އުފާވެރި ޙަޔާތަކީ ކޮންމެ މީހެއްގެ ވެސް އުންމީދެކެވެ. އުފާވެރިކަން އާލާކުރުމުގެ ގޮތްތަކުގެ ތެރޭގައި އިންސާނުންގެ މެދުގައި އޮންނަ ހިތުގެ ލޯބި، ދުޅަހެޔޮ ގުޅުންތަށް، ވަފާތެރިކަމާއި ފަހި ވިސްނުން ހިމެނެއެވެ. ލޯބިވުން އަދި ނަމޫނާ ދެއްކުމާއި އެކު ހިތުން އެކަކު އަނެކަކަށް އަޅާލުމުން އުފެދޭ ލޯބީގެ ޖާދޫ ހިމެނެއެވެ. އުޑަށް ބެލުންފަދަ ޤުދުރަތީ މާޙައުލުން ލިއްބައިދޭ އުފާވެރިކަމުގެ އިޙްސާސްފާހަގަ ކޮއްލެވެއެވެ.
"ސްމައިލް ޝިހާބް" ޕޮޑްކާސްޓު 9 ވަނަ އެޕިސޯޑު ސަން ޕޮޑްކާސްޓިންގ އިން ގެނެސްދީފައިވަނީ 2024 ނޮވެމްބަރު 30 ވަނަ ދުވަހުއެވެ." އުޑަށް" މި އެޕިސޯޑުގެ މެހެމާނެއްގެ ގޮތުގައި ބައިވެރިވެވަޑައިގަތީ ދުޅަހެޔޮ ޞިއްޙަތަށް މަގުފަހި ވާ ގޮތަށް ދިރިއުޅުން ބައްޓަން ކުރެވިގެން މީހުންނަށް ހިނިތުންވުމާއި އުފާވެރިކަން ގެނެސްދިނުމަށް މަސައްކަތްކުރައްވަމުން ގެނަދަވާތާ 20 އަހަރު ވެފައިވާ މަޝްހޫރު ފިޓްނަސް އިންސްޓްރަކްޓަރ އަލްފާޟިލާ ޢާއިޝަތު ޝިފާނާ ވަޖީހެވެ.
ޝިފާނާ ވަނީ ފިޓްނަސް، އެކްސަސައިޒް އެންޑް ހެލްތުގެ ދާއިރާއިން މަތީ ތަޢުލީމް ޙާޞިލް ކުރައްވާފައެވެ. މިހާރު ދުޅަހެޔޮ ކަސްރަތާއި މިންހެޔޮ ކާނާ ގެ ތެރެއިން ދުޅަހެޔޮ ދިރި އުޅުމަކަށް މަގު ފަހިކޮއްދިނުމަށް މަސައްކަތް ކުރައްވާ ބޭފުޅެވެ. މަޝްހޫރު "ހީޓް ހެލްތު އެންޑު ފިޓްނަސް" ގެ ފައުންޑައެވެ.
ޝިފާނާ ފާހަގަ ކުރެއްވި ގޮތުގައި ކުޑައިރުގެ ދުވަސްތަކަކީ ވަރަށް ވެސް އުފާވެރި މަޖާ ހިތްގައިމު ދުވަސްތަކެކެވެ. މަންމަ އާއި ބައްފަ އަދި ދެބެންގެ ދެދަރި ކުދިންނާއި އެކު ކުޑައިރު ކުޅުނު ކުޅިވަރުތަކާއި ގަސްގަހަށާއި ފުރާޅަށް އެރުމާއި ބޮޑު ޢާއިލާ އާއި އެކު ދިރިއުޅުނުދުވަސްތަށް އެއީ އެންމެ އުފާވެރި އިޙުސާސްތަކެއް ގުނުވާ ހަނދާންތަކެވެ.
އެހެންނަމަވެސް އުމުރުން އަށެއްކަ އަހަރުގައި ބައްޕަ އެހެންކައިވެންޏެއް ބައްލަވައިގަތުމާއި ގުޅިގެން މަންމަ ކުރެއްވި ހިތާމަ ފެނުމަކީ ކުޑައިރުގެ ހިތްދަތި ހަނދާން ތަކެއްކަން ފާހަގަ ކުރެއްވިއެވެ. މަންމަ އާއި ބައްޕަ ވަކި ވުމުން ދަރިންނަށް ކުރާ ފުންހިތްދަތި އަސަރު ތަޖުރިބާ ކުރެއްވިއެވެ. އެއީ ބުނެދޭން ދަތި ފުން އިޙުސާސެއްކަން ވިދާޅުވިއެވެ. މައިން ބަފައިންގެ ހަމަ ނުޖެހުމާއި މައްސަލަތަކުގެ ތެރޭގައި އުޅެން ޖެހުމުން ގޮތްހުސްވާ ފަހަރު އައި ކަމަށާއި އެހެންނަމަވެސް ސްކޫލުގެ ރަޙްމަތްތެރިންނާއި ޢާއިލާގެ ކުދިންގެ އެހީތެރިކަމާއި ގާތް ގުޅުމުގެ ސަބަބުން އެކަންކަމާއެކު ވެސް ކުރިޔަށް ދެވުނު ކަމަށެވެ.
ސްކޫލްގެ ތަފާތު އިތުރު ޙަރަކާތް ތަކުގައި އަވަދި ނެތި އުޅެވުމުގެ ސަބަބުން ފަސްނުޖެހި ކުރިޔަށް ދިޔުމުގެ ހުނަރު އަށަގަތް ކަމުގައިވިދާޅުވިއެވެ. ކުޑައިރު ގިނަ ހުވަފެން ތަކެއްދުއް ކަމަށާއި އެގޮތުން އެންމެ ބޮޑަށް އޭރު ބޭނުންވީ ބޮޑުވެގެން އެސްޓްރޯނޯޓަކަށް ވުމަށް ކަމަށް ވިދާޅުވިއެވެ.
ކުޑައިރުގެ ތަފާތު ތަޖްރިބާ ތަކުން ދަސްވި ފިލާވަޅަކީ ބޮޑެތި މީހުންގެ ނިންމުންތަކަކީ ކުޑަކުދިންނަށް ބާރު ފޯރުވޭ ކަމަކަށް ނުވެދާނެކަމެވެ . އަދި އެއްވެސްމީހެއްގެ ޙަޔާތަކީ އަބަދު އެއްގޮތަށް އޮންނަ އެއްޗެއްނޫން ކަމެވެ. މުހިންމު ކަމަކީ ދިމާވާ ކަންކަމާއި ކުރިމަތިލައި އެކަން ނަގާ ގޮތްކަމަށާއި އަދި އެ ކަންކަމުން އަރައި ގަތުމެވެ.
ޝިފާނާ އަކީ ކަންކަން ހޯދާ ދިރާސާކޮށް ތަޖުރިބާ ކުރަން ޝަޢުޤުވެރިވާ ބޭފުޅެންކަން އޭނާ ކުޑައިރު މަންމަވެސް ފާހަގަ ކުރައްވާފައިވާކަމުގައި ވިދާޅުވިއެވެ. ޝިފާނާގެ އޯލަވެލްހެދި އަހަރަކީ މަންމަ އާއި ބައްޕަ ފަހު ފަހަރަށް މުޅިން ވަކިވި ދުވަސްވަރުކަމަށާއި، އެ ދުވަސްވަރު ގޭތެރޭގެ މާޙައުލު އޮތީ ކިޔަވާ ކުއްޖަކަށް ފަހި ވާގޮތަށް ނޫންކަމަށް ވިދާޅުވިއެވެ.
އެހެންކަމުން ގޭގައި އުޅޭނަމަ ގިނަ ވަގުތު ހޭދަކުރެވެނީ ފުރާޅުމަތީގައިކަން ފާހަގަ ކުރެއްވިއެވެ. ކުޅުމާއި ފޮތްކިޔުމާއި ފިލާވަޅު ދަސްކުރުމުގައި ވެސް ފުރާޅަށް އަރާކަން ފާހަގަ ކުރެއްވިއެވެ. އަދި އެތާ އޮވެގެން ނޫކުލަގެ "އުޑަށް" ވަރަށް ބެލޭކަމަށާއި އެކަމުން ހިތާއި ނަފްސަން ފަސޭހަވާ ކަން އިޙްސާސްވާ ކަމަށް ވިދާޅުވިއެވެ.
މިހާރު ބޮޑުވުމުން ޔަޤީންވި އެއްޗަކީ ނޫކުލައަކީ ނަފްސަށް ފަސޭހަކުރުވާ ކުލައެއްކަމުގައެވެ. ޚާއްސަކޮން އުޑަށް ބެލުމާއި ކަނޑާއި މޫދަށް ބެލުމަކީ އިންސާނާގެ ކަންބޮޑުވުންތަކަށް ނަފްސާނީ ގޮތުންލިބޭ ޤުދުރަތީ ފަރުވާއެކެވެ. ކުޑައިރު ފުރާޅުމަތީގައި ގިނަ ވަގުތު ހޭދަކުރެވުނީ، އިންސާނުންނަކީ ތަބީޢީ ގޮތުންވެސް ދިމާވާ ކަންބޮޑުވުންތަކާ ދުރަށްދިޔުމަށް އިޚުތިޔާރަކާ ނުލާވެސް މަސައްކަތް ކުރެވޭ ބަޔަކަށް ވާތީކަމަށް ޤަބޫލުކުރެވޭތީކަމަށް ޝިފާނާ ވިދާޅުވިއެވެ.
ޤުދުރަތީ ފެހި ވެށީގައި ދުވާލަކު ބައި ގަޑިއެއްހާއިރު ހޭދަކޮއްލުމަކީ ނަފްސާނީ ދުޅަހެޔޮކަން އިތުރުވާކަމެއްކަމުގައި ފާހަގަ ކުރެއްވިއެވެ.އަދި ހިތާ ނަފްސަށް ތާޒާ ކަމާއި އަރާމް ލިއްބައިދޭ ކަމެއްކަން ފާހަގަ ކުރެއްވިއެވެ
މިހާރުގެ ޝިފާނާ އަށް ވުމަށް މެދުވެރިވި ސަބަބު ބަޔާންކޮއްދެއްވަމުން ޝިފާނާ ވިދާޅުވީ އެއީ ލިބުނު ތަޖުރިބާތަކުގެ އަލީގައި ފަސްނުޖެހި ކުރިޔަށް ދިޔުންކަމަށެވެ. ގޮންޖެހުންތަކާއި ކުރިމަތިލާ އެކަންކަމުން އަރައިގަނެގެން ކެރިގެން ކުރިޔަށްދިޔުމަށް ކުރި މަސައްކަތުގެ ފޮނި ނަތީޖާ ކަމުގައި ވިދާޅުވިއެވެ.
ސްކޫލްދައުރުގެ އުފާވެރި ހަނދާންތަކުގެ ތެރޭގައި އަމީނިއްޔާސްކޫލްގައި އެކުގައި އުޅުނު ރަޙްމަތްތެރިންގެ ބަދަހި އެކުވެރި ލޯބިވެތި ގުޅުން ޝިފާނާ ފާހަގަ ކުރެއްވިއެވެ. ގިނަ ތަފާތު އިތުރު ޙަރަކާތް ތަކުގެ ތެރޭގައި އިސްނަގައި ޙަރަކާތްތެރިވިކަން ފާހަގަ ކުރެއްވިއެވެ.އެކުގައި ކުރެވުނު ލާނެތް ކަންތައް ތަކާއި ގެއްލުން ނުވާގޮތަށް ރައްޓެހިނަށް ލަނޑުދިނުންފަދަ މަޖާ ކަންތައް ތަކަކީ އުފާވެރި ހަނދާން ތަކެއްކަން ފާހަގަ ކުރެއްވިއެވެ.
ޓީޗަރުންގެ ތެރެއިން ނާއިލާ އިބްރާހިމް ކަލޭފާނު ބެހެއްޓެވި ގާތްކަން ލޯތްބާއި އެކު ފާހަގަ ކުރެއްވި އެވެ. " އޭރު ޓީޗަރުންވެސް އިންޓަވަލްގަޑީގައި އަޅުގަނޑުމެން ކަރުދާހުން ބޯޅަ ހަދައިގެން ކުޅެނިކޮން އަންނާނެ ، އަޅުގަނޑުމެނާއި އެކު މަޖާ ކޮން ހައްދަވާނެ " ސްކޫލް ދަޢުރުގެ އުފާވެރި ހަނދާންތަށް ހިއްސާ ކުރައްވަމުން ޝިފާނާ ވިދާޅުވިއެވެ.
ފުރާވަރު އުމުރުފުރާއަށް އެޅުމުން މައިން ބަފައިންގެ ނިންމުންތަކަށް ބާރު ނު ފޯރުވުނު ކަމުގައި ވިޔަސް އަމިއްލަ ނަފްސަށް އުފާވެރިކަން ބޭނުންވާކަމުގެ އިޙުސާސް ކުރެވުނުކަން ޝިފާނާ ފާހަގަ ކުރެއްވިއެވެ. ބޭނުންވާ ލަނޑު ދަނޑި ތަށް ޙާސިލް ކުރުމަން ބޭނުންވިއެވެ. ތަފާތު ކުޅިވަރުތަކުގައި ޙަރަކާތްތެރި ވެވުނު އެއްސަބަބަކީ އެއީ ކަމުގައި ފާހަގަ ކުރެވުނެވެ. މިހާރުވެސް ކިޔެވި ސްކޫލަށް ވަދެލީމަ ވަރަށް އުފާވެރި އިޙުސާސެއް ލިބިގެންދާ ކަމުގައި އުފަލާއިއެކު ފާހަގަ ކުރެއްވިއެވެ.
ސްކޫލްދަރިވަރުންނަށް ހެލިފެލިވެ އުޅުމާއި ޙަރަކާތްތެރި ދިރިއުޅުމަކަށް މަގު ފަހިވެފައި އޮތުމަކީ ނުހަނު މުހިންމު ކަމެއްކަން ސައިންޓިފިކް ރިސާރޗްތަކުންވެސް އަދި ޑަބްލިޔު އެޗް އޯގެ ގައިޑްލައިން ތަކުންވެސް ދައްކާ ކަމުގައި ޝިފާނާ ފާހަގަ ކުރެއްވި އެވެ. އެ ގޮތުން ފަސް އަހަރާއި ސަތާރަ އަހަރާއި ދެމެދުގެ ކުދިން ދުޅަހެޔޮ ސިއްޙަތެއްގައި ބޮޑުވުމުގެ ފުރުޞަތު މިއޮންނަނީ މަދުވެގެން ދުވާލަކު އެއްގަޑިއިރު ދާހިއްލާވަރަށް ޙަރަކާތްތެރި ވެވިގެންކަން ފާހަގަ ކުރެއްވިއެވެ. އެގޮތުން ދުވުން ފުމުންފަދަ ޖިސްމާނީ ޙަރަކާތްތަށް ބޭނުންވާކަމަށް ވިދާޅުވިއެވެ.
ނަފްސާނީ ދުޅަހެޔޮކަމަށް ކުދިން އަހުލުވެރިކުރުމަކީ ވެސް އެހާމެ ބޭނުންތެރި ކަމެއްކަން ފާހަގަ ކުރައްވައި ވިދާޅުވީ އުފާވެރިކަމުގެ ހޯމޯން އުފެއްދުމަށްޓަކައި ޙަރަކާތްތެރިވެ އުޅުން ކޮންމެހެންވެސް ބޭނުންވާ ކަމުގައެވެ.އޭގެ އިތުރުން މައްސަލަތަކުން އަރައި ގަތުމާއި އަމިއްލަނަފްސައް އިތުބާރު ކުރުންފަދަ ސިފަތަށް ޙަރަކާތްތެރި ކުދިންގެ ކިބާގައި އިތުރުވާނެ ކަން ޢިލްމީދިރާސާގެ އަލީގައި ވިދާޅުވިއެވެ.
މާލެ ސަރަހައްދުގައި ދިރި އުޅޭ ކުދިންނަށް ޙަރަކާތްތެރި ދިރިއުޅުމަކަށް ފުރުޞަތު ހަނިކަން ފާހަގަ ކުރައްވާ ވިދާޅުވީ އަތޮޅުތެރޭގައި ދިރި އުޅޭކުދިންނަށް އެ ފުތުޞަތު އަދިވެސް އޮތްކަމުގައެވެ.ކަން މިހެން އޮތްކަމުގައި ވިޔަސް ކިޔެވުމަށް ބޭނުންވާ ތޫނުފިލި ކަމާއި ހަކަތަ އުފެދޭނީ ސިކުނޑީގެ ދުޅަހެޔޮކަމަށްވެސް ޖާގަދެވިގެންކަން ފާހަގަ ކުރެއްވިއެވެ. އެކަން ފަހި ވާނީ ޙަރަކާތްތެރި ދިރިއުޅުމަކުން ކަން ޝިފާނާ ސާފުކޮއް ދެއްވިއެވެ.
ހަށިގަނޑުގެ ބާރު ދެމެހެއްޓުމަށްޓަކައި ކަސްރަތާއި، ރަނގަޅު މިންހެޔޮ ކާނާކެއުމާއި ކަންބޮޑުވުންތަކާ ދުރުހެލިވެ އަދި ބޭނުންވާ ވަރަށް ހަމަނިދި ހޯދުމާއި އަރާމްލިއްބައިދޭ ގޮތަށް ދިރި އުޅުމުގެ ވަށްޓަފާޅި ގެންގުޅެންޖެހޭކަން ޝިފާނާ ފާހަގަ ކުރެއްވިއެވެ.
އިރު ހަނދު ދަޢުރުވުމާއި އިންސާނާގެ ހޯމޯންތަކަށް އަންނަ ބަދަލުތަކާއި އޮންނަނީ ވަރަށް ބޮޑަށް ގުޅިފައިކަން ފާހަގަ ކުރެއްވިއެވެ. ސްޓަރެސްހޯމޯން ހަށިގަނޑުގައި އިތުރު ވުމުން ގިނަ ބަލިތަކަށް މީހާ ހުށައެޅޭކަމަށާއި މިކަމުން ރައްކާތެރި ވުމަށްޓަކައި ފަތިހު ތެދުވުމަށާއި އަވީގައި ޖެހުމާއި ގުދުރަތީ ނިޒާމުގެ ތެރޭގައި ވަގުތު ކޮޅެއް ހޭދަކުރުމަކީ މުހިންމު ކަމެއްކަމުގައި ވިދާޅުވިއެވެ.
ކޮންމެ ކަމެއްގައިވެސް ހެވެއް އޮންނާނެކަމަށާއި އެޑިކްޝަނަކީ ވެސް ހިތްހަމަޖެހުމެއް ހޯދުމަށްޓަކައި ކުރެވޭ ޢަމަލަކުން އަށަގަންނަ ކަމެއްކަން ފާހަގަ ކުރައްވައި ވިދާޅުވީ އެއީ ގިނަފަހަރަށް ދިރިއުޅުމުގެ ކަންބޮޑުވާ ފިކުރުތަކުން ދުރުހެލިވުމަށް އިޙުތިޔާރު ކުރެވޭމަގެއްކަމަށެވެ. މިއީވެސް "ކޯޕިން މެކެނިޒަމެއް" ކަމަށާއި އެހެންނަމަވެސް ފައިދާހުރި ގޮތްތަކާއި ގެންލުންދޭ ގޮތްތަށް ހުންނާނެ ކަންފާހަގަ ކުރެއްވިއެވެ.
ގެއްލުންދޭ ގޮތް އިޙުތިޔާރު ކުރެވުމުން ވަގުތީ ހިތްހަމަޖެހުމެއް ގެނެސްދީފާނެ ކަމަށާއި އެހެންނަމަވެސް ހަށިގަނޑަށާއި ސިއްޙަތަށްގެއްލުންލިބޭ ޢަމަލުތަކަށް ކިޔަނީ "އަންހެލްތީ ކޯޕިން މެކެނިޒަމް" ކަން ވިދާޅުވިއެވެ. "ހެލްތީ ކޯޕިން މެކެނިޒަމް" މިކިޔަނީ ހިތްހަމަޖެހުމާއި އުފާވެރިކަން ހޯދުމަށްޓަކައި ކުރާކަމަކުން ތިމާ އަށާއި ދިރިއުޅުމަށް ގެއްލުމެއްނުވާ ކަންކަމަށް ކަމުގައި ވިދާޅުވިއެވެ.
މި ޢިލްމު އުނގެނި ކުޑައިރުންސުރެ ދިމާވާ ކަންކަމުން އަރައިގަތުމުގައި ފައިދާ ހުރިގޮތްތަށް އިހުތިޔާރު ކުރަން ދަސްކޮއްދޭން ޖެހޭކަން ފާހަގަ ކުރެއްވިއެވެ.އެފަދަ މާޙައުލެއް މުޖުތަމަޢުގައި ޤާއިމްވުން މުހިންމެވެ. ކުދިންނާއި މުޢާމަލާތް ކުރުމުގައި ކުދިން ދެނެގަނެގެން ކަންކަން ބުނެދިނުން މުހިންމުކަން ފާހަގަ ކުރެއްވިއެވެ.
ފައިދާހުރިކާނާގެ ވާހަކަ ތަކާއި ގުޅޭ މަޢުލޫމާތު ހިއްސާކުރައްވަމުން ޝިފާނާވަނީ ދިރިއުޅުމުގައި އަޅުގަނޑުމެން ބޭނުންކުރާ ހަކުރު ގެ މިންވަރު އެކަށޭނަ މިންގަޑެއްގައި ހިފެހެއްޓުމަށް ވަރަށް ބޮޑު ސަމާލުކަމެއް ދޭންޖެހިފައިވާ ކަމަށެވެ. އެގޮތުން ކެއުމުގައި ފައިބަރ ގިނަ ކާނާ ބޭނުންކުރުމުގެ ފައިދާތަށް ވިދާޅުވެދެއްވިއެވެ.
ޤުދުރަތީ ގޮތުން އިންސާނާގެ ހަށިގަނޑު ހިންގަން ޖެހޭގޮތަށް ހިނގިޔަ ދިނުމުގެ މުހިންމު ކަން ފާހަގަ ކުރައްވައި ވިދާޅުވީ ގުދުރަތީ ގޮތުން ކާބޯތަކެތި އުފެދޭ ގޮތަށް ހުއްޓައި ބޭނުންކުރުމުން ހަށިގަނޑަށް ލިބޭ ފައިދާ ފެކްޓްރީއެއްގައި ބަންދު ކޮށް އެއަށް ބަދަލެއްގެނެސްގެން ބޭނުން ކުރުމަށް ވުރެ ފައިދާ ބޮޑުކަމުގައެވެ.ފައިބަރު ގިނަ ކާނާ ކޮންމެ ގަޑިއެއްގައިވެސް ބޭނުންކުރުމުން ހަކުރުގެ މިންވަރު ހަށިގަނޑުގައި ޖަމާވާ މިންވަރު މަދުވާނެކަން ފާހަކަ ކުރައްވައި އެކަމަށް ބާރު އެޅުއްވިއެވެ.
ދުޅަހެޔޮ ޞިއްޙަތެއް ގައި ހުރުމަށްޓަކައި ކަސްރަތާއި ރަނގަޅު ކާނާ ބޭނުންކުރުމުގެ މުހިންމުކަމާއި ގުޅޭ ޞައްޙަ މަޢުލޫމާތު ހޯދަން ޖެހޭކަން ފާހަގަ ކުރެއްވިއެވެ. އުފާވެރި ކަމާއި އެކު ދުވަސްހޭދަކޮއްލުމަށްޓަކައި ހެނދުނު ހޭލުން، އިރު އަރާވަގުތުގެ އަލިކަން ލިބިގަތުމާއި ރަނގަޅު ކާނާ ކެއުން އެއީ ތާޒާ ދުވަހެއް ފެށުމަށް ފައިދާ ހުރި ގޮތެއްކަން ފާހަގަ ކުރެއްވިއެވެ. ހަށި ހެޔޮވުމާއި ރަނގަޅުކާނާ އާއި ދިމާ ވެގެން ނޫނީ ރަނގަޅު ޞިއްޙަތެއް ނުލިބޭނެކަން ފާހަގަ ކުރެއްވިއެވެ.
ތައްޔާރީ ކާނާ ތަކާއި ދުރުހެލިވެ ކާނާ އޭގެ ގުދުރަތީ ޙާލަތުގައި ފައިދާ ނުގެއްލޭގޮތަށް ކާނާ ބޭނުންކުރުން މުހިންމު ކަމަށް ވިދާޅުވިއެވެ. އުފާވެރިކަން ލިބިގަތުމަށްޓަކައި ވަކި ޢުމުރަކަށް ބެލުމެއްނެތި ޙަރަކާތްތެރި ވުމަށް ވިދާޅުވިއެވެ.އަމިއްލަ ނަފްސަށް އިތުބާރުކުރުމަށާއި ދޫ ނުދީ މަސައްކަތް ކުރުމަށާއި ސިކުނޑި ބާރުވެރިކުމަށް ނަސޭޙަތްތެރި ވިއެވެ.