މީގެ އަހަރުތަކެއް ކުރިން ރިލީޒްކުރި އިންޑިއާގެ ކޮމޭޑިއަން/އެކްޓަރު ކަޕިލް ޝަރުމާގެ ފިލްމު "ކިސް ކިސްކޯ ޕިޔާރު ކަރޫން"ގެ ދެވަނަ ފިލްމުގެ ޕޯސްޓަރު އާއްމުކޮށްފިއެވެ.
ބޮލީވުޑްގެ މަގުބޫލު ޑައިރެކްޓަރުން ކަމަށްވާ އައްބާސް-މުސްތާންގެ "ކިސް ކިސްކޯ ޕިޔާރު ކަރޫން-2"ގައި ވެސް ކަޕިލް ފެންނާނީ ފުރަތަމަ ފިލްމުގައި ފެނުނު ކުމާރު ޝިވް ރާމް ކިޝަންގެ ރޯލްއިންނެވެ.
މީގެ 10 އަހަރު ކުރިން ރިލީޒްކުރި "ކިސް ކިސްކޯ ޕިޔާރު ކަރޫ"ގައި ކަޕިލް ކުޅެފައި ވަނީ އެއްފަހަރާ ތިން އަނބިން ގޮވައިގެން އެކަކު އަނެކަކަށް އެ ގުޅުން ސިއްރުކޮށްގެން އުޅޭ ފިރިއެއްގެ ރޯލެވެ.
ނަމަވެސް ދެވަނަ ފިލްމުގެ ޕްލޮޓް މިހާތަނަށް ހާމަކޮށްފައެއް ނުވެއެވެ. ފިލްމުގެ ޕޯސްޓަރުން ފެންނަ ގޮތުގައި ދެވަނަ ފިލްމުގައި ވެސް ކަޕިލް ވަނީ ކައިވެނީގެ ގޮށްޖެހުމަށްފަހު ރަނގަޅަށް އެ ގުޅުމުގައި ތާށިވެފައި ކަމަށް ބައެއް ބެލުންތެރިން ވަނީ ބުނެފައެވެ.
ފިލްމު "ކިސް ކިސްކޯ ޕިޔާރު ކަރޫ"ގެ ބަތަލާއިންނާ އެކު ކަޕިލް-ފޮޓޯ/ފޭސްބުކް
މި ފިލްމުގެ ދެވަނަ ބައި ޑައިރެކްޓްކޮށްފައި ވަނީ ކަޕިލްގެ ޓެލެވިޒަން ޝޯ "ދަ ކަޕިލް ޝަރުމާ ޝޯ"ގައި ޑައިރެކްޓަރެއްގެ ގޮތުގައި މަސައްކަތް ކުރަމުން އަންނަ އަނުކަލްޕް ގޮސްވާމީއެވެ. އަނުކަލްޕް އަކީ ކަޕިލްގެ ފިލްމު "ކިސް ކިސްކޯ ޕިޔާރު ކަރޫ"ގެ ފުރަތަމަ ބައިގެ ސްކްރިޕްޓް ތައްޔާރުކުރި ފަރާތެވެ.
ވަރަށް ކުޑަ ބަޖެޓަކުން އުފެއްދި މި ފްރެންޗައިސްގެ ފުރަތަމަ ފިލްމަށް ބޮކޮސް އޮފީހުގައި އުއްމީދުކުރި ވަރަށްވުރެ މާބޮޑަށް ވެސް ވަނީ ހިނގާފައެވެ.
އެހެންކަމުން ދެވަނަ ބަޔަށް ވެސް ބޮކްސް އޮފީހުގައި ބޮޑު ތަރުހީބެއް ލިބޭނެ ކަމަށް އުއްމީދުކުރާ ކަމަށް ފިލްމުގެ ޑައިރެކްޓަރާ ހަވާލާދީ ރިޕޯޓުތައް ބުނެއެވެ.
ކަޕިލް އެންމެފަހުން ބެލުންތެރިންނަށް ފެނިފައި ވަނީ މިދިޔަ އަހަރު ރިލީޒްކުރި ފިލްމު "ކްރޫ"ގެ ރޯލަކުންނެވެ.