މައިކްރޯސޮފްޓުން އެ ކުންފުނީގެ މައިކްރޯސޮފްޓް 365 ގައި ކޯޕައިލެޓް ހިމަނަން ނިންމައިފިއެވެ.
މައިކްރޯސޮފްޓުން އިއުލާނުކުރި ގޮތުގައި ކުންފުނިތަކަށް އޭއައި އޭޖެންޓުތައް ތައާރަފުކުރުމަށް ފަހު، އާންމު ފަރުދުންނަށް ބޭނުންކުރެވޭ މައިކްރޯސޮފްޓް 365 ގައި ކޯޕައިލެޓްގެ އޭއައި ފީޗާތައް ހިމަނާނެއެވެ.
މިގޮތުން ކަސްޓަމަރުންނަށް ކޯޕައިލެޓް އޭއައި ފީޗާތައް ހިމެނޭ ސަބްސްކްރިޕްޝަން ޕްލޭނެއް ނުވަތަ އެ ފީޗާތައް ނުހިމެނޭ ޕްލޭނެއް އިޚުތިޔާރު ކުރެވޭނެއެވެ.
ވޯޑް، ޕަވާޕޮއިންޓް، އެކްސެލް، އައުޓްލުކް، ވަން ނޯޓް އަދި ޑިޒައިނާ ފަދަ މައިކްރޯސޮފްޓް 365 ސުއިޓްގެ އެޕްލިކޭޝަންތަކުގައި ކޯޕައިލެޓް ބޭނުންކުރެވޭނެއެވެ. އޭގެ އިތުރުން އޭއައި ބޭނުންކުރުން މަހަކަށް ކަނޑައެޅިފައިވާ ކްރެޑިޓްތަކަކަށް ހަނިކުރެވޭނެ ކަމަށާއި، ގިނަ ޔޫޒަރުންނަށް މި ކްރެޑިޓްތައް ފުދޭނެކަމަށް މައިކްރޯސޮފްޓުން ބުނެފައިވެއެވެ.
އިމްތިހާނުތަކާއި އެސައިންމަންޓްތައް ފަދަ ތަޢުލީމީ ބޭނުންތަކުގައި އޭއައި އެހީ ބޭނުންނުވާ ހާލަތްތަކުގައި ކޯޕައިލެޓް އެކްޓިވް ނުވަތަ ޑީއެކްޓިވްކުރުމުގެ އިޚުތިޔާރު ވެސް ޔޫޒަރުންނަށް ލިބޭނެއެވެ. ޔޫޒަރުންގެ ޕްރޮމްޕްޓްތައް މައިކްރޯސޮފްޓްގެ މޮޑެލްތައް ތަމުރީނުކުރަން ބޭނުންނުކުރެވޭނެ ކަމަށް އެ ކުންފުނިން ބުނެފައިވެއެވެ.
މައިކްރޯސޮފްޓުން މިހާރު ވަނީ އޯޕަންއޭއައިގައި އިންވެސްޓްކޮށް، އަދި މި މާލީ އަހަރުގައި ޑޭޓާ ސެންޓަރުތަކާއި އޭއައި އިންފްރާސްޓްރަކްޗާއަށް 80 ބިލިއަން ޑޮލަރު ހޭދަކުރުމަށް ރާވާފައެވެ.
އާ އަޕްޑޭޓާ އެކު މައިކްރޯސޮފްޓް 365 ބޭނުންކުރާ ފަރާތްތަކަށް ކޯޕައިލެޓްގެ އެހީއާ އެކު ލިޔެކިޔުންތައް ތައްޔާރުކުރުމާއި، ޕްރެޒެންޓޭޝަންތައް ހެދުމާއި، ޑޭޓާ އެނަލައިޒްކުރުމުގެ މަސައްކަތް ފަސޭހަކަމާ އެކު ކުރެވޭނެކަމަށް މައިކްރޯސޮފްޓުން ބުނެފައިވެއެވެ.
މިއީ އޮފީސް މަސައްކަތްތަކުގައި އާންމުންނަށް އޭއައިގެ ބޭނުން ހިފުމަށް ލިބޭ މުހިންމު ފުރުސަތެއްކަމަށް ޓެކްނޮލޮޖީ ދާއިރާގެ މާހިރުން ފާހަގަކުރެއެވެ.