ޓެކްނޮލޮޖީގެ ދާއިރާގެ އެންމެ ނަން މަޝްހޫރު ވިޔަފާރިވެރިންގެ ތެރެއިން ގިނަ ބަޔަކު ސްމާޓްފޯނުގެ ޒަމާން ނިމުމަކަށް އަންނަ ކަމަށް އިޝާރާތްކުރަން ފަށައިފިއެވެ.
މިގޮތުން އީލޮން މަސްކް، ބިލް ގޭޓްސް، މާކް ޒަކަބާގް އަދި ސެމް އޯލްޓްމަން ފަދަ ނަންތައް ހިމެނެއެވެ.
މި ފަރާތްތަކުގެ ވިސްނުމަކީ ވެއަރަބަލް ޓެކްނޮލޮޖީ، ސިކުނޑިއާ ގުޅުވާލެވޭ އިންޓަފޭސްތައް އަދި އޯގްމެންޓެޑް ރިއަލިޓީ ފަދަ ޓެކްނޮލޮޖީތަކުން ފުރިގެންވާ ދުނިޔެއެކެވެ.
އީލޮން މަސްކްގެ ނިއުރަލިންކް ކުންފުނިން މަސައްކަތް ކުރަމުންދަނީ ސިކުނޑިއާއި ކޮމްޕިއުޓަރާ ގުޅުވާލެވޭ އިންޓަފޭސްތަކެއް އުފެއްދުމަށެވެ. މި އިންޓަފޭސްތަކުގެ ސަބަބުން ސްކްރީނެއް ނުވަތަ އެއްވެސް ކަހަލަ ފިޒިކަލް އިންޕުޓެއް ނުލައި ހަމައެކަނި ވިސްނުމުން ޓެކްނޮލޮޖީއާ މުޢާމަލާތްކުރެވޭނެއެވެ. މިހާތަނަށް ދެ މީހެއްގެ ސިކުނޑީގައި މި އިންޕްލާންޓް ހަރުކުރެވިފައިވާކަން ފާހަގަކޮށްލެވެއެވެ.
ބިލް ގޭޓްސް އަކީ ކެއޮޓިކް މޫން ކުންފުނީގެ އިލެކްޓްރޯނިކް ޓެޓޫތަކަށް އިންވެސްޓްކުރާ ފަރާތެކެވެ. މި ޓެޓޫތަކުގައި ނެނޯ ސެންސަރުތަކެއް ހިމެނެއެވެ. އަދި މި ސެންސަރުތަކުން މަޢުލޫމާތު އެއްކޮށް، ފޮނުވައި އަދި ބަލައިގަނެވޭނެއެވެ. މީގެ ބޭނުންތަކުގެ ތެރޭގައި ހެލްތު މޮނިޓަރިން، ޖީޕީއެސް ޓްރެކިން އަދި މުވާސަލާތުކުރުން ހިމެނެއެވެ.
މާކް ޒަކަބާގަށް ފެންނަ ގޮތުގައި 2030 ވަނަ އަހަރާ ހަމައަށް އާންމު ކޮމްޕިއުޓިން ޑިވައިސްގެ ގޮތުގައި ސްމާޓްފޯނުގެ ބަދަލުގައި އޯގްމެންޓެޑް ރިއަލިޓީ ގްލާސް ބޭނުންކުރެވޭނެއެވެ. މީގެ އަސާސަކީ ޑިޖިޓަލް ދުނިޔެ ސީދާ ލޮލަށް ފެންނަ މަންޒަރުގެ މައްޗަށް އޯވަލޭކުރުމެވެ.
ނަމަވެސް އެޕަލްގެ ޓިމް ކުކް އަދިވެސް ސްމާޓްފޯނުގެ ދައުރު ދޫކޮށްލުމަށް ތައްޔާރެއް ނޫނެވެ. އެޕަލްއިން ދަނީ ސްމާޓްފޯނުގެ ޓެކްނޮލޮޖީ އިތުރަށް ތަރައްޤީކުރުމަށް މަސައްކަތްކުރަމުންނެވެ.
މި ހުރިހާ ކަމަކުން ދޭހަވަނީ ކުރިއަށް އޮތް އަހަރުތަކުގައި ޓެކްނޮލޮޖީގެ ދާއިރާގައި ބޮޑެތި ބަދަލުތަކެއް އަންނާނެ ކަމެވެ. ނަމަވެސް މި ބަދަލުތައް އަންނާނީ ކިހާ ހަލުވި މިނެއްގައިކަން އަދި ކަށަވަރެއް ނުވެއެވެ.