ރަމަޟާން މަސް ނިމުމާއެކު އެ މަހު ނދީގެ ތާވަލު ގެންގުޅެވުނު ގޮތް ބަދަލުކޮށް ކުރީގެ ނިދީގެ ތާވަލަށް އެނބުރި ދިއުމަކީ ވަރަށް ގިނަ ބަޔަކަށް އުނދަގޫ ކަމެކެވެ.
އެއް މަސް ދުވަސް ވަންދެން ނިދުމުގެ ވަގުތުތައް އިންސްޓްލޯމަންޓް އުސޫލުން ބަހާލައިގެން ބައެއް މީހުން ގެންގުޅުނު ކަމަށް ބުނާއިރު ރަމަޟާން މަސް ނިމުމާއެކު ވަޒީފާ ތަކަށް ނުކުންނަ މީހުންނަށް ވެސް އެންމެ ބޮޑަށް ދިމާވެފައިވާ މައްސަލައަކީ ކުރީގެ ނިދީގެ ތަވާލާ އެއްގޮތަށް ނިދުމުގެ އާދަ ގެންގުޅުމެވެ.
މިކަމާ ގުޅޭގޮތުން އެމެރިކާގެ ސްޓޭޓެއް ކަމަށްވާ އިންޑިއާނާއަށް ނިސްބަތްވާ ޑރ. އިސްމާޢީލް ޑީ ބަޖީ ވަނީ ސަމާލުކަން ދިނުން މުހިއްމު ކަންކަން ފާހަގަކޮށްފައިވާ ލިޔުމެއް ދަ ޕޮއިންޓް ނިއުސްޕޭޕާގެ ނަމުގައި ނެރޭ މެގަޒިންއެއްގައި ޝާއިއުކޮށްފައެވެ.
ދުވާލުގެ ވަގުތު އިރުގެ ދޯދިތަކުން ލިބޭ އަވި ހަށިގަނޑަށް ހޯދައިދިނުމަކީ ރޭގަނޑު ނިދަން ފަސޭހަކޮށްދޭ ކަމެއް--ފޮޓޯ/ޕްރެސްޓީޖްއޮންލައިން
ޑރ. އިސްމާޢީލްގެ ލިޔުމުގައި ފާހަގަކޮށްފައިވާ ގޮތުގައި ދުޅަހެޔޮ ސިއްހަތެއްގައި ދެމިހުރުމަށް ސަމާލުކަންދިނުމުން މުހިއްމު މައިގަނޑު ފަސްކަމެއްވެއެވެ. އޭގެތެރޭގައި ހިމެނޭ އެންމެ މުހިއްމު އެއް ކަމަކީ ހަށިގަނޑަށް ބޭނުންވާ ފުރިހަމަ ނިދި ގަވައިދުން ހޯދުން ކަމަށް މި ލިޔުމުގައި ވަނީ ފާހަގަކޮށްފައެވެ.
ރަމަޟާން މަސް އައުމުން ނިދުމުގެ އާދައަށް ގެނެވުނު ބަދަލާއެކު އެ ތާވަލު ބަދަލުކޮށްލުމަށް ތިމާގެ އަމިއްލަ ނަފުސަށާއި ހަށިގަނޑަށް ވަގުތު ދިނުމަކީ ވަރަށް މުހިއްމު ކަމެއް ކަމަށް ޑރ. އިސްމާޢީލް ވަނީ ފާހަގަކޮށްފައެވެ.
ކުރީގެ ތާވަލާ އެއްގޮތަށް ނިދުމުގެ އާދަ ގެންގުޅުމުގެ މަސައްކަތް ފަށާއިރު ކޮންމެ ދުވަހަކު ވެސް ނިދިން ހޭލާ ވަގުތު 15 މިނެޓާއި 30 މިނެޓާއި ދެމެދުގެ ވަގުތަކަށް އަވަސް ކުރުމަކީ ކުރެވިދާނެ ކަމެކެވެ. އެކަމުގެ ސަބަބުން ނިދުމާއި ހޭލުމުގެ ސައިކަލް ރެގިއުލޭޓްކުރުމަށް މަސައްކަތްކުރާ ސާކެޑިއަން ރިދަމް ގުދުރަތީ ގޮތުން ރީއެލައިންވެ ހަށިގަނޑަށް ލިބޭ ޝޮކް ކުޑަކޮށްދޭނެ ކަމަށް ޑރ. އިސްމާޢީލްގެ ލިޔުމުގައި ވަނީ ފާހަގަކޮށްފައެވެ.
ރަމަޟާން މަހު ވެސް ގަޑިން ގަޑިއަށް ނިދުމަށް ސަމާލުކަން ދިނުމަކީ ދުޅަހެޔޮ ސިއްހަތެއްގައި ދެމިހުރުމަށްޓަކައި ވަރަށް މުހިއްމު ކަމެއް--ފޮޓޯ/ޕިންޓްރެސްޓް
ދުވާލުގެ ވަގުތުތަކުގައި ކެއުމަށް ހަށިގަނޑު އާދަކުރުމުގެ ގޮތުން ކެއުން ހަޖަމުކުރުމުގެ ނިޒާމަށް ވަގުތު ދިނުމަކީ ވެސް ވަރަށް މުހިއްމު ކަމެކެވެ. އެގޮތުން ރޭގަނޑުގެ ނިދުމުގެ ވަގުތު ކައިރިކޮށް ކެއުމުގެ ބަދަލުގައި ނިދުމުގެ ތިން ގަޑިއިރުކުރިން ކެއުމަށް އާދަކުރުމަށް ޑރ. އިސްމާޢީލްގެ ލިޔުމުގައި ވަނީ އިރުޝާދުދީފައެވެ.
ހަމައެއާއެކު އެކި ކަހަލަ ޖޫސް ނުވަތަ ފެން ބުއިން ވެސް ނިދާ ވަގުތާ ކައިރިކޮށް މަދުކުރުން މުހިއްމެވެ. ރަމަޟާން މަހަކީ އެކި ވައްތަރުގެ ދިޔާތަކެތި ބުއިމަށް ހަށިގަނޑު އާދަވެފައިވާ މަހަކަށްވީ ނަމަވެސް އެހެން މަސްތަކުގައި ނިދާ ވަގުތާއި މާ ކައިރިކޮށް ދިޔާތަކެތި ބުއިމަކީ އިރުއިރުކޮޅާ ފާޚާނާއަށް ދިއުމަށް މަގުފަހިވެ ނިދުމަށް އެކަމުން އަސަރުކުރާނެ ކަމެކެވެ.
ނިދުމުގެ އާދަ ކުރީގެ ގޮތަށް އިއާދަކުރުމުގައި ދެން އެންމެ މުހިއްމު ކަމެއް ދޭންޖެހެނީ މިހާރަކަށް އައިސް ގިނަ ބަޔަކަށް އެ އާދައާ ދުރަށް ދިއުމަށް އެންމެ ދަތި އެއް ކަންތަކަށެވެ.
އެއީ ގެންގުޅޭ އިލެކްޓްރޯނިކް ސާމާނުތަކާއި ދުރުވުމެވެ. އެގޮތުން ގެންގުޅޭ ފޯނު އަދި އިލެކްޓްރިކް ސާމާނުތައް ނިދާ ވަގުތާ ކައިރިކޮށް ބޭނުންކުރުމަކީ ފުރިހަމަ ނިންޖަށް ކުރިމަތިވާ އެންމެ ބޮޑު ހުރަސް ކަމަށް މި ލިޔުމުގައި ވަނީ އަލި އަޅުވާފައެވެ.
ހަމައެއާއެކު ނިދާ ވަގުތާ ކައިރިކޮށް ހަށިގަނޑަށް އެތެރެކުރެވޭ ކެލޮރީސްގެ މިންވަރު މަދު ކުރުމަކީ ވެސް ކުރެވިދާނެ ކަމެކެވެ. ސަބަބަކީ ރޭގަނޑު ނިދާ ވަގުތާ ކައިރިކޮށް ބޭނުންނެތް ގުލްކޯޒާއި ކެލޮރީސްގެ ސަބަބުން ނިދީގެ ސައިކަލްއަށް އެކަމުން ނޭދެވޭ އަސަރުކުރާނެތީއެވެ.
ރަމަޟާން މަސް ނިމުމާއެކު ބޭރުގައި ހޭދަކުރާ ވަގުތު ގިނަކޮށް އިރުގެ އަލިކަމަށް މީހާ ހުށަހެޅޭ މިންވަރު ގިނަވުމަކީ ނިދުމުގެ ހޯމޯން ކަމަށްވާ މެލަޓޯނިން އުފެދުން ހުއްޓުވާ ރޭގަނޑު ނިދުމަށް ފަސޭހަވެގެންދާނެ ކަމެކެވެ.
ރޭގަނޑު ފަސޭހައިން ނިދާލުމަށް މަގުފަހިކޮށްދޭނެ އިތުރު ކަންކަމުގެތެރޭ ނިދާ ކޮޓަރި ސިކުނޑިއަށް ހަމަޖެހުމެއް ގެނެސްދޭނެ ކަހަލަ ފަނޑު އައްޔެއް އިޚުތިޔާރުކޮށް ނިދާ ވަގުތު ޤުރުއާން އަޑު އަހާލުމުން ވެސް ހިތަށް ފިނިކަމެއް ލިބި ފަސޭހައިން ނިދުމަށް އެހީތެރިވެދޭނެ ކަމަށް ޑރ. އިސްމާޢީލްގެ ލިޔުމުގައި އަލި އަޅުވާފައިވެއެވެ.
ރަމަޟާން މަހަށްފަހު ނިދުމުގެ ތާވަލު ބަދަލުކޮށްލުމަކީ ވަރަށް ކެތްތެރިކަމާ އެކު އަމިއްލަ ނަފުސަށް ވަގުތު ދީގެން ކުރުން މުހިއްމު ކަމެކެވެ.
އަބަދުވެސް ހަނދާކުރުން މުހިއްމު ކަމަކީ ހަށިގަނޑަށް ބޭނުންވާ ފުރިހަމަ ނިދި އެންމެ ރަނގަޅު ގޮތުގައި ހޯދުމަކީ އަމިއްލަ ނަފުސު ދުޅަހެޔޮކަންމަތީ ބެހެއްޓުމަށް ކުރާ ވަރަށް މުހިއްމު މަސައްކަތެއް ކަމަށާއި އެކަމުގައި ކާމިޔާބު ހޯދުމަކީ އުނދަގޫ ކަމެއް ނޫންކަމެވެ.