ބްރެޒިލްގެ ޕަލްމެއިރާސްއަށް ކުޅެމުންދާ ޒުވާން ޑިފެންޑާ ވިކްޓާ ރެއިސް އިންގްލިޝް ޕްރިމިއާ ލީގުގެ ޗެމްޕިއަން މެންޗެސްޓާ ސިޓީ އަށް ސޮއިކޮށްފިއެވެ.
ރިޕޯޓުތަކުގައިވާ ގޮތުން އުމުރުން 19 އަހަރުގެ ރެއިސް ސިޓީއަށް ސޮއިކޮށްފައިވަނީ ހަތަރު އަހަރާއި ހަމަސް ދުވަހުގެ އެއްބަސްވުމެއްގެ ދަށުންނެވެ.
ޑިފެންސަށް ކުޅޭ މިކުޅުންތެރިޔާވަނީ ޕަލްމެއިރާސްއަށް މިހާތަނަށް 22 މެޗުގައި ކުޅެފައެވެ. އަދި ބްރެޒިލްގެ 17 އަހަރުން ދަށުގެ ގައުމީ ޓީމަށް ނުވަ ފަހަރު ކުޅެފައެވެ.
ރެއިސް ބުނި ގޮތުގައި ސިޓީއާ ގުޅުމަކީ ހުވަފެނެއް ހަގީގަތަކަށް ވުމެވެ. އަދި ސިޓީ ފަދަ ބޮޑު ކްލަބަކަށް ކުޅުމަކީ ކުޑައިރުން ފެށިގެން ދެކެމުން އައި ހުވަފެނެއްކަމަށާއި އެފަދަ ކާމިޔާބު ތާރީޚެއް އޮތް ބޮޑު ކްލަބަކުން ފުރުސަތު ހުޅުވާލުމުން އިތުރު ތަނަކަށް ނުދެވޭނެކަން އެނގުނު ކަމަށް އޭނާ ބުންޏެވެ.
ބްރެޒިލްގެ ޑިފެންޑަރަކީ މިފަހަރުގެ ޓްރާންސްފާ ވިންޑޯގައި ސިޓީން އެޓީމަށް ސޮއިކުރި ދެވަނަ ކުޅުންތެރިޔާއެވެ. ސިޓީން ވަނީ ފްރެންޗް ލީގު އާންގެ ލޯންސްއަށް ކުޅެމުންދިޔަ އުޒްބަކިސްތާންގެ ޑިފެންޑާ އަބްދުއްކާދިރު ހުސަނޯވް އެޓީމަށް ގެންގޮސްފައެވެ. ސިޓީން ހުސަނޯވްވެސް އެޓީމަށް ގެންގޮސްފައިވަނީ 2029ވަނަ އަހަރުގެ ނިޔަލަށެވެ.
އުމުރުން 20 އަހަރުގެ ހުސަނޯވް އެޓީމަށް ސޮއިކޮށްފައިވަނީ 33.6 މިލިއަން ޕައުންޑްގެ އަގަކަށެވެ. ހުސަނޯވްވަނީ މިސީޒަންގައި މިހާތަނަށް ލޯންސްއަށް 16 މެޗު ކުޅެފައެވެ. އަދި އުޒްބަކިސްތާންގެ ގައުމީ ޓީމަށް 18 ފަހަރު ކުޅެފައެވެ.
މިއާއެކު ހުސަނޯވް ވާނީ ޕްރިމިއާ ލީގުގައި ކުޅޭ އުޒްބަކިސްތާންގެ ފުރަތަމަ ކުޅުންތެރިޔާ އަށެވެ.
ސިޓީން މިދެ ކުޅުންތެރިން ހޯދާފައިވަނީ މިފަހަރުގެ ސީޒަންގެ ވަކި ހިސާބަކުން ސިޓީއަށް ކުރިމަތިވި އަޑިގަނޑުން އަރައިގަތުމަށްޓަކައި އެޓީމު ވަރުގަދަ ކުރުމަށް ކޯޗު ޕެޕް ގާޑިއޯލާ ކުރަމުންދާ މަސައްކަތުގެ ދަށުންނެވެ.