ރަށްވެހި އާސާރުތައް އުފައްދައި ހިންގުމުގެ ޢިލްމީ ޤާބިލުކަން މުޅި ރާއްޖެއަށް ފޯރުކޮށްދިނުމުގެ ޢިލްމީ ތަމުރީނުތަކެއް މި އަހަރު ހިންގަން ފެށާނެ ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.
ހއ. ކެލާ ރަށްވެހި އާސާރު ތަރައްޤީކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަފުޅުދައްކަވަމުން ވަޒީރު ވިދާޅުވީ، އަމިއްލައަށް ދާރުލްއާސާރުތައް ނުވަތަ ރަށްވެހި އާސާރުތައް އުފައްދައި ހިންގުމުގެ ޤާބިލުކަން ލިބިފައިވާ މީހުން ރާއްޖޭގެ ހުރިހައި ރަށެއްގައި ތިބުން މުހިންމު ކަމަށާއި ކުރިއަށް އޮތް ތަނުގައި އެ ރޮނގުން ޚާއްޞަ ތަމުރީނު ޕްރޮގްރާމުތަކެއް ހިންގަވާނެ ކަމަށެވެ.
މީގެ އިތުރުން، ވުޒާރާގެ ސްޓްރެޓީޖިކް އެކްޝަން ޕްލޭންގައި ހިމެނިފައިވާ ރަށްވެހި އާސާރުތައް ބިނާކުރުމުގެ އަމާޒު ޙަޤީޤަތަކަށް ހެދުމަށްޓަކައި ރައީސް ޑރ. މުޙައްމަދު މުޢިއްޒު ފަށްޓަވައިފައިވާ ދިވެހި ނެޝަނަލް އައިޑެންޓިޓީގެ މަފްހޫމުތަކާ އެއް ގޮތަށް، ދާރުލްއާސާރުތައް އެކަށައެޅުމާއި ބެލެހެއްޓުމުގެ ފަންނީ އަދި ޢިލްމީ ޤާބިލުކަން މުޅި ރާއްޖެއަށް އާންމުކުރަން ޖެހޭކަން ވަޒީރު ފާހަގަކުރައްވާފައިވެއެވެ.
ވަޒީރު ވިދާޅުވީ، އެކިއެކި ސަފީރުންނާއި، އެކިއެކި ޤައުމުތަކުގެ ކަމާބެހޭ އިސްފަރާތްތަކާ އެކު ކުރެވުނު މަޝްވަރާތަކުން މި ތަމުރީނުތައް ފޯރުކޮށްދިނުމުގެ އަމަލީ މަސައްކަތްތައް ފެށުމަށް ފުރުސަތު ފަހިވެފައިވާ ކަމަށެވެ.
އެގޮތުން، ވޭތުވެދިޔަ އަހަރު އެކަމާ ގުޅޭ ދާއިރާއިން، ވުޒާރާގެ ބޭފުޅުން ބައެއް ތަމުރީނުތައް ފުރިހަމަކޮށްފައިވާ ކަމަށާއި މި އަހަރު ވެސް ތަމުރީނުތަކަށް ފުރުޞަތު ލިބިފައިވާ ކަމަށް ވަޒީރު ވިިދާޅުވިއެވެ.
އެހެންކަމުން އެކަމާ ގުޅުން ހުރި ތަމުރީނުތައް ހޯއްދެވުމަށް އަންނަ އޭޕްރީލް މަހުގެ 17 ވަނަ ދުވަހު އެ ވުޒާރާގެ ދެ މުވައްޒަފަކު ޗައިނާއަށް ފުރުމަށް ވަނީ ހަމަޖެހިފައި ކަމަށް ވެސް ވަޒީރު ފާހަގަކުރެއްވިއެވެ.
ނަސީރު ވިދާޅުވީ ތަމުރީނުތައް ފުރިހަމަކުރުމަށް ފަހު ކުރިއަށް އޮތް ތިން މަސް ދުވަސް ތެރޭގައި ޢިލްމީ ތަމުރީނު ކޯސްތައް މުޅި ރާއްޖެއަށް ހިންގަން ފެށޭނެ ކަމަށެވެ.
ނަސީރު ވަނީ އެ މަސައްކަތުގެ އިތުރުން ވުޒާރާގެ ސްޓްރެޓެޖިކް އެކްޝަން ޕްލޭންގައިވާ ގޮތަށް ރައީސް މުޢިއްޒު ގެ ތަރިކަ އިޢާދަކުރުމުގެ ޤައުމީ މަޝްރޫޢުގެ ދަށުން ކޮންމެ ރަށެއްގައި ވެސް ފަރުދީ ފެންވަރުގައްޔާއި، ޖަމާއަތުގެ ފެންވަރުގައްޔާއި އަދި ރަށުފެންވަރުގައި އެކި ބާވަތުގެ އާސާރުތައް ތަޢާރަފުކުރުމުގެ ޤާބިލުކަން އުފެއްދުމަކީ ކުރަައްވާނެ މަސައްކަތެއް ކަމުގައި ވިދާޅުވެފައެވެ.