ރަސްމީ ދަތުރުފުޅެއްގައި ރ. އަތޮޅުގެ 10 ރަށަކަށް ރައީސް ޑރ. މުޙައްމަދު މުއިއްޒު މިއަދު ފުރާވަޑައިގެންފިއެވެ.
ރައީސް އޮފީހުން ބުނީ، އެމަނިކުފާނުގެ މި ދަތުރުފުޅުގައި އެ އަތޮޅު، އަނގޮޅިތީމު، ހުޅުދުއްފާރު، އިންނަމާދޫ، ކިނޮޅަސް، މާކުރަތު، މަޑުއްވަރި، ފައިނު، ރަސްގެތީމު، ރަސްމާދޫގެ އިތުރުން އުނގޫފާރަށް ވަޑައިގަންނަވާނެ ކަމަށެވެ.
ތިން ދުވަހުގެ މި ދަތުރުފުޅުގައި އެ ރަށްތަކުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި ރަށުގެ މުއައްސަސާތަކުގެ އިސްވެރިންނާ ބައްދަލުކުރައްވާނެ ކަމަށް ރައީސް އޮފީހުން ބުންޏެވެ. އަދި އެ ރަށްރަށުގެ ތަރައްޤީއަށް ބޭނުންވާ ކަންކަމާއި ރައްޔިތުން އެންމެ އެދޭކަންކަމާ ގުޅޭގޮތުން އެ ފަރާތްތަކާ މަޝްވަރާ ކުރައްވާނެ ކަމަށް ވެސް ބުނެފައިވެއެވެ.
މި ދަތުރުފުޅުގައި އެކި ރަށްރަށުގެ ތަރައްޤީއަށް ކުރިއަށްގެންދާ މަޝްރޫޢުތައް ފައްޓަވައިދެއްވުމާއި، ބައެއް ރަށްރަށުގައި ޤާއިމުކޮށް ނިމިފައިވާ ޚިދުމަތްތައް އިފުތިތާހުކޮށްދެއްވުމަށް ހަމަޖެހިފައިވާ ކަމަށް ވެސް ރައީސް އޮފީހުން ބުންޏެވެ.
އެ މަނިކުފާނުގެ މި ދަތުރުފުޅު ނިންމަވާލައްވައި، މާލެ ވަޑައިގެންނެވުމަށް ހަމަޖެހިފައިވަނީ އަންނަ ބުރާސްފަތި ދުވަހުކަމަށް އެ އޮފީހުން ބުނެއެވެ.
ވެރިކަމަށް ވަޑައިގަތުމަށް ފަހު ރައީސް މުއިއްޒު ގެންދަވަނީ ރާއްޖޭގެ ހުރިހާ ރަށެއްގެ ހާލަތު ބެއްލެވުމަށް ރަށްތަކަށް ދަތުރުފުޅު ކުރައްވަމުންނެވެ.
މި ދަތުރުފުޅުގެ ތެރެއިން މިހާރު އެ މަނިކުފާނަށް ވަޑައިނުގެންނެވި އޮތީ ވަރަށް މަދު ރަށަކަށެވެ.