ދުނިޔޭގެ އެންމެ ބޮޑު ޓެކްނޮލޮޖީ މައުރަޒު ކަމަށްވާ ކޮންސިއުމާ އިލެކްޓްރޯނިކްސް ޝޯ (ސީއީއެސް) 2026 ގެ މައިގަނޑު ތަގުރީރު ނުވަތަ ކީނޯޓް އެޑްރެސް، އެންވީޑިއާގެ ސީއީއޯ ޖެންސަން ހުއަންގް ދެއްވާ ގޮތަށް ހަމަޖެހިއްޖެއެވެ.
ހުއަންގްގެ މި ތަގުރީރު ދެއްވުމަށް ހަމަޖެހިފައި ވަނީ ސީއީއެސް މައުރަޒު ރަސްމީކޮށް ހުޅުވުމުގެ ކުރިން، މިއަދުއެވެ.
"އެންވީޑިއާ ލައިވް އެޓް ސީއީއެސް 2026 ވިތު ފައުންޑާ އެންޑް ސީއީއޯ ޖެންސަން ހުއަންގް" ގެ ނަމުގައި ކުރިއަށްގެންދާ މި ސެޝަން ފެށުމަށް ހަމަޖެހިފައިވަނީ ރާއްޖެ ގަޑިން މާދަމާ ރޭގެ މެންދަމު 2:00 ގައެވެ.
ލަސްވެގަސްގެ ފޮންޓެއިންބްލޫގެ ބްލޫލައިވް ތިއޭޓަރުގައި ބާއްވާ މި ހަފްލާއަށް ހާޒިރުވުމަށް ރަޖިސްޓްރީކޮށްފައިވާ ފަރާތްތަކަށް ރާއްޖެ ގަޑިން މާދަމާގެ މެންދަމު 12:30އިން ފެށިގެން ހޯލަށް ވަދެވޭނެއެވެ. އަދި މައިގަނޑު ތަގުރީރު ފެށުމުގެ ކުޑަވަގުތުކޮޅެއް ކުރިން ޚާއްސަ "ޕްރީ-ޝޯ" އެއް ވެސް ކުރިއަށް ދާނެއެވެ.
މި ތަގުރީރުގައި މައިގަނޑު ގޮތެއްގައި އަލިއަޅުވާލާނީ އާޓިފިޝަލް އިންޓެލިޖެންސް (އޭއައި) ގެ ދާއިރާއިން އެންވީޑިއާއިން ހޯދަމުންދާ ކުރިއެރުންތަކާއި، ކުރިމަގުގައި ކޮމްޕިއުޓިންއާއި އޭއައި ބޭނުންކުރެވޭނެ އާ ގޮތްތަކުގެ މައްޗަށެވެ.
ޓެކްނޮލޮޖީ ދާއިރާގެ މާހިރުން ލަފާކުރާ ގޮތުގައި، މި ހަފްލާގެ ތެރެއިން އެންވީޑިއާގެ އެންމެ ފަހުގެ "އާރުޓީއެކްސް 50-ސީރީސް"ގެ ގްރެފިކްސް ކާޑުތައް ރަސްމީކޮށް ދައްކާލުމަކީ ވަރަށް އެކަށީގެންވާ ކަމެކެވެ.
ކޮންސިއުމާ ޓެކްނޮލޮޖީ އެސޯސިއޭޝަން (ސީޓީއޭ) ގެ ރައީސް ގެރީ ސަޕީރޯ ވިދާޅުވި ގޮތުގައި، ޖެންސަން ހުއަންގްއަކީ ޓެކްނޮލޮޖީގެ ދާއިރާގައި ވަރަށް ދުރުވިސްނޭ ބޭފުޅަކަށް ވުމާއެކު، އޭނާގެ މި ތަގުރީރަކީ މުޅި މައުރަޒުގެ އެންމެ ފާހަގަކޮށްލެވޭ އެއް ހަރަކާތަށް ވެގެންދާނެއެވެ.
އޭއައި ޓެކްނޮލޮޖީއަށް ބޭނުންވާ ޗިޕްތައް އުފެއްދުމުގައި އެންވީޑިއާ މިހާރު ދަނީ ދުނިޔޭގެ މާކެޓްގެ ބޮޑުބައެއް ކޮންޓްރޯލް ކުރަމުން ކަމަށްވާއިރު، މި ފަހަރުގެ ސީއީއެސްގައި އެ ކުންފުންޏަށް ވަނީ ވަރަށް ބޮޑު ސަމާލުކަމެއް ހުއްޓިފައެވެ.
މި ކީނޯޓް ސެޝަން އޮންލައިންކޮށް ލައިވްސްޓްރީމް މެދުވެރިކޮށް ދުނިޔޭގެ ކޮންމެ ތަނެއްގައި ހުރެގެން ވެސް ބަލާލެވޭނެ އިންތިޒާމު ހަމަޖެހިގެންދާނެ ކަމަށް އެ މައުރަޒު އިންތިޒާމުކުރާ ފަރާތުން ބުންޏެވެ.