އިންގްލިޝް ޕްރިމިއާ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީގެ ކެޕްޓަން ކައިލް ވޯކާ ލޯން އެއްބަސްވުމެއްގެ ދަށުން އިޓާލިއަން ސެރީއާގެ އޭސީ މިލާންއަށް ސޮއިކޮށްފިއެވެ.
މައުލޫމާތު ލިބިފައިވާގޮތުގައި ވޯކާ މިލާންއަށް ސޮއި ކޮށްފައި ވަނީ މިސީޒަން ނިމެންދެނެވެ. ނަމަވެސް މި އެއްބަސްވުމުގެ ދަށުން މިލާން ބޭނުންނަމަ ވޯކާ ދާއިމީކޮށް އެޓީމަށް ގެންދިއުމުގެ ފުރުސަތު ހުޅުވާލެވިފައިވެއެވެ.
އުމުރުން 34 އަހަރުގެ ވޯކާއާއެކު މިލާންގައި މިހާރު އިންގްލަންޑަށް ނިސްބަތްވާ ހަތަރު ކުޅުންތެރިން އެބަތިއްބެވެ. އެޓީމުގައި މިހާރު ތިބި ކުޅުންތެރިންނަކީ ފިކާޔޯ ޓޮމޯރީ، ރުބެން ލޮފްޓެސް ޗީކް އަދި ޓެމީ އަބްރަހަމްއެވެ. މިލާންގައި ވޯކާ ބޭނުން ކުރާނީ 32 ނަންބަރު ޖާޒީއެވެ. މާދަމާ ޕާމާއާ ދެކޮޅަށް މިލާން ކުޅޭ މެޗުގައި ވޯކާ ފެނިގެންދިއުމަކީ ގާތް ކަމެކެވެ.
މިލާންއަށް ބަދަލުވުން ޔަގީންވުމާއެކު ވޯކާވަނީ ވަރަށް އަސަރުން ފުރިފައިވާ މެސެޖެެއް އޭނާގެ އިންޓަގްރާމް ޕޭޖުގައި އާންމު ކޮށްފައެވެ. މިގޮތުން އޭނާވަނީ ސިޓީގެ ހުރިޙާ ފަރާތްތަކަށް ވަރަށް ބޮޑަށް ޝުކުރު އަދާކޮށްފައެވެ. މީގެތެރޭގައި ކޯޗިން ސްޓާފުންނާއި ކިޓް މީހާގެ އިތުރުން ބެކް ރޫމް ހުރިހާ ސްޓާފުން ހިމަނާފައިވެއެވެ.
އަދި ކުޅުންތެރިންނަށް ރަނގަޅަށް ކުޅެވެނީ މިފަރާތްތަކުން ކުރާ ބުރަމަސައްކަތުގެ ސަބަބުން ކަމުގައި އޭނާ ފާހަގަ ކުރިއެވެ. ސިޓީގައީ އޭނާ އާއި އެކު އެއްކޮށް ކުޅުނު ކުޅުންތެރިންނަށް ނިސްބަތްކޮށް ވޯކާ ބުނީ ޗޭންޖިން ރޫމްގެ ދޮރުން އެތެރެވުމާއެކު އޭނާއަށް އަމިއްލަ ގޭގެ އިހުސާސް ކުރެވޭކަމަށެވެ. އަދި އެކުޅުންތެރިންނާ އެކު ހޯދިފައިވާ ކާމިޔާބީގެ ހަނދާންތަކަށް ޓަކައި އެކުޅުންތެރިންނަށް އޭނާ ޝުކުރު އަދާކުރިއެވެ.
އެއީ ރައްޓެހިންގެ އިތުރުން މުޅި އުމުރަށް އޭނާގެ އާއިލާގެ ބައެއް ކަމަށް އޭނާ ލިޔެފައި ވެއެވެ. އަދި އެންމެ ފަހުން ކޯޗު ޕެޕް ގާޑިއޯލާއަށް ނިސްބަތްކޮށް ވޯކާ ލިޔެފައި ވަނީ އޭނާއަށް އިތުބާރުކޮށް 2017ގައި އޭނާ އެޓީމަށް ގެނައިތީ ޝުކުރު އަދާ ކުރާ ކަމަށެވެ. އަދި އެކުގާ 17 ތަށި ކާމިޔާބު ކުރެވިފައިވާކަން ފާހަގަކޮށް މިއަދު ވޯކާ މިހިރަ ހިސާބަށް އާދެވިފައިވުމުގައި ޕެޕް އޭނާއަށް ދައްކައިދިން މަގާއި އިރުޝާދު މުހިންމު ދައުރެއް އަދާކުރި ކަމަށެވެ. އެކަމަށްޓަކައި މުޅި އުމުރަށް ޝުކުރުވެރިވާނެ ކަމުގައި ވެސް ވޯކާ ހާމަކޮށްފައިވެއެވެ.
2017ވަނަ އަހަރު 50 މިލިއަން ޕައުންޑްގެ އަގަކަށް ސިޓީއަށް ސޮއި ކުރުމަށްފަހު މިހާތަނަށް އޭނާ ވަނީ 319 މެޗު ކުޅެދީފައެވެ. އަދި ސިޓީ އާއެކު އޭނާ ވަނީ ޕްރިމިއާ ލީގު ހަ ފަހަރު ކާމިޔާބު ކޮށްފައެވެ. އަދި މިދިޔަ ސީޒަންއިން ފެށިގެން އޭނާ އަންނަނީ ސިޓީގެ ކެޕްޓަން ވެސް ކުރަމުންނެވެ.