ސައުދީ ޕްރޯ ލީގުގެ އަލް ހިލާލް އަށް ކުޅެމުންދާ ބްރެޒިލްގެ ފޯވަޑް ނޭމާ އެ ކުލަބާއެކު ހަދާފައިވާ އެއްބަސްވުން ބާތިލްކޮށްފިއެވެ.
މަޢުލޫމާތު ލިބިފައިވާ ގޮތުގައި މި އެއްބަސްވުން ބާތިލްކޮށްފައިވަނީ ދެ ފަރާތުން އެއްބަސްވެގެންނެވެ. އުމުރުން 32 އަހަރުގެ ނޭމާ އަލް ހިލާލްއަށް ސޮއި ކޮށްފައިވަނީ 2023 ވަނަ އަހަރުގެ އޯގަސްޓް މަހު 90 މިލިއަން ޔޫރޯގެ އަގަކަށެވެ.
ނަމަވެސް އޭނާއަށް ލިބުނު އަނިޔާއަށްފަހު އެނބުރި އައިސް މިހާތަނަށް އެ ޓީމަށް ކުޅެވިފައިވަނީ ހަތް މެޗެވެ. 2017 ވަނަ އަހަރު ފްރެންޗް ލީގުގެ ޗެމްޕިއަން ޕެރިސް ސެއިންޓް ޖާއިމްއަށް 200 މިލިއަން ޕައުންޑްގެ އަގަކަށް ބަދަލުވި ބަދަލުވުމާއެކު އަދިވެސް އެންމެ އަގުބޮޑު ފުޓްބޯޅަ ކުޅުންތެރިޔާގެ ގޮތުގައި ބެލެވިފައިވާ ނޭމައަށް މިސީޒަންގައި އަލް ހިލާލަށް ކުޅެވިފައިވަނީ ދެ މެޗެވެ.
އެންމެ ފަހުން ކުޅުނު މެޗަކީ ވެސް މިދިޔަ އަހަރުގެ ނޮވެމްބަރު މަހު ބަދަލު ކުޅުންތެރިއެއްގެ ގޮތުގައި ކުޅުނު މެޗެކެވެ. ޚަބަރުތައް ލިބޭ ގޮތުގައި ނޭމާ މަސައްކަތް ކުރަމުންދަނީ އޭނާ އެންމެ ފުރަތަމަ ކުޅުނު ކުލަބް ކަމަށްވާ ބްރެޒިލްގެ ސަންތޯސްއަށް އަލުން އެނބުރި ދިއުމަށެވެ. އަދި މިކަމުގެ އަޑު ވަރަށް ބޮޑަށް ވަނީ ފެތުރިފައެވެ.
އަލް ހިލާލުން ވަނީ ނޭމާ އެ ކުލަބްގައި ހޭދަކުރި މުއްދަތުގައި އެ ކުލަބަށް ކޮށްދިން ހިދުމަތުގެ އަގު ވަޒަންކޮށް އެކަމަށް ޝުކުރު އަދާކޮށްފައެވެ. އަދި ކުރިއަށް އޮތް ތަނުގައި ވެސް އެ ކްލަބުން އެދެނީ ނޭމާގެ ކެރިއަރުގައި ކާމިޔާބީއަށް ކަމަށް ހާމަކޮށްފައިވެއެވެ.
އަލް ހިލާލާއެކު ހަދި ދެ އަހަރު ދުވަހުގެ އެއްބަސްވުން ބާތިލް ކުރި އިރު އެ އެއްބަސްވުމުގެ ދަށުން ބާކީ ދެން އޮތީ ހަތް މަސް ދުވަހެވެ. އަދި އޭނާ އަށް އަލް ހިލާލްގައި އަހަރަކު 150 މިލިއަން ޔޫރޯ ލިބޭކަމަށްވެއެވެ.