ސްޕެނިޝް ލަލީގާގައި އެންމެ ފަހުގެ ޗެމްޕިއަން ރެއާލް މެޑްރިޑުން ލާސް ޕާލްމާސް ބަލިކޮށް ތާވަލްގެ އެއްވަނައަށް ކުރިއަށް ޖެހިލައިފިއެވެ.
ރެއާލްގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ހަތަރު ލަނޑު އެއް ލަނޑުންނެވެ. ނަމަވެސް މިމެޗުގެ ފެށުން ދިޔައީ ރެއާލް އިން އެންމެ ބޭނުންވި ގޮތަކަށް ނޫނެވެ. މިގޮތުން ލާސް ޕާލްމާސްއިން ވަނީ މެޗުގެ ފުރަތަަމަ މިނެޓުގައި ލަނޑެއް ޖަހާ މެޗުގެ ލީޑު ނަގާ މުޅި ދަނޑަށް ސިހުން ގެނުވާފައެވެ.
މިލަނޑު އެޓީމަށް ކާމިޔާބު ކޮށްދިނީ ފަބިއޯ ސިލްވާއެވެ. މިމެޗުގައި ރެއާލްގެ ފުރަތަމަ ލަނޑު ޖަހާ މެޗުގެ ނަތީޖާ ހަމަހަމަ ކޮށްފައިވަނީ މެޗުގެ 18ވަނަ މިނެޓުގައި ލިބުނު ޕެނަލްޓީ އަކުންނެވެ. މިޕެނަލްޓީ ކާމިޔާބު ކޮށްދިނީ ކިލިއަމް އެމްބާޕޭއެވެ. އަދި މެޗުގެ 33ވަނަ މިނެޓުގައި މިމެޗުގެ ލީޑު ރެއާލަށް ނަގައިދިނީ ބްރަހީމް ޑިއާޒްއެވެ.
މިލަނޑު ޖެހިތާ ތިން މިނެޓް ފަހުން ރެއާލްގެ ތިންވަނަ ލަނޑު އެޓީމަށް ކާމިޔާބު ކޮށްދިނީ ފުރަތަމަ ލަނޑު ވެސް ކާމިޔާބު ކޮށްދިން އެމްބާޕޭއެވެ. މިމެޗުގައި ރެއާލްގެ ފަހު ލަނޑު މެޗުގެ 57ވަނަ މިނެޓުގައި އެޓީމަށް ކާމިޔާބު ކޮށްދިނީ ރޮޑްރިގޯއެވެ. މިމެޗުގައި ލާސް ޕާލްމާސްއިން ކުރަމުންދިޔަ މަސައްކަތަށް އިތުރަށް ހުރަސް އެޅިގެން ދިޔައީ މެޗުގެ 64ވަަނަ މިނެޓުގައި އެޓީމުގެ ބަދަލު ކުޅުންތެރިޔާ ބެނީޓޯ ރަމިރޭޒް ރެއާލްގެ ލޫކަސް ވަޒްކޭޒްއަށް ކުރި ފައުލެއް ވީއޭއާރުން ބެލުމަށްފަހު އޭނާއަށް ދެއްކި ރީނދޫ ކާޑު ރަތް ކާޑަކަށް ބަދަލުކުރުމުންނެވެ. މިއާއެކު އެޓީމުން މެޗުގެ ބާކީ ބައި ކުޅެފައި ވަނީ އެއް ކުޅުންތެރިއެއް މަދުކޮށެވެ.
މިކާމިޔާބީއާއެކު ރެއާލް މިހާރު އުޅެނީ 20 މެޗުން ލިބިފައިވާ 46 ޕޮއިންޓާއެކު ތާވަލްގެ އެއްވަނައިގައެވެ. ރެއާލް ތާވަލުގެ އެއްވަނައަށް ދިއުމުގައި އެންމެ ބޮޑު ދައުރެއް އަދާކުރީ ކުރިން ތާވަލްގެ އެއްވަނައިގައި ކުރިން އޮތް އެޓްލެޓިކޯ މެޑްރިޑް ލެގާނެސްއާ ބައްދަލުކުރި މެޗުން އެއް ލަނޑު ސުން ލަނޑުން ބަލިވުމެވެ. އެ ނާކާމިޔާބީއާއެކު އެތްލެޓިކޯ އުޅެނީ 44 ޕޮއިންޓްގައެވެ. އަދި ލާސް ޕާލްމާސް ރެއާލް އަތުން ބަލިވުމުން އުޅެނީ 22 ޕޮއިންޓާއެކު ތާވަލްގެ 14 ވަނައިގައެވެ.