމެޗްޑް"އިން ގިނަ ބައެއްގެ މެދުގައި މަގުބޫލުވި އެކްޓަރު ރޯހިތު ސަރަފް އަކީ މިހާރުގެ ޒުވާނުންގެ މެދުގައި ވަރަށް ބޮޑު ތަރުހީބެއް ހޯދަމުން އަންނަ އެކްޓަރެކެވެ.
ރޯހިތު އެންމެފަހުން ބެލުންތެރިންނަށް ފެނިފައި ވަނީ ދަރުމާ ޕްރޮޑަކްޝަންސްއިން މިދިޔަ އަހަރު ގެނެސްދިން ފިލްމު "ސަނީ ސަންސްކާރީ ކީ ތުލްސީ ކުމާރީ"އެވެ. ރަޝާ އާއި ރޯހިތުގެ އިތުރުން މި ފިލްމުން ދެން ފެންނާނެ ކަމަށް ރިޕޯޓުތަކުން ބުނެފައިވާ ބަތަލާ ނިތާންޝީ އަކީ ޑައިރެކްޓަރު ކިރަން ރާއޯ ގެނެސްދިން "ލާޕަތާ ލޭޑީސް"ގެ ބަތަލާއެވެ.
ރިޕޯޓުތައް ބުނާގޮތުން މި ފިލްމުގެ ޕްރޮޑިއުސަރަކީ ސޯނަމް ކަޕޫރުގެ "ނީރްޖާ" އަދި ވިދިއާ ބާލަންގެ "ތުމާރީ ސުލޫ"ގައި މަސައްކަތްކުރި އަތުލް ކަސްބޭކަރްއެވެ.