ދުނިޔޭގައި ސުލްހަ ގާއިމުކުރުމަށް ޓަކައި ރާއްޖެއިން އެމެރިކާއާ ގުޅިގެން މަސައްކަތް ކުރަން ތައްޔާރަށް އޮތް ކަމަށް، ރައީސް ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ.
ރައީސް ޑޮނަލްޑް ޓްރަމްޕް މިއަދު ވަނީ އެމެރިކާގެ 47 ވަނަ ރައީސްގެ ގޮތުގައި، ދެވަނަ ދައުރަކަށް ހުވާ ކުރައްވައިފައެވެ.
އެމެރިކާގެ ރައީސަށް މަރުހަބާ ވިދާޅުވެ ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ އެ މަނިކުފާނު ވެރިކަމާ ހަވާލުވެވަޑައިގަންނަވަނީ ދުނިޔޭގައި ވަރަށް ބޮޑަށް ނުތަނަވަސްކަން އުފެދިފައިވާ ދަނޑިވަޅެއްގައި ކަމަށެވެ. އެހެންވެ، މި ހާލަތާ ކުރިމަތިލެއްވުމަށް ރައީސްގެ ހިކުމަތާއި ހުޝިޔާރު ކަމަށް އެދިވަޑައިގަންނަވާ ކަމަށް ރައީސް މުއިއްޒު ވިދާޅުވިއެވެ.
މީގެ އިތުރުން ދެ ގައުމުން ވެސް ހާސިލުކުރަން ބޭނުންވާ ލަނޑުދަނޑިތައް ހާސިލުކުރުމަށް ޓަކައި، ރާއްޖެއިން އޮތީ އާ ސަރުކާރާއެކު މަސައްކަތް ކުރަން ތައްޔާރަށް ކަމަށް ރައީސް ވިދާޅުވިއެވެ. އޭގެ ތެރޭގައި ދުނިޔޭގެ ސުލްހައަށް ޓަކައި މަސައްކަތް ކުރުމާއި ދެ ގައުމުގެ ޒަމާންވީ ގުޅުން ވަރުގަދަ ކުރުން ހިމެނޭ ކަމަށް އެ މަނިކުފާނު ފާހަގަކުރެއްވިއެވެ.
ރައީސް އޮފީހުން ބުނި ގޮތުގައި ރައީސް ވަނީ، ރައީސް ޓްރަމްޕަށް ތަހުނިޔާގެ މެސެޖެއް ފޮނުއްވައިފައެވެ. އެ މެސެޖުގައި އެ މަނިކުފާނު ވަނީ، މި އަހަރަކީ އެމެރިކާއާއި ދިވެހިރާއްޖެއާ ދެމެދު ސިޔާސީ ގުޅުން ގާއިމުކުރިތާ 60 އަހަރު ފުރޭ އަހަރު ކަމަށާއި މިއީ ދެ ގައުމުގެ މެދުގައި އޮތް ގާތް ހަރުދަނާ ގުޅުން ރަމްޒުކޮށްދޭ ކާމިޔާބީއެއްގެ ގޮތުގައި ފާހަގަކުރައްވައިފައި ކަމަށް ރައީސް އޮފީހުން ބުންޏެވެ.
މީގެ ކުރިން 2017އިން 2021އަށް ވެރިކަން ކުރެއްވި ރައީސް ޓްރަމްޕް، މިދިޔަ އަހަރުގެ ނޮވެމްބަރު ފަހެއްގައި އޮތް ރިޔާސީ އިންތިޚާބު ކާމިޔާބު ކުރެއްވީ ނިމިދިޔަ ވެރިކަމުގައި ނައިބު ރައީސްކަން ކުރެއްވި ކަމަލާ ހެރިސްއާ ވާދަކުރައްވައެވެ.
އެ އިންތިޚާބުގައި ޑިމޮކްރެޓިކް ޕާޓީން ފުރަތަމަ ވާދަކުރައްވަން ނުކުންނެވީ ރައީސް ޖޯ ބައިޑެން ނަމަވެސް، ސިއްހީ ހާލުކޮޅު ހުރި ގޮތުން ރިޔާސީ ރޭހުން ވަކިވެވަޑައިގަތީއެވެ.