ޓުވެންޓީ20 ކްރިކެޓް ވޯލްޑްކަޕު އިންޑިޔާގައި ކުޅެން ޖެހޭތީ މުބާރާތުން ވަކިވާން ނިންމި ބަންގްލަދޭޝްގެ ބަދަލުގައި އެ ޖާގަ ސްކޮޓްލަންޑަްށް ދޭން ނިންމާފައިވާކަމުގެ އަޑުތައް ގަދަވާން ފަށައިފިއެވެ.
އިންޑިއާގެ މީޑިއާތަކުން ވަނީ އިންޓަނޭޝަނަލް ކްރިކެޓް ކައުންސިލް (އައިސީސީ) އާއި ހަވާލާދީ މިގޮތަށް ނިންމިކަން ހާމަކޮށްފައެވެ.
ބަންގްލަދޭޝްއިން ވަނީ އެ ގައުމުން މުބާރާތުގައި ކުޅޭނެ ހަމައެކަނި އޮތް ގޮތަކީ އިންޑިއާގެ ބަދަލުގައި އެހެން ގައުމެއްގައި މުބާރާތް ހޯސްޓުކުރުން ކަމަށެވެ. އެގޮތުން އަވައްޓެރި ސްރީ ލަންކާގައި މެޗުތައް ކުޅެން ބަންގްލަދޭޝް އިން އެދުނެވެ.
ނަމަވެސް އައިސީސީން ވަނީ އެގޮތަށް އެކަން ނުކުރެވޭނެކަން ހާމަކޮށްފައެވެ. އެއީ މުބާރާތުގެ ހުރިހާ ތައްޔާރީތަކާއި ހަރަދުތަކާއި ނިންމުންތަކަށް ބަލާއިރު، އެއީ މުބާރާތުގެ އުސޫލާ ހިލާފު ނިންމުމެއްގެ ގޮތުގައި އައިސީސީން ދެކެއެވެ.
އިންޑިއާ އާއި ބަންގްލަދޭޝްގެ ކްރިކެޓުގެ މަސްރަހު އެންމެ ބޮޑަށް ހޫނުވީ ދާދިފަހުން އައިޕީއެލް ކުޅެން އެ ގައުމަށް ޑިސެމްބަރު މަހު ދިޔަ ބަންގްލަދޭޝް ގައުމީ ޓީމުގެ އުކުންތެރިޔާ މުސްތަފިޒު ރަހުމާނަށް އިންޑިޔާގެ ހަރުކަށި ހިންދޫން ބިރު ދައްކައި އޭނާ އިންޑިއާއިން ފޮނުވާލުމާއި ގުޅިގެންނެވެ.
ބަންގްލަދޭޝް ޓީމުގެ އެންމެ ބޮޑު ކަންބޮޑުވުމަކީ އެކަށީގެންވާ މެހުމާންދާރީކަމާއި ރައްކާތެރިކަން އިންޑިއާއަށް ކަށަވަރުކޮށް ނުދެވޭތީއެވެ.
މީގެއިތުރުން ބަންގްލަދޭޝް ސަރުކާރުންވެސް ވަނީ މިކަމާ ގުޅޭގޮތުން ވާހަކަދައްކާފައެވެ. އެގޮތުން ރައްކާތެރިކަން ނެތް ތަނަކަށް އެ ގައުމުގެ ކުޅުންތެރިން ނުފޮނުވާނެކަމަށް ސަރުކާރުގެ އޮފިޝަލުން ވަނީ ބުނެފައެވެ.
މުސްލިމު ބޮޑު އާބާދީއެއް އޮތް ބަންގްލަދޭޝްގެ ކުޅުންތެރިންގެ އިތުރުން އިންޑިއާގައި ތިބި ބަންގްލަދޭޝްގެ ރައްޔިތުންނަށް އަމާޒުކޮށް ހިންދޫ މެޖޯރިޓީ އޮންނަ އިންޑިއާގެ ހަރުކަށި ފިކުރުގެ މީހުން ދަނީ އެކި ގޮތްގޮތަށް އުނދަގޫކުރަމުންނެވެ.
ސިޔާސީ ހަމަނުޖެހުންތައް ބޮޑު އިންޑިއާއާއި ބަންގްލަދޭޝްގެ ދެ ސަރުކާރުން ވެސް ދަނީ ބަހުގެ ހަމަލާތައް ރައްދުކުރަމުންނެވެ.