ރޯދައިގެ ފަހު ދިހައަކަށް އަޅާއިރު، އަދިވެސް ކަދުރު ގިނައިން ހުރި ކަމަށްވާނަމަ މިއީ ކަދުރުން ތައްޔާރުކުރެވިދާނެ ފޮނި ކާއެއްޗެކެވެ.
ބޭނުންވާ ތަކެތި
- 3/4 ޖޯޑު ކަދުރު (އޮށް ނަގައިފައި)
- 1/2 ޖޯޑު ޕީނަޓް ބަޓާ
- 1 މޭޒުމަތީ ސަމުސާ
- 1 ބިސް
- 5 މޭޒުމަތީ ސަމުސާ ކޮކޯ ޕައުޑަރު
- 1 ސައިސަމުސާ ބޭކިން ޕައުޑަރު
- 1 ސައިސަމުސާ ވެނީލާ އެސެންސް
- ލޮނުކޮޅެއް
ތައްޔާރުކުރާނެ ގޮތް
އެންމެ ފުރަތަމަ، އަވަން 350 ފެރެންހެއިޓް (177 ޑިގްރީ ސެލްސިއަސް)ގައި ހޫނުކުރަން ޖައްސާށެވެ. އަދި މިނީ މަފިން ޓްރޭއެއްގަައި ތެޔޮފޮދެއް ހާކައި، ތައްޔާރުކޮށްލާށެވެ.
ދެން މިކްސަރެއްގައި ކަދުރާއި ބިސް އެއްކޮށްލާށެވެ. އޭގެ ތެރެއަށް ޕީނަޓް ބަޓާއާއި ކޮކޯ ޕައުޑަރާއި ބޭކިން ޕައުޑަރާއި ވެނީލާ އެސެންސް ވެސް އަޅައި، މިކްސަރު ޖައްސާށެވެ. އެ މިކްސް ހުންނާނީ ތަތްކޮށެވެ.
އެ މިކްސް ނަގައި، މޭޒުމަތީ ސަމުސާއަކަށް ވާވަރުގެ އެތިކޮޅެއް މަފިން ޓްރޭއަށް އަޅަމުންދާށެވެ. މިކްސް އެޅުމަށްފަހު، އަތުން ފިއްތައި، އެއްވަރުކޮށްލަންވާނެއެވެ. އެގޮތަށް ހަދާއިރު އަތުގައި ފެންފޮދެއް ހާކާފައި ބެހެއްޓުމުން ކަދުރު އަތުގައި ތަތްނުލަވާނެއެވެ.
އެއަށްފަހު މަފިން ޓްރޭ އަވަނަށް ލައި، 12-15 މިނެޓު ވަންދެން މަޑުކޮށްލާށެވެ. އަދި ޓްރޭ އަވަނުން ނަގައި، ބްރައުނީތައް އެއްކޮށް ހިހޫވަންދެން 30 ވަރަކަށް މިނެޓު މަޑުކުރަން ޖެހޭނެއެވެ. އެއީ ހޫނުއިރު މި ބްރައުނީ ވަރަށް މަޑުވި ނަމަވެސް ހިހޫވުމުން، ޓްރޭއިން ނެގޭ ވަރަށް ހަރުވާނެތީއެވެ.
ޓްރޭއިން ނެގުމަށްފަހު ބްރައުނީ ވަގުތުން ކެވޭނެއެވެ. އަދި، ވައިނުވަންނަ ގޮތަށް ރައްކާ ކުރެވޭ ތަށްޓަކަށް ލުމަށް ފަހު، ގާތްގަނޑަކަށް ދެ ހަފުތާއަށް ފުރިޖުގައި ވެސް ބެހެއްޓޭނެއެވެ.