އާ ރޮކެޓް ދަތުރަކާއެކު ބެޒޯސް އާއި މަސްކްގެ ވާދަވެރިކަން އިތުރުވެއްޖެ

އެމެޒޯން ކުންފުނީގެ ބާނީ ޖެފް ބެޒޯސްގެ ސްޕޭސް ކުންފުނިން އުދުއްސާލި އާ ރޮކެޓް ދަތުރަކާއެކު ބެޒޯސް އާއި މަސްކްގެ ވާދަވެރިކަން އިތުރުވެއްޖެއެވެ.

ބެޒޯސްގެ ބްލޫ އޮރިޖިން އިން ފުރަތަމަ ފަހަރަށް "ނިއު ގްލެން" ރޮކެޓެއް ޖައްވަށް ފޮނުވާލައިފާވާއިރު، މިއަދު ފްލޯރިޑާގެ ކޭޕް ކެނަވަރަލް ސްޕޭސް ފޯސް ސްޓޭޝަނުން ކުރި މިދަތުރަކީ އިލޯން މަސްކްގެ ސްޕޭސްއެކްސް އާ ވާދަކުރުމަށް އެޅުނު މުހިންމު ފިޔަވަޅެކެވެ.

އުސްމިނުގައި 98 މީޓަރު ހުރި މިރޮކެޓަކީ ސްޕޭސްއެކްސްގެ އެންމެ އާންމުކޮށް ބޭނުންކުރާ ފާލްކަން 9 ރޮކެޓަށްވުރެ ވަރުގަދަ އަދި ގިނަ ސެޓެލައިޓް އުފުލޭނެ ރޮކެޓެކެވެ. ބެޒޯސް ގަސްދުކުރަނީ މިރޮކެޓް މެދުވެރިކޮށް "ޕްރޮޖެކްޓް ކުއިޕާ" ގެ ދަށުން އިންޓަނެޓް ޚިދުމަތް ފޯރުކޮށްދިނުމަށް އެތައް ހާސް ސެޓެލައިޓްތަކެއް ޖައްވަށް ފޮނުވުމެވެ. މިއީ މަސްކްގެ ސްޓާލިންކް ޚިދުމަތާ ސީދާ ވާދަކުރާނެ މަޝްރޫޢެކެވެ.

ނަމަވެސް، މިދަތުރުގައި ރޮކެޓްގެ މައި އިންޖީނު އަނބުރާ ބިމަށް ގެނައުމަށް ކުރި މަސައްކަތް ނާކާމިޔާބުވިއެވެ. އެޓްލާންޓިކް ކަނޑުގައި ބެހެއްޓި ޕްލެޓްފޯމަށް އިންޖީން ނުގެނެވުނު ނަމަވެސް، މިދަތުރަކީ ބްލޫ އޮރިޖިންގެ ބޮޑު ކުރިއެރުމެއް ކަމުގައި ބެލެވެއެވެ.

މިދާއިރާގެ މާހިރުން ބުނާގޮތުގައި ނިއު ގްލެން ރޮކެޓްގެ ކާމިޔާބު ދަތުރާއެކު ދެ ކުންފުނީގެ ވާދަވެރިކަން އިތުރުވެ، ބޭރު ޖައްވަށް ކުރާ ދަތުރުތަކުގެ އަގު ތިރިވުމަށް މަގުފަހިވާނެއެވެ. މީގެ ކުރިން މިފަދަ ދަތުރުތައް ކުރުމަށް ސަރުކާރުތަކުން ބިލިއަން ޑޮލަރު ޚަރަދުކުރަން ޖެހުނެވެ.

ނާސާއިން މިހާރު އަމިއްލަ ފަރާތްތަކާއެކު ވެވޭ އެއްބަސްވުންތަކުގެ ދަށުން ރޮކެޓް އަދި އެހެނިހެން ޚިދުމަތްތައް ހޯދަމުންދާއިރު، ސްޕޭސްއެކްސްއަށް މިހާރުވެސް ވަނީ ބިލިއަން ޑޮލަރުގެ ކޮންޓްރެކްޓްތައް ލިބިފައެވެ.

ބޭރު ޖައްވަށް ރޮކެޓް ދަތުރުތައް ފެށިގެން އައީ ސަރުކާރުތަކުގެ އިސްނެގުމުގެ ދަށުންނެވެ. ނަމަވެސް މިހާރު މިދާއިރާގައި އަމިއްލަ ކުންފުނިތަކުގެ ދައުރު އިތުރުވަމުންދެއެވެ.

ޖެފް ބެޒޯސް 2000ވަނަ އަހަރު ބްލޫ އޮރިޖިން އުފެއްދި އިރު، އިލޯން މަސްކް 2002ވަނަ އަހަރު ސްޕޭސްއެކްސް އުފެއްދިއެވެ.

މިދެ ކުންފުނިން މިހާރު ވާދަކުރަމުންދަނީ ރޮކެޓް ދަތުރުތަކުގެ އިތުރުން، އިންޓަނެޓް ޚިދުމަތް ފޯރުކޮށްދިނުމަށް ކުރާ މަސައްކަތުގައެވެ.

މަސްކްގެ ސްޓާލިންކް ޚިދުމަތް މިހާރުވެސް ދުނިޔޭގެ އެކި ކަންކޮޅުތަކުގައި ލިބެން ހުރިއިރު، ބެޒޯސްގެ ޕްރޮޖެކްޓް ކުއިޕާ އިން ވެސް އެފަދަ ޚިދުމަތެއް ތަޢާރަފުކުރުމަށް މަސައްކަތްކުރަމުންދެއެވެ.