މާލޭގެ ގެއެއްގައި ގަވާއިދާ ޚިލާފަށް ކާބޯތަކެތި ތައްޔާރުކޮށް، ޑެލިވަރީކުރަމުން އައި ތިން ބިދޭސީއަކު އިމިގްރޭޝަނުން ރޭ އަތުލައިގެންފިއެވެ.
މިއީ އިމިގްރޭޝަން ވޮޗަށް މި މަހު ފަސްވަނަ ދުވަހު ރިޕޯޓުކުރި މައްސަލައެކެވެ.
އިމިގްރޭޝަނުން ބުނީ، އެ ރިޕޯޓާ ގުޅިގެން ރޭ މ. ހާމަނީ ބަލައި ފާސްކޮށްފައިވާ ކަމަށެވެ. އެ ގޭގެ ފުރަތަމަ ފަންގިފިލާގައި ތިން ބިދޭސީން ވެގެން ރޭގަނޑު 9:00 އިން ފެށިގެން 2:00 އާ ހަމައަށް ކާބޯތަކެތި ތައްޔާރުކޮށް ޑެލިވަރީކުރުމުގެ ވިޔަފާރި އޮންލައިންކޮށް ކުރި ކަމަށް އިމިގްރޭޝަނަށް ވަނީ ރިޕޯޓުކޮށްފައެވެ.
އެ ތަނުގައި މަސައްކަތްކުރި ތިން ބިދޭސީން މަސައްކަތްކުރަމުންދިޔައީ އެ މީހުންނަށް ދޫކޮށްފައިވާ ހުއްދައިގެ ބޭރުން ގަވާއިދާ ޚިލާފަށެވެ. އެހެންވެ، ތިން މީހުން ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ.
އިމިގްރޭޝަނުން އަންނަނީ ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރަން ގިނަ މަސައްކަތްތަކެއް ކުރަމުންނެވެ.
އެގޮތުން، އިމިގްރޭޝަނުން ވަނީ ގަވާއިދާ ޚިލާފަށް ކާބޯތަކެތި ތައްޔާރުކުރި ގިނަ އަދަދެއްގެ ބިދޭސީން ޑީޕޯޓުކޮށްފައެވެ. މީގެ ކުރިން ވަނީ ގަވާއިދާ ޚިލާފަށް، ވަރަށް މުޑުދާރުކޮށް ކާބޯތަކެތި ތައްޔާރުކުރި ބިދޭސީންތަކެއް ވެސް އަތުލައިގެންފައެވެ.
އެންމެ ފަހުގެ ބޯހިމެނުމުގެ އަދަދުތަކަށް ބަލާއިރު، ދިވެހީންގެ އާބާދީއަކީ 382،751 މީހުންނެވެ. ބާކީ 132،371 މީހުންނަކީ ބިދޭސީންނެވެ. އެ ގޮތުން ރާއްޖޭގައި އުޅޭ ބިދޭސީންގެ އަދަދު ހުރީ ކޮންމެ ތިން ދިވެއްސަކަށް ބިދޭސީއެއްގެ މަގުންނެވެ.
މި ސަރުކާރުގެ އަމާޒަކީ، ގަވައިދާ ޚިލާފަށް އުޅޭ ބިދޭސީންގެ މައްސަލަ ދައުރުގެ ފުރަތަމަ ތިން އަހަރު ތެރޭގައި ހައްލުކުރުމެވެ. އެހެންވެ، ރާއްޖޭގައި އުޅޭ ހުރިހާ ބިދޭސީންގެ މައުލޫމާތު އެއްކުރުމުގެ މަސައްކަތް ވެސް ސަރުކާރުން އަންނަނީ ކުރަމުންނެވެ.