ބޮލީވުޑްގެ މަގުބޫލު ބަތަލާ ޕަރިނީތީ ޗޯޕްޅާ ކެރިއަރުގެ ފުރަތަމަ ވެބް ސީރީސްއަށް ތައްޔާރުވަމުން އަންނަ ކަމަށް ރިޕޯޓުތައް ބުނެފިއެވެ.
ނެޓްފްލިކްސްއިން ގެނެސްދޭ މި ވެބް ސީރީސްއަކީ މިސްޓްރީ ތުރިލާއެކެވެ. ފިލްމީ ޚަބަރުތައް ގެނެސްދޭ ޕިންކްވިލާގައި ބުނެފައިވާ ގޮތުން މި ވެބް ސީރީސް ޕަރިނީތީއާ އެކު ބަތަލާ އާލިއާ ބަޓްގެ މަންމަ ސޯނީ ރަޒްދާން އަދި ޓެލެވިޒަން ބަތަލާ ޖެނިފާ ވިންގެޓް ވެސް މުހިއްމު ރޯލްއިން ފެންނާނެއެވެ.
ރެންސިލް ދި ސިލްވާ ޑައިރެކްޓްކުރާ މި ވެބް ސީރީސްގެ ކުރިން ވެސް ޕަރިނީތީގެ ފިލްމެއް ނެޓްފްލިކްސްއިން ވަނީ ސްޓްރީމްކޮށްފައެވެ. އެއީ ޑައިރެކްޓަރު އިމްތިޔާޒު ނެޓްފްލިކްސްއާ ގުޅިގެން ގެނެސްދިން ބައޮޕިކް "އަމަރު ސިންގް ޗަމްކީލާ"އެވެ.
ބޮލީވުޑް ބަތަލާ ޕަރިނީތީ ޗޯޕްޅާގެ އަލަތު ވެބް ސީރީސްގެ ކާސްޓުން--ފޮޓޯ/ޕިންކްވިލާ
ޕަރިނީތީގެ އަލަތު ވެބް ސީރީސް އިއުލާނު ކުރަމުން މި ސީރީސްގެ ޕްރޮޑިއުސަރު ސިދާތު ޕީ މަލްހޯތްރާ ބުނެފައި ވަނީ މި ވެބް ސީރީސްގެ މަސައްކަތް މިހާރު ފެށިފައިވާ ކަމަށާއި ވަރަށް އަވަހަށް މި ސީރީސް ރަސްމީކޮށް އިއުލާނުކުރާނެ ކަމަށެވެ.
ބައެއް ކަހަލަ ވާހަކަތަކަކީ މިސްޓްރީއެއްގެ ގޮތުގައި އިހަށް ބޭއްވުން މުހިއްމު ވާހަކަތަކެއް ކަމަށާއި ވަގުތު ޖެހުމުން އެކަން ހާމަކުރާނެ ކަމަށް ސިދާތުގެ ޕޯސްޓުގައި ވަނީ ބުނެފައެވެ.
ފިލްމު "ވީ އާ ފެމިލީ"، "ހިޗްކީ" އަދި "މަހާރާޖް"ގެ ޑައިރެކްޓަރުގެ މި ޕޯސްޓުގައި އަލަށް ޕްރޮޑިއުސްކުރާ ވެބް ސީރީސްގެ ނަން ހާމަކޮށްފައެއް ނުވެއެވެ.
ނަމަވެސް ޕަރިނީތީ ލީޑް ރޯލްއިން ފެންނާނެ މި ވެބް ސީރީސްގެ ކާސްޓުގައި ހިމެނޭ ތަރިންގެ ތައާރަފެއް ދީފައިވާއިރު އޭގެތެރޭގައި ހަރުލީނު ސެތީ،ތާހިރު ރާޖް ބަހްސިން،އަނުޕް ސޮނީ، ސުމީތު ވިޔަސް އަދި ޗައިތަންޔާ ޗައުދަރީ ހިމެނެއެވެ.
މި ވެބް ސީރީސްގެ ވަރަށް ބޮޑު ބައެއް ނިމިފައިވާ ކަމަށް ސިދާތު ބުނެފައިވީ ނަމަވެސް ބެލުންތެރިންނާ ހަމައަށް ސީރީސް ގެނެސްދޭނެ އިރެއް އަދި އިއުލާނެއް ނުކުރެއެވެ.