މާވަށު ކައުންސިލުން ގިނަ ކުޅިވަރުތަކާ އެކު ޢީދު ފެސްޓިވަލެއް

ކުލަގަދަ ގޮތެއްގައި ފިތުރު ޢީދު ފާހަގަކުރަން ލ. މާވަށު ކައުސިލުން ގިނަ ކުޅިވަރުތަކާ އެކު ފިޠުރު ޢީދު ފެސްޓިވަލެއް މިއަދު އެބަ ބާއްވައެވެ.

މާވަށު ކައުންސިލްގެ މެންބަރު ސަލްމާން ޢަބްދުއްރަހީމް މިއަދު "ސަން"އަށް ވިދާޅުވީ، މި ފިތުރު ޢީދު ފާހަގަކުރުމުގެ ގޮތުން އެ ރަށުގައި ކުރިއަށް ގެންދާ ފެސްޓިވަލްގައި އަންހެން އަދި ފިރިހެން ދެ ޖިންސަށް އަމާޒުކޮށް، ހޭންޑްބޯލް އަދި ފުޓުސަލް މުބާރާތްތަކެއް ބާއްވާނެ ކަމަށެވެ.

އެ ގޮތުން، އެ ރަށު ފުޓްސަލް ދަނޑުގައި މިއަދު ހަވީރު އެ ފެސްޓިވަލް ފެއްޓުމުގެ ރަސްމިއްޔާތު އޮންނާނެއެވެ.

އޭނާ ވިދާޅުވީ، ފެސްޓިވަލްގައި ހިމެނޭ ހޭންޑްބޯލް އަދި ފުޓުސަލް މުބާރާތް އަމާޒުކުރެވިފައިވަނީ 14 އަހަރުން މަތީގެ ކުދިންނަށް ކަމަށެވެ. އެގޮތުން، މި ޢީދުގައި 14 އަހަރުން ދަށުގެ ކުދިން ވެސް ބައިވެރިކުރުމުގެ ގޮތުން، އެ ފެސްޓިވަލް ހުޅުވުމުގެ ރަސްމިއްޔާތުގައި 14 އަހަރުން ދަށުގެ ކުދިންގެ އަންހެން އަދި ފިރިހެން ދެ ޖިންސަށް އަމާޒުކޮށް ހޭންޑްބޯލް އަދި ފުޓުސަލް މެޗެއް ކުޅެން ހަމަޖެހިފައިވާ ކަމަށް ވެސް އޭނާ ވިދާޅުވިއެވެ.

ފެސްޓިވަލް ހުޅުވުމުގެ ރަސްމިއްޔާތުގައި މުބާރާތުގެ ޓީމުތައް ތައާރަފުކުރުމާއި ހޭންޑްބޯލް އަދި ފުޓްސަލް މުބާރާތުގެ ތަށި ދައްކާލުން އޮންނާނެއެވެ. އެ މުބާރާތްތަކުގެ ފައިނަލް މެޗު ކުޅެން ހަމަޖެހިފައިވަނީ އަންނަ އާދިއްތަ ދުވަހެވެ.

ސަލްމާން ވިދާޅުވީ، އެ ރަށުގައި ކޮންމެ އަހަރަކު ވެސް ޢީދު ނަމާދުކުރަނީ ބޮޑު ޖަމާއަތުގައި ކަމަށެވެ. ނަމަވެސް، މިއަދު މޫސުން ގޯސްވެ ވިއްސާރަވުމުގެ ސަބަބުން ޢީދު ނަމާދުކުރަން ޖެހުނީ ރަށު ތިން މިސްކިތެއްގައެވެ.

މީގެ އިތުރުން ވެސް އެ ރަށުގައި ކޮންމެ ޢީދެއްގައި ވެސް ނަމާދަށް ފަހު ރައްޔިތުންނަށް ޢީދު ސައި ދޭ ކަމަށް އޭނާ ވިދާޅުވިއެވެ. ޢީދު ސައި ތައްޔާރުކުރަނީ ރަށު މުވައްސަސާތަކުގެ މުވައްޒަފުންނާ އެކު ކަމަށް ވެސް ސަލްމާން ވިދާޅުވިއެވެ.

އޭނާ ވިދާޅުވީ، އެ ރަށުގައި ޢީދުގެ އުފަލުގައި އެންމެން ވެސް ވަރަށް ގުޅިގެން ބައިވެރިވާ ކަމަށެވެ.

"މިހާރު ވެސް އެބަ ފެނޭ މެންދުރު ފަހުގެ ވަގުތުގައި ވެސް އެބަފެނޭ ހަމަ ކުޑަކުދިން މަގުތަކަށް ނުކުމެ ފައިގައި ތަޅާ ކުޅުމާއި އެކި ދިމަދިމާލުގައި ހަމަ ހިޔާކޮށް އޮންނަ ދިމަދިމާލުގައި ހަމަ އަދި ބޮޑެތި މަގުތަގައި ވެސް،" އެ ރަށަކީ އަބަދު ވެސް ވަރަށް ފޯރީގައި ޢީދު ފާހަގަކުރާ ރަށެއްކަން ފާހަގަކޮށް އޭނާ ވިދާޅުވިއެވެ.

comment ކޮމެންޓް