ރައީސުލްޖުމްހޫރިއްޔާ ޑރ މުހައްމަދު މުއިއްޒު، ހިއުމަން ރައިޓްސް ކޮމިޝަނުގެ ނައިބު ރައީސްގެ މަގާމަށް، މ. ޖިއެނާ، މުއުމިނާ ވަހީދު މިއަދު އައްޔަންކުރައްވައިފިއެވެ.
އެ މަގާމަށް މުއުމިނާ އައްޔަންކުރައްވާފައި ވަނީ ހިއުމަން ރައިޓްސް ކޮމިޝަނުގެ ގާނޫނުގެ އަށްވަނަ މާއްދާގައިވާ ގޮތުގެ މަތީންނެވެ.
އެޗްއާރުސީއެމަށް ނައިބު ރައީސަކު އައްޔަންކުރީ ކުރިން އެމަގާމުގައި ހުންނެވި ޑރ. އަހުމަދު އަދުހަމް އަބްދުﷲ އިސްތިއުފާ ދެއްވާފައިވާތީއެވެ.
އެ ކޮމިޝަނުގެ ނައިބު ރައީސަކަށް މުއުމިނާ އައްޔަންކުރަން 69 މެންބަރުންގެ އިއްތިފާގުން ރައްޔިތުންގެ މަޖިލީހުން ރުހުން ދީފައި ވަނީ ޖެނުއަރީ 20، 2024ގައެވެ.
މުއުމިނާ ވަނީ އޮސްޓްރޭލިޔާގެ ޔުނިވަސިޓީ އޮފް ސިޑްނީން މާސްޓާސް އޮފް ހިއުމަން ރައިޓްސް އެންޑް ޑިމޮކްރެޓައިޒޭޝަން އޭޝިއާ ޕެސިފިކް، ހާސިލުކުރައްވާފައެވެ.
މުއުމިނާ އެޗްއާރްސީއެމްގެ މެންބަރު ކަމަށް އައްޔަނުކޮށްފައި ވަނީ 2020ވަނަ އަހަރެވެ.
އެޗްއާރުސީއެމްގައި މުއުމިނާގެ އިތުރުން މިހާރު ތިއްބަވަނީ އެ ކޮމިޝަންގެ ރައީސް މަރިޔަމް މުނާއާއި އާމިނަތު ޝިފާއަތު އަބްދުއްރައްޒާގާއި ސަމާއު އަހުމަދު ނަޖީބުގެ އިތުރުން އިސްމާއީލް ހަބީބެވެ.