ރާއްޖޭގެ 57 ރަށެއްގައި 12،000 އަށްވުރެ ގިނަ ހައުސިން ޔުނިޓު އަޅާދޭނެ ފަރާތެއް ހޯދުމަށް ފިނޭންސް މިނިސްޓަރީން މިއަދު ހުޅުވާލައިފިއެވެ.
ފިނޭންސް މިނިސްޓްރީއިން ގެޒެޓުގައި ޝާއިއުކޮށްފައިވާ އިއުލާނެއްގައި ވަނީ ހައުސިން މިނިސްޓްރީގެ އެދުމުގެ މަތީން ރާއްޖޭގެ 57 ރަށެއްގައި ޕަބްލިކް ހައުސިިން ޕްރޮޖެކްޓުގެ ދަށުން ބޯހިޔާވަހިކަމުގެ މަޝްރޫއެއް ފެއްޓުމަށް ހަމަޖެހިފައިވާ ކަމަށެވެ.
މި މަޝްރޫގައި ޑިޒައިން އެންޑް ބިލްޑިން އުސޫލުން 12،000 އަށްވުރެ ގިނަ ހައުސިން ޔުނިޓު ރާއްޖޭގެ 57 ރަށެއްގައި ޤާއިމްކުރުމަށް ނިންމާފައިވާ ކަމަށް އެ އިއުލާނުގައި ވަނީ ބުނެފައެވެ.
އެގޮތުން މި މަޝްރޫޢުގެ ދަށުން އިޢުލާނު ކުރުމަށް ހަމަޖެހިފައިވާ ކޮންޓްރެކްޓްތަކުގެ މަސައްކަތްތައް ކުރިއަށް ގެންދިއުމަށް ހަމަޖެހިފައިވަނީ އިންޓަނޭޝަނަލް ކޮމްޕެޓިޓިވް ބިޑިން (އައިސީބީ) އާއި ނޭޝަނަލް ކޮމްޕެޓިޓިވް ބިޑިން (އެންސީބީ) އުސޫލުތަކާއި، ދައުލަތުގެ މާލިއްޔަތުގެ ގަވާއިދުގެ ބާބު 10ގައި ބަޔާންކުރާ ހަމަތަކުގެ މަތީންކަމަށް އެ އިއުލާނުގައި ވަނީ ބުނެފައެވެ.
ފިނޭންސް މިނިސްޓްރީއިން ވަނީ މި ކަމަށް ޝައުޤުވެރިވާ ބީލަންވެރިންނަށް އެނެކްސް ދޭއްގައި ކަނޑައަޅާފައިވާ ކެޓަގަރީތަކަށް އެކި ބާވަތުގެ ފައިނޭންޝަލް މޮޑެލް އޮޕްޝަންތައް މެދުވެރިކޮށް ބީލަން ހުށަހެޅުމުގެ ފުރުސަތު ދެވޭނެ ކަމަށް ބުނެފައެވެ.
އަދި ފައިނޭންޝަލް މޮޑެލްތަކާއި އެ މޮޑެލްތަކުގެ ތަފްސީލީ މަޢުލޫމާތު މި މަޝްރޫޢުގެ ދަށުން ކުރެވޭ އިޢުލާންތަކުގެ ސްޕެސިފިކް ޕްރޮކިއުމަންޓް ނޯޓިސްތަކާއެކު ފޯރުކޮށްދެވޭނެ ކަމަށް ވެސް މިނިސްޓްރީން ވަނީ ބުނެފައެވެ.
މިނިސްޓްރީން ވަނީ ފައިނޭންސިން މޮޑެލްތަކަށާއި ބީލަން ހުށަހެޅުމަށް ޤައުމީ އަދި ބައިނަލްއަޤްވާމީ ބީލަންވެރިންގެ ޝަރުޠު ހަމަވުން ބިނާވެގެންވަނީ އެނެކްސް ދޭއްގައި ކަނޑައަޅާފައިވާ ކޮންޓްރެކްޓް ކެޓަގަރީތަކަށް ކަމަށް ބުނަފައެވެ.
ޕްރީ ކޮލިފިކޭޝަން ޕްރޮސެސްއެއް މެދުވެރިކޮށް އޯޕަން ނޭޝަނަލް އަދި އިންޓާނޭޝަނަލް ކޮމްޕެޓިޓިވް ބިޑިން އަށް ހުޅުވާލެވޭ ކޮންޓްރެކްޓްތަކަށް ޚާއްޞަ ޕްރޮކިއުމަންޓް ނޯޓިސްތައް، އަންނަ ފެބްރުއަރީ ގައި އިއުލާނު ކުރެވޭނެ ކަމަށްވެސް މިނިސްޓްރީއިން ވަނީ ބުނެފައެވެ.
އެހެންކަމުން ޕްރީ ކޮލިފިކޭޝަނަށް ދަޢުވަތު ދިނުމަށް މެއިލިން ލިސްޓުގައި ހިމެނުމަށް އެދޭ ޝަރުޠު ހަމަވާ އަދި ޝައުޤުވެރިވާ ބީލަންވެރިންގެ އިތުރުން މިކަމާ ގުޅޭ އިތުރު މަޢުލޫމާތު ބޭނުންވާ ފަރާތްތަކުން [email protected] އީމެއިލް ކުރެއްވުމަށް މިނިސްޓްރީން ވަނީ އެދިފައެވެ.