ސަލްމާން ޚާނާއި ބަތަލާ ރަޝްމިކާ މަންދަންނާ މިހާރު މަސައްކަތް ފަށާފައިވާ ފިލްމު "ސިކަންދަރު"ގެ މަސައްކަތް އެއްކޮށް ނުނިމެނީސް ދެ ތަރިން އެކީގައި އެހެން ފިލްމެއްގައި މަސައްކަތްކުރަން ފުރުސަތު ލިބިއްޖެއެވެ.
ފިލްމީ ރިޕޯޓުތައް ބުނާގޮތުން މި ފިލްމަކީ ފިލްމު "ޖަވާން"ގެ އެކްޓަރު އެޓުލީ މާކުރިން ސަލްމާން ޚާނާ އެކު އުފައްދަން ނިންމާފައިވާ ފިލްމެކެވެ. މިހާތަނަށް ފިލްމާ ގުޅޭގޮތުން އެއްވެސް ވާހަކައެއް ރަސްމީކޮށް އިއުލާނުކޮށްފައި ނެތް ނަމަވެސް ބަތަލާ ރަޝްމިކާ ފިލްމަށް ސޮއިކޮށްފައިވާ ކަމަށް ފިލްމީ ޚަބަރުތައް ބުނެއެވެ.
ބަތަލާ ރަޝްމިކާ ފިލްމު "ޗާވާ"ގެ ޕޯސްޓަރެއްގައި--ފޮޓޯ/ބޮލީވުޑްހަންގާމާ
ސަލްމާނާއި ރަޝްމިކާ މިހާރު މަސައްކަތް ފަށާފައިވަނީ ސާޖިދު ނަދިއަދުވާލާ ޕްރޮޑިއުސްކޮށް ތަމަޅަ ޑައިރެކްޓަރު އޭއާރު މުރުގަދޯސް އުފައްދާ ފިލްމެކެވެ. މި ފިލްމު މި އަހަރުގެ ފިޠުރު ޢީދާ ދިމާކޮށް ސިނަމާތަކަށް ގެންނަން ނިންމާފައިވާއިރު ފިލްމުގެ ވަރަށް ބޮޑު ޝެޑިއުލްއެއް ވަނީ ނިންމާލާފައެވެ.
ޑައިރެކްޓަރު އެޓުލީގެ ގާތް ފަރާތަކުން މީޑިއާއަށް މައުލޫމާތު ދެމުން ބުނެފައިވަނީ ފިލްމު "ސިކަންދަރު"ގެ ސެޓުތަކުން ސަލްމާނާއި ރަޝްމިކާ އެކީގައި މަސައްކަތް ކުރާ މަންޒަރު އެޓުލީއަށް ވަރަށް ގާޓުން ފެނިފައިވުމުން އޭނާ ބޭނުން ވަނީ ސަލްމާނާ އެކު އުފައްދާ ފިލްމަށް ވެސް ރަޝްމިކާ ގެނައުމަށް ކަމުގައެވެ.
އެޓުލީ ތަންކޮޅެއް ކުރިން މީޑިއާއަށް ދިން އިންޓަވިއުއެއްގައި ބުނެފައިވަނީ އޭނާ ދެން އުފައްދާ ފިލްމެއްގައި ގެނެސްދޭނީ ބެލުންތެރިން ހައިރާންކޮށްލާނެ ކަހަލަ ކާސްޓުން ކަމަށެވެ.
ފިލްމު "ޕުޝްޕާ 2"އިން އެންމެ ފަހުން ފެނުނު ބަތަލާ ރަޝްމިކާއަކީ ސައުތު ސިނަމާގެ ބަތަލާއިންގެ ތެރެއިން ބޮލީވުޑްގެ ހުށަހެޅުންތައް އެންމެ ގިނައިން ލިބޭ އެއް ތަރިއެވެ.
ރަޝްމިކާ ދެން އެންމެ އަވަހަށް ބެލުންތެރިންނަށް ފެންނާނީ މި ފެށޭ ފެބްރުއަރީ މަހުގެ 14ގައި ރިލީޒްކުރާ ބޮލީވުޑް ފިލްމު "ޗާވާ"އިންނެވެ.