އެމެރިކާގައި ޓިކްޓޮކް މަނާކުރުމުގެ މުއްދަތު 90 ދުވަހަށް އިތުރުކުރުމަށް ވިސްނަވާކަމަށް އެމެރިކާގެ އިންތިޚާބީ ރައީސް ޑޮނާލްޑް ޓްރަމްޕް ވިދާޅުވެއްޖެއެވެ.
ޓްރަމްޕް ވިދާޅުވެފައި ވަނީ ޗައިނާގެ ކުންފުންޏެއްކަމަށްވާ ބައިޓްޑާންސްއަށް ޓިކްޓޮކްގެ އެމެރިކާގެ ހިންގުން ވިއްކާލުމަށް ދީފައިވާ މުއްދަތު 90 ދުވަހަށް އިތުރުކުރެއްވުމަށް ވިސްނަވާކަމަށެވެ.
އެންބީސީ ނިއުސްއަށް ދެއްވި ފޯނު އިންޓަވިއުއެއްގައި ޓްރަމްޕް ވިދާޅުވީ މި މުއްދަތު އިތުރުކުރެއްވުމަކީ "އެންމެ އެކަށީގެންވާ" ކަމެއް ކަމަށާއި، އެކަން ނިންމަވައިފިނަމަ ހޯމަ ދުވަހު އިއުލާނު ކުރައްވާނެ ކަމަށެވެ.
ފާއިތުވި އަހަރު ފާސްކުރެވުނު ޤާނޫނުގެ ދަށުން ބައިޓްޑާންސްއިން 19 ޖަނަވަރީގެ ކުރިން އެމެރިކާއަށް ޓިކްޓޮކްގެ ހިންގުން ވިއްކާލަން ޖެހެއެވެ. އެނޫންނަމަ އެމެރިކާގައި ޓިކްޓޮކް ބޭނުންކުރުން މަނާވާނެއެވެ.
ޕަރްޕްލެކްސިޓީ އޭއައި އިން ވަނީ ބައިޓްޑާންސްއަށް އައު ހުށަހެޅުމެއް ހުށަހަޅާފައެވެ. މި ހުށަހެޅުމުގެ ދަށުން އެ ކުންފުނިން ޓިކްޓޮކްގެ އެމެރިކާގެ ވިޔަފާރިއާއެކު އެއްވެގެންދާނެއެވެ. މީގެ އިތުރުން "ޝާކް ޓޭންކް"ގެ ކެވިން އޯލިއަރީ އާއި ބިލިއަނާ ފްރޭންކް މެކޯޓް ވެސް ވަނީ 20 ބިލިއަން ޑޮލަރުގެ ހުށަހެޅުމެއް ހުށަހަޅުއްވާފައެވެ.
އެމެރިކާގައި 170 މިލިއަނަށްވުރެ ގިނަ މީހުން ބޭނުންކުރާ ޓިކްޓޮކްގެ މުސްތަޤުބަލާމެދު މިވަގުތު ޔަޤީންކަމެއް ނެތެވެ.