ޣައްޒާގައި އިސްރާއީލުން ހިންގަމުންދާ ހަނގުރާމަ ހުއްޓާލައި ރަހީނުން މިނިވަން ކުރުމަށް ވި އެއްބަސްވުމަކީ އެމެރިކާގެ ރައީސް ޖޯ ބައިޑެންގެ އޮނިގަނޑަށް އެކުލަވާލާފައިވާ އެއްބަސްވުމެއް ކަމަށް އެމަނިކުފާނު ވިދާޅުވެއްޖެއެވެ. އެއާއެކު އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕްވެސް ވަނީ އެއްބަސްވުން ތަންފީޒުކުރެވުނީ އެމަނިކުފާނުގެ ސަބަބުން ކަމަށް ވިދާޅުވެފައެވެ.
ހަނގުރާމަ ހުއްޓާލާކަން އިއުލާން ކުރައްވަމުން ބައިޑަން ފާހަގަކުރެއްވި ގޮތުގައި އެއްބަސްވުން އެކުލަވާލާފައި ވަނީ މިދިޔަ އަހަރު މެއި މަހު އެމަނިކުފާނު ހުށަހެޅުއްވި އޮނިގަނޑުގެ މައްޗަށެވެ. އެއްބަސްވުން ތަންފީޒުކުރެވުނީ ޓްރަމްޕްގެ ސަބަބުންތޯ ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން ބައިޑެން ވަނީ ތިއީ ސަމާސާއެއްތޯ ސުވާލު ކުރައްވާފައެވެ.
ޓްރަމްޕް ސޯޝަލް މީޑިއާގައި ކުރެއްވި ޕޯސްޓެއްގައި ވަނީ މަސްތަކެއް ވަންދެން ކުރިއަށް ގެންދިޔަ މަޝްވަރާތައް ހުއްޓުމަކަށް އައުމަށް ފަހު ލިބުނު ކުރިއެރުމަކީ އެމަނިފާނުގެ ސަބަބުން ލިބުނު ކުރިއެރުމެއް ކަމަށްދޭހަވާ އިބާރާތްތަކެއް ބޭނުންކޮށްފައެވެ.
"ހަނގުރާމަ ހުއްޓާލުމަށް އެއްބަސްވީ ނޮވެމްބަރު މަހު އަޅުގަނޑުމެންނަށް ލިބުނު ތާރީޚީ ކާމިޔާބީގެ ނަތީޖާއެއްގެ ގޮތުން، އެއީ އަޅުގަނޑުގެ ވެރިކަމުގައި ސުލްހަ ހޯދައި، ހުރިހާ އެމެރިކާ މީހުންގެ ސަލާމަތާއި، އަދި އަޅުގަނޑުމެންގެ އެކުވެރި ގައުމުތަކުގެ ރައްކާތެރިކަން ކަށަވަރު ކުރުމަށް ޑީލްތައް ނިންމާނެ ކަމުގެ އިޝާރާތެއް." ޓްރަމްޕް ސޯޝަލް މީޑިއާގައި ކުރެއްވި ޕޯސްޓެއްގައި ލިޔުއްވާފައިވެއެވެ.
ޓްރަމްޕް ވަނީ އޭނާގެ މެދުއިރުމަތީގެ މަންދޫބު ސްޓީވް ވިޓްކޯފް ދޯހާގައި ކުރިއަށް ގެންދިޔަ މަޝްވަރާތަކުގައި ބައިވެރިވުމަށް ފޮނުއްވާފައެވެ.
ބައިޑަން އެޑްމިނިސްޓްރޭޝަންގެ އިސް އޮފިޝަލަކު ނޫސްވެރިންނަށް ދެއްވި އިންޓަވިއުއެއްގައި ވަނީ ޖެނުއަރީ މަހުގެ ފަސްވަނަ ދުވަހުން ފެށިގެން ދޯހާގައި ހުރި ބައިޑަންގެ މަންދޫބު ބްރެޓް މެކްގާކްއާ އެކު މަސައްކަތްކޮށް، އެއްބަސްވުން ތަންފީޒުކުރުމަށް އެހީތެރިވި ވިޓްކޯފްއަށް ޝުކުރު އަދާކޮށްފައެވެ.
ވައިޓް ހައުސްގެ ޕްރެސް ސެކްރެޓަރީ ކަރީން ޖީން ޕިއެރޭ ނޫސްވެރިންނާ ވާހަކަ ދައްކަވަމުން ވިދާޅުވީ ބައިޑަން ބޭނުންވީ ޓްރަމްޕްގެ ޓީމު މިކަމުގައި ބައިވެރިވާން ކަމަށާއި ސަބަބަކީ ހަނގުރާމަ ހުއްޓާލުމުގެ އެއްބަސްވުން ތަންފީޒު ކުރުމުގެ މަސައްކަތް ޓްރަމްޕަށް ހަވާލުވާނެތީ ކަމަށެވެ.
"މި ވޭތުވެދިޔަ ދުވަސްތަކުގައި އަޅުގަނޑުމެން ވާހަކަ ދައްކަމުން އައީ އެއް ޓީމެއްގެ ގޮތުގައި." ބައިޑެން ވިދާޅުވިއެވެ.
އެ އެއްބަސްވުމުގެ ސަބަބުން އިސްރާއީލާ އެކު ފަލަސްތީނުގެ މިނިވަން ދައުލަތެއް އުފެއްދުމަށް މަގުފަހިވެދާނެ ކަމަށްވެސް ބައިޑެން ވިދާޅުވިއެވެ.
ދިގު ޒަމާންތަކެއް ވަންދެން ކުރިއަށްދިޔަ އިސްރާއީލާއި ފަލަސްތީނުގެ ހަނގުރާމައިގެ އެންމެ ފަހުގެ ލޭއޮހޮރުވުން ފެށުނީ 2023ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހުއެވެ. ހަމާސް އިން އިސްރާއީލަށް ހަމަލާދީ 1،200 މީހުން މަރުވެ، ގާތްގަނޑަކަށް 250 މީހުން ރަހީނުކޮށްފައިވާ ކަމަށް އިސްރާއީލުގެ ހިސާބުތަކުން ދައްކައެވެ.
އޭގެ ފަހުން އިސްރާއީލުން ޣައްޒާއަށް ދިން އަސްކަރީ ހަމަލާގައި ފަލަސްތީނުގެ 46،000އަށް ވުރެ ގިނަ މީހުން ޝަހީދުކޮށްލަފައިވާއިރު، ނަސްލު ނައްތާލުމާއި ހަނގުރާމައިގެ ޖަރީމާތަކުގެ ތުހުމަތުތައް އިސްރާއީލުން ދޮގުކުރެއެވެ. މި ހަމަލާގެ ސަބަބުން ޣައްޒާގެ މުޅި އާބާދީ ގެދޮރު ދޫކޮށް ދިއުމަށް މަޖުބޫރުވެ، ބަނޑުހައިހޫނުކަމުގެ ދަތިކަން ވަނީ ކުރިމަތިވެފައެވެ.