އޮސްޓްރޭލިއަން އޯޕަންގެ އަންހެން ސިންގަލްސް އިވެންޓްގެ ޗެމްޕިއަންކަން މިމުބާރާތުގައި 21 ވަނައަށް ސީޑު ކުރެވިފައިވާ އެމެރިކާގެ މެޑިސަން ކީސް ހޯދައިފިއެވެ.
މި މުބާރާތުގެ ޗެމްޕިއަންކަން ކީސް ހޯދާފައިވަނީ ފައިނަލްގައި އެންމެ ފަހުގެ ޗެމްޕިއަން އަދި މި މުބާރާތުގައި އެއްވަނައަށް ސީޑު ކުރެވިފައިވާ ބެލަރޫސްގެ އަރީޔާ ސަބަލެންކާއާ ބައްދަލުކޮށް ދެ ސެޓް އެއް ސެޓުން ކާމިޔާބު ކޮށްގެންނެވެ.
މި މެޗަށް ސަބަލެންކާ ނިކުތީ ކުރީ ދެ މުބާރާތުގައި ކާމިޔާބުކުރި ތަށި ދިފާއުކުރުމުގެ އަޒުމާއެކުއެވެ. އަދި ކީސް ނިކުތީ އޭނާގެ ކެރިއަރުގައި ފުރަތަމަ ފަހަރަށް ގްރޭން ސްލޭމް މުބާރާތެއް ކާމިޔާބުކުރުމަށް އުންމީދު ކޮށްގެންނެވެ.
މި މެޗުގެ ފެށުން ރަނގަޅުވިތަން ފެނިގެންދިޔައީ ކީސްގެއެވެ. މިގޮތުން ކީސްވަނީ ސަބަލެންކާ ހައިރާންކޮށްލައި، ސަބަލެންކާ ސާވް ކުރި ފުރަތަމަ ގޭމް ބްރޭކްކޮށްފައެވެ. އަދި މިއާއެކު ފުރަތަމަ ސެޓުގައި ފަހެއް އެކެއްގެ ލީޑެއް ނެގިއެވެ. ނަމަވެސް ސަބަލެންކާވަނީ ޖެހިޖެހިގެން ދެ ގޭމް ކާމިޔާބުކޮށް ކޮންމެވެސް ވަރެއްގެ އުންމީދެއް އާކޮށްފައެވެ.
އެހެން ނަމަވެސް ކީސް އަނެއްކާ ވެސް ސަބަލެންކާގެ ސާވް ބްރޭކް ކޮށް ފުރަތަމަ ސެޓު ހައެއް ތިނަކުން ކާމިޔާބު ކުރިއެވެ. މި މެޗުގެ ފުރަތަމަ ސެޓާ ޚިލާފަށް ދެވަނަ ސެޓުގައި ސަބަލެންކާވަނީ އޭނާގެ ކުޅުން ރަނގަޅުކޮށް ދެއެއް ހަޔަކުން ދެވަނަ ސެޓު ކާމިޔާބުކޮށް ތިންވަނަ ސެޓަކަށް މި މެޗު ގެންގޮސްފައެވެ.
މި މެޗުގެ ތިންވަނަ ސެޓު ވެގެންދިޔައީ ވަރަށް ހަމަހަމަ ކުޅުމެއް ދެ ކުޅުންތެރިންގެ ފަރާތުން ވެސް ފެނިގެންދިޔަ ސެޓަކަށެވެ. މިގޮތުން ދެ ކުޅުންތެރިންނަށް ވެސް އަނެއް ކުޅުންތެރިއެއްގެ ސާވް ބްރޭކް ކުރަން ފުރުސަތު ލިބުމާއެކު ވެސް އެކަން ނުވެ ފަހަރަކު ގޭމެއް ނިމެމުން ގޮސް ކީސް ހައެއް ފަހަކުން ލީޑު ނެގިއެވެ. އަދި ސަބަލެންކާއަށް މިސެޓު ޓައި ބްރޭކަކަށް ގެންދަން ބޭނުންނަމަ އެ ގޭމް ކާމިޔާބުކުރުން މުހިންމުވެގެންދިޔައެވެ. މިކަމުގެ ޕްރެޝަރު ސަބަލެންކާގެ ކުޅުމުން ފެނުނުއިރު ސަބަލެންކާ ހަމަޖެހި މި ގޭމް ކާމިޔާބު ކުރުމަށް ވަރަށް މަސައްކަތް ކުރުމާއެކު ވެސް އެކަން ވާގޮތް ނުވިއެވެ. އަދި ކީސް އެކަމުގެ ފައިދާ ނަގައި އެ ގޭމް ކާމިޔާބުކޮށް ފައިނަލް މެޗު ކާމިޔާބު ކުރިއެވެ.
މެޗަށްފަހު ވާހަަކަ ދައްކަމުން ސަބަލެންކާ ހާމަކުރިގޮތުގައި މި މެޗުގައި ކީސްވަނީ ވަރަށް މޮޅު ކުޅުމެއްް ދައްކާފައެވެ. އަދި މި މެޗުން މޮޅުވާން އޭނާއަށް ކުރެވުނު އެންމެ ރަނގަޅަކަށް މަސައްކަތް ކުރި ކަމަށާއި ނަމަވެސް މިފަހަރު އޭނާއާ އެއްކޮޅަށް ކަންތައްތައް ނުދިޔައީ ކަމަށެވެ.