ޢީދު ފާހަގަކުރަމުން އަންނައިރު މިއަދު މެންދުރުން ފެށިގެން ދެކުނާއި މެދުރާއްޖެތެރޭގެ ރަށްތަކަށް ވިއްސާރަވެދާނެ ކަމަށާއި އެކަމަކު ކަނޑުތައް ދަތުރުނުކުރެވޭ ވަރަށް ގަދަ ނުވާނެ ކަމަށް މޫސުމާ ބެހޭ ގައުމީ އިދާރާ (މެޓް) އޮފީހުން މިއަދު ލަފާކޮށްފިއެވެ.
ހެނދުނުން ފެށިގެން ވެސް މާލެއަށް ވެސް މިއަދު އޮތީ ބަނަކޮށެވެ. ޢީދު ނަމާދު ވަގުތު ވެސް މާލެއަށް ކޮންމެ ވެސް ވަރަކަށް ވަރަށް ކުޑަކޮށް ކެރީގެ އަސަރުކުރިއެވެ.
މޫސުމާ ގުޅޭ އެންމެ ފަހުގެ މައުލޫމާތު ހިިިއްސާކުރަމުން މެޓުން ބުނީ، އެންމެ ބޮޑަށް ވިއްސާރަ ކުރާނެ ކަމަށް ލަފާކުރެވެެނީ ދެކުނުގެ ރަށްތަކަށް ކަމަށެވެ. އެ ސަރަހައްދުގެ ރަށްތަކަށް ބޯކޮށް ވާރެވެހޭނެ ކަމަށާއި އެކަމަކު ކަނޑުތައް ގަދަވި ނަމަވެސް ދަތުރު ނުކުރެވޭ މިންވަރަށް ގަދަނުވާނެ ކަމަށް ލަފާކުރެވޭ ކަމަށް މެޓުން ބުންޏެވެ.
މެޓުން ބުނީ، މެދުރާއްޖެ ތެރޭގެ ބައެއް ރަށްތަކަށް ވެސް ކެރީގެ އަސަރު ކޮށްފާނެ ކަމަށެވެ. އެކަމަކު، އުތުރުގެ ރަށްތަކަށް ޢާއްމުގޮތެއްގައި މޫސުން ރަނގަޅުވާނެ ކަމަށް ވަނީ ލަފާކޮށްފައެވެ. މެޓުން ލަފާކުރަނީ ދެކުނުގެ ކަނޑުތައް އާދައިގެ ވަރަކަށް ގަދަވި ނަމަވެސް އުތުރުގެ ކަނޑުތައް އާދައިގެ ވަރަކަށް މަޑުވާނެ ކަމަށެވެ.
މީގެ އިތުރުން، ދެކުނުގެ ރަށްތަކަށް 10 މޭލާއި 20 މޭލާ ދެމެދު ބާރުމިނެއްގައި ވައިޖެހޭނެ ކަމަށާއި މެދުރާއްޖެތެރެއާއި އުތުރުގެ ރަށްތަކަށް 5 މޭލާއި 15 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށް މެޓުން ވަނީ ލަފާކޮށްފައެވެ.
އެކަމަކު، ދެކުނުގެ ރަށްތަކަށް ވެސް މާދަމާ ހަވީރުން ފެށިގެން މޫސުން އަލިވާނެ ކަމަށް ވަނީ ލަފާކޮށްފައެވެ.
މިހާރު ދޭތެރެ ދޭތެރެއިން ރާއްޖެއަށް ކުރަމުން އަންނަ ވިއްސާރައިގައި ފެން ބޮޑުވެ، ބޮޑެތި ގެއްލުންތައް ލިބުން ވެސް ވަނީ އާއްމުވެފައެވެ. އެގޮތުން، މި ރޯދަ މަސް ފެށުނު ފަހުން ވެސް ކުރި ވިއްސާރައިގައި މާލެއާއި އަތޮޅުތެރޭގެ ބައެއް ރަށްރަށުގައި ފެންބޮޑުވެ އެކި ވަރުގެ ގެއްލުންތައް ލިބުނެވެ.
ފާހަގަކޮށްލެވޭ ގޮތުގައި ރޯދަމަހުގެ ފަހު 10 އަށް ސަރުކާރު މި މަހު 20 ގައި ބަންދުކުރި ގޮތަށް ދެން ހުޅުވޭނީ އަންނަ މަހު ހައެއްވާ އާދިއްތަ ދުވަހެވެ. ބޮޑު ބަންދެއް ލިބުމުން ގިނަ ބަޔަކު ވަނީ ޢީދަށް ރަށްރަށަށް ވެސް ދަތުރުކޮށްފައެވެ.