ސެމްސަންގުން އެންމެ ފަހުން ތަޢާރަފުކުރި ގެލެކްސީ އެސް 25 ސްމާޓްފޯނުތަކުގައި މުޅިންއަލަށް ސެޓެލައިޓް މެސެޖިން ފީޗާ ހިމަނައިފިއެވެ.
ނަމަވެސް، މި ފީޗާގެ ބޭނުން ހިފުމަށް ގިނަ ޔޫޒަރުންނަށް ދަތިތަކެއް ކުރިމަތިވެދާނެ ކަމަށް ޓެލެކޮމް ދާއިރާގެ މާހިރުން ވަނީ ބުނެފައެވެ.
މި އަހަރުގެ ޖަނަވަރީ 22 ވަނަ ދުވަހު ރަސްމީކޮށް މި ފޯނު އިޢުލާނުކޮށްފައިވާއިރު، މި ފޯނު މާކެޓަށް ނެރުމަށް ހަމަޖެހިފައިވަނީ 2025 ވަނަ އަހަރުގެ ފެބްރުއަރީ ތިންވަނަ ދުވަހުއެވެ.
އެސް 25 ސީރީސްގެ ފޯނުތަކުގައި އޯވަރކްލޮކްޑް ސްނެޕްޑްރެގަން-8 އެލީޓް ޗިޕްސެޓް ބޭނުންކޮށްފައިވާ ކަމަށާއި، އަދި ސެޓެލައިޓް މެސެޖިން ފީޗާ ވެސް ހިމަނާފައިވާ ކަމަށް ސެމްސަންގުން ބުނެފައިވެއެވެ.
އެހެންނަމަވެސް، މި ފީޗާ އެންމެނަށް ލިބެން ނެތުމުގެ ސަބަބުން މި ކުންފުނިން މި ކަމާ ގުޅޭގޮތުން މާ ގިނަ މަޢުލޫމާތެއް ހިއްސާކޮށްފައެއް ނުވެއެވެ.
ސެޓެލައިޓް އަދި ޓެލެކޮމްސް ކޮންސަލްޓަންޓެއް ކަމަށްވާ ކްރިސްޓިއަން ފްރާ ވޮންޑާ ރޮޕް ވިދާޅުވި ގޮތުގައި، މި ފީޗަރގެ ބޭނުން ހިފުމަށް ހުރަސްތަކެއް ކުރިމަތިވާ ސަބަބަކީ، ސެމްސަންގުން ސެޓެލައިޓް އޮޕަރޭޓަރުންނާއެކު ވެވޭ އެއްބަސްވުންތައް ބެލެހެއްޓުމުގެ ފުރުޞަތު ކެރިއަރުތަކަށް ދީފައިވުމެވެ.
މިވަގުތު މާކެޓުގައި ހުރި ހަމައެކަނި ސެޓެލައިޓް އޮޕަރޭޓަރަކީ ސްކައިލޯ ކަމަށާއި، އެ ކުންފުނިން ވެސް ޕާޓްނަޝިޕް ހަދާފައިވަނީ ހަމައެކަނި އެމެރިކާގެ ވެރައިޒަންއާއެކު ކަން އޭނާ ފާހަގަކުރެއްވިއެވެ.
ސެމްސަންގް ގެލެކްސީ އެސް 25 ބޭނުންކުރާ ފަރާތްތަކަށް ސެޓެލައިޓް މެސެޖިން ފީޗާ ލިބޭނީ ކެރިއަރުތަކުން ސްކައިލޯއާއެކު އެއްބަސްވުމެއްގައި ސޮއިކުރުމުންނެވެ. އެހެންނަމަވެސް، އައިފޯން 14 ނެރުނު އިރު އެޕަލްއިން ގްލޯބަލްސްޓާއާއެކު ސީދާ އެއްބަސްވުމެއްގައި ސޮއިކޮށްފައިވާތީ، އެޕަލް ބޭނުންކުރާ ފަރާތްތަކަށް އިމަޖެންސީ އެސްއޯއެސް ޚިދުމަތް (ލިބެންހުރި ތަންތަނުގައި) ލިބެމުންދާކަން ފާހަގަކުރެވެއެވެ.
ކެރިއަރުތަކުން މި ފީޗާއަކީ މާކެޓް ކުރެވޭނެ ފައިދާއެއް ކަމަށް ދެކޭނަމަ، ކުރިއަށް އޮތް ތަނުގައި ސެޓެލައިޓް ޕްރޮވައިޑަރުންނާއެކު އެއްބަސްވުންތަކުގައި ސޮއިކުރަން ފަށާނެ ކަމަށް ލަފާކުރެވެއެވެ. އެހެންނަމަވެސް، އެފަދަ މަންފާއެއް ނުފެންނަ ނަމަ، މި ފީޗާގެ ބޭނުން ނުހިފި ހިނގައިދާނެ ކަމަށް ވެސް މާހިރުން ވަނީ ބުނެފައެވެ.