ކޮޕާ އިޓާލިއާގެ ސެމީ ފައިނަލްގައި އޭސީ މިލާން އާއި އިންޓާ މިލާންގެ މެދުގައި ކުޅުނު ފުރަތަމަ ލެގު އެއްވަރު ވެގެން ނިމިއްޖެއެވެ.
ސެންސީރޯ ސްޓޭޑިއަމްގައި ކުޅުނު މިމެޗު އެއްވަރު ވެފައިވަނީ 1-1 އިންނެވެ. މި ސީޒަންގައި ފެނިގެންދިޔަ ހަތަރުވަނަ މިލާން ޑާބީގައި ދެ ޓީމުގެ ފަރާތުން ވެސް ރަނގަޅު ކުޅުމެއް ފެނިގެންދިޔައެވެ.
އަދި މިއިން އެއްވެސް މެޗަކުން މިހާތަނަށް އިންޓާ މޮޅުވެފައެއް ނުވެއެވެ. ނަމަވެސް މި މެޗުގައި ގިނަ ހަމަލާ އުފައްދާ ގިނައިރު ބޯޅަ ގެންގުޅެފައިވަނީ އިންޓާއިންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ފުރަތަމަ ހާފުގައި މިލާންގެ ކީޕާ މައިކް މައިޔޯންވަނީ އިންޓާގެ ހޯކުއިން ކޮރެއާ، ހަކާން ޗަލަނޮގްލޫ އަދި ޑޭވިޑް ފްރެޓޭސީ ފޮނުވާލި ނުރައްކާތެރި ތިން ހަމަލާއެއް ދިފާއު ކޮށްފައެވެ.
މި މެޗުގެ ފުރަތަމަ ލަނޑު ޖަހާ މެޗުގެ ލީޑު ނަގާފައިވަނީ މިލާނުންނެވެ. މި ލަނޑު އެ ޓީމަށް ކާމިޔާބު ކޮށްދިނީ ދެވަނަ ހާފުގެ ކުޅުން ފެށިތާ ދެވަނަ މިނެޓުގައި ޓެމީ އަބްރަހަމެވެ. މި މެޗުގައި އިންޓާއިން މެޗުގެ ނަތީޖާ ހަމަހަމަކުރި ލަނޑު މެޗުގެ 67ވަނަ މިނެޓުގައި ކާމިޔާބު ކޮށްދިނީ ޗަލަނޮގްލޫއެވެ.
މި މެޗުގައި މީގެ އިތުރުން ވެސް ލަނޑު ޖަހާނެ ރަނގަޅު ފުރުސަތު އެ ޓީމަށް ވެސް ލިބިގެންދިޔައެވެ. މިގޮތުން އިންޓާގެ ސްޓެފަން ޑި ވިރީ އާއި ނިކޮލާ ސެލޫސްކީއަށް ލިބިގެންދިޔަ ފުރުސަތުތައް ފާހަގަވެގެންދިޔައިރު މިލާންގެ ރަފައެލް ލިއާއޯއަށް ވެސް ވަނީ މެޗު ނިމެނިކޮށް ލަނޑު ޖަހާނެ ރަނގަޅު ފުރުސަތެއް ލިބިގެން ގޮސްފައެވެ.
މި ދެ ޓީމުގެ މެދުގައި ކުޅުމަށް ހަމަޖެހިފައިވާ ދެވަނަ ލެގު ކުޅުމަށް ހަމަޖެހިފައިވަނީ މި މަހުގެ 23 ވަނަ ދުވަހެވެ. މި ދެ ޓީމަކީ ވެސް ހޯމް ސްޓޭޑިއަމްގެ ގޮތުގައި ސެންސީރޯ ގެންގުޅޭ ދެ ޓީމު ކަމުން އެ މެޗު ވެސް ކުޅެވިގެންދާނީ އެ ސްޓޭޑިއަމްގައެވެ.
އަދި މި ކުރިމަތިލުން ކާމިޔާބު ކުރާ ޓީމެއް ފައިނަލްގައި މެއި މަހުގެ 14 ވަނަ ދުވަހު ބައްދަލުކުރާނީ ބޮލޯނިއާ އާއި އެމްޕޯލީގެ މެދުގައި ކުޅޭ ސެމީ ފައިނަލުން ކުރި ހޯދާ ޓީމަކާއެވެ.