އިންގްލިޝް ޕްރިމިއާ ލީގުގައި ޗެލްސީ އާއި ވުލްވަހެމްޕްޓަން ވޮންޑަރާސް ބައްދަލުކުރި މެޗު ޗެލްސީން ކާމިޔާބުކޮށް ތާވަލްގެ ހަތަރު ވަނައަށް ކުރިއަށް ޖެހިލައިފިއެވެ.
ޗެލްސީގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ތިން ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައި ވަނީ ޗެލްސީންނެވެ.
މިމެޗުގެ ފުރަތަމަ ލަނޑު މެޗުގެ 24ވަނަ މިނެޓުގައި ޖަހާ ލީޑު ނަގައިފާ ވަނީ ޗެލްސީންނެވެ. މިލަނޑު އެޓީމަށް ކާމިޔާބު ކޮށްދިނީ ޓޮސިން އަޑަރަބިއޮޔޯއެވެ. އެންމެ ފުރަތަމަ އޮފް ސައިޑް ކަމަށް ދެއްކި މިލަނޑު ބަލައިގެންފައިވަނީ ވީއޭއާރުން ބެލުމަށްފަހުއެވެ. މިމެޗުގެ ފުރަތަމަ ހާފު އެއް ލަނޑު ސުން ލަނޑުން ޗެލްސީ ކުރީގައި އޮވެގެން ނިމެން ދަނިކޮށް މެޗުގެ ނަތީޖާ ވުލްވްސްއަށް އެއްވަރު ކޮށްދިނީ އިތުރު ވަގުުތުގެ ފަސްވަނަ މިނެޓުގައި ޗެލްސީގެ ކީޕާ ރޮބަޓް ސަންޗޭޒްއަށް ހެދުނު ގޯހެއްގެ ފައިދާ ނަގައި މެޓް ޑޮހެޓީއެވެ.
މިމެޗުގައި ޗެލްސީން ކާމިޔާބުކުރި ދެވަނަ ލަނޑު މެޗުގެ 60ވަނަ މިނެޓުގައި އެޓީމަށް ކާމިޔާބު ކޮށްދިނީ މާކް ކުކުރެޔާއެވެ. މިއީ އޭނާ ޕްރިމިއާ ލީގުގައި ކުޅުނު 100ވަނަ މެޗު ކަމުން މިލަނޑުގެ މުހިންމުކަން އޭނާއަށް އިތުރު ވެގެންދިޔައެވެ. އަދި މިލަނޑު ޖެހިތާ ފަސް މިނެޓް ފަހުން ޗެލްސީގެ ފަހު ލަނޑު އެޓީމަށް ކާމިޔާބު ކޮށްދިނީ ނޯނީ މަޑުއެކާއެވެ.
މިކާމިޔާބީ ޗެލްސީއަށް ހާސިލް ވެފައިމިވަނީ އެންމެ ފަހުން ޕްރިމިއާ ލިގުގައި ކުޅުނު ފަސް މެޗުން ވެސް މޮޅު ނުވެވިއޮތުމަށްފަހުއެވެ. މިކާމިޔާބީއާއެކު ޗެލްސީ މިހާރު އުޅެނީ ކުޅުނު 22 މެޗުން ލިބިފައިވާ 40 ޕޮއިންޓާއެކު ތާވަލްގެ ހަތަރު ވަނައިގައެވެ. އަދި ވުލްވްސް އުޅެނީ 16 ޕޮއިންޓާއެކު ތާވަލްގެ 17 ވަނައިގައެވެ.