ރޮޖާ ފެޑެރާ ހަދާފައިވާ އެންމެ ގިނަ ގްރޭން ސްލޭމް ސިންގަލްސް މެޗު ކުޅުމުގެ ރިކޯޑް މިވަގުތު ޓެނިސް ކުޅެމުންދާ ކުޅުންތެރިންގެ ތެރެއިން އެންމެ ތަޖުރިބާކާރު ކުޅުންތެރިޔާ ކަމުގައިވާ ސާބިއާގެ ނޯވަކް ޖޯކޮވިޗް މުގުރާލައިފިއެވެ.
ޖޯކޮވިޗް މި ރިކޯޑް މުގުރާލާފައި ވަނީ އޮސްޓްރޭލިއާގެ މެލްބަންގައި މިހާރު ކުރިއަށްދާ އަހަރުގެ ފުރަތަމަ ގްރޭން ސްލޭމް މުބާރާތް ކަމަށްވާ އޮސްޓްރޭލިއަން އޯޕަންގެ ދެވަނަ ބުރުގައި ޕޯޗުގަލްގެ ހެއިމޭ ފާރިއާ އާއި ބައްދަލުކުރި މެޗާއެކުއެވެ. މި މެޗާއެކު އުމުރުން 37 އަހަރުގެ ޖޯކޮވިޗް މިވަނީ ގްރޭން ސްލޭމް ސިންގަލަސް 430 މެޗު ހަމަކޮށްފައެވެ.
މި ރިކޯޑް މިހާތަނަށް އޮތީ މިހާރު ކުޅުން ހުއްޓާލާފައިވާ ފެޑެރާ އަތުގައެވެ. މިމުބާރާތުގައި ހަތް ވަނައަށް ސީޑު ކުރެވިފައިވާ ޖޯކޮވިޗް ވަނީ ދެވަނަ ބުރުގައި ފާރިއާއާ ބައްދަލުކުރި މެޗު ތިން ސެޓް އެއް ސެޓުން ކާމިޔާބު ކޮށް މިމުބާރާތުގެ ތިންވަނަ ބުރުން ޖާގަވެސް ހޯދައިފައެވެ.
މިމެޗުގެ ފުރަތަމަ ސެޓު ޖޯކޮވިޗް ފަސޭހަ ކަމާއެކު ހައެއް އެކަކުން ކާމިޔާބު ކުރި ނަމަވެސް ކޮލިފައިން ކުޅެގެން މިމުބާރާތުން ޖާގަހޯދާފައިވާ ފާރިއާ ވަނީ ދެވަނަ ސެޓު ޓައި ބްރޭކަކަށް ގެންގޮސް ހަތަރެއް ހަތަކުން ކާމިޔާބު ކޮށްފައެވެ. ނަމަވެސް ޖެހިގެން އައި ދެ ސެޓު ޖޯކޮވިޗް ކާމިޔާބު ކޮށްފައި ވަނީ ހައެއް ތިނެއް އަދި ހައެއް ދެއަކުންނެވެ.
މިމުބާރާތުގެ ތިންވަނަ ބުރުގައި ޖޯކޮވިޗް ބައްދަލުކުރާނީ 26 ވަނައަށް ސީޑު ކުރެވިފައިވާ ޗެކް ރިޕަބްލިކްގެ ތޯމަސް މަޗަކްއާއެވެ. މިމުބާރާތުގެ ތިންވަނަ ބުރުން މަޗަކް ޖާގަހޯދީ ދެވަނަ ބުރުގައި އެމެރިކާގެ ރެއިލީ އޮޕެލްކާއާ ބައްދަލުކުރި މެޗު ތިން ސެޓު އެއް ސެޓުން ކާމިޔާބު ކޮށްގެންނެވެ. އެއީ ހައެއް ތިނެއް، ހައެއް ހަތެއް، ހަތެއް ހައެއް އަދި ހައެއް ހަތަރަކުންނެވެ.
މިމުބާރާތުގެ ތިންވަނަ ބުރުން ވަނީ މިމުބާރާތުގައި ދެވަނައަށް ސީޑު ކުރެވިފައިވާ ޖަރުމަނުވިލާތުގެ އެލެގްޒެންޑާ ޒުވަރޭވް އާއި ތިންވަނައަށް ސީޑު ކުރެވިފައިވާ ކާލޯސް އަލްކަރާޒްވެސް ޖާގަހޯދައިފައެވެ. ޒުވަރޭވް ތިންވަނަ ބުރުން ޖާގަހޯދީ ދެވަނަ ބުރުގައި ސްޕެއިންގެ ޕެޑްރޯ މާޓިނޭޒް އާއި ބައްދަލުކުރި މެޗު ހައެއް އެކެއް، ހައެއް ހަތަރެއް އަދި ހައެއް އެކަކުން ކާމިޔާބު ކޮށްގެންނެވެ.
މިމުބާރާތުގެ ތިންވަނަ ބުރުގައި ޒުވަރޭވް ބައްދަލުކުރުމަށް ހަމަޖެހިފައިވަނީ ދެވަނަ ބުރުގައި ފަރަންސޭސިވިލާތުގެ އާތާ ކަޒައުސް ތިން ސެޓް އެއް އެއްސެޓުން ބަލިކުރި އިނގިރޭސިވިލާތުގެ ޖޭކޮބް ފާންލީ އާއެވެ. މީގެއިތުރުން އަލްކަރާޒް ތިންވަނަ ބުރުން ޖާގަހޯދާފައި ވަނީ ޖަޕާންގެ ޔޮޝިހީޓޯ ނިޝިއޮކާއާ ބައްދަލު ކުރި މެޗު ހީކުރި ވަރަށް ވުރެ ފަސޭހަ ކަމާއެކު ސީދާ ތިން ސެޓުން ކާމިޔާބު ކޮށްގެންނެވެ. އެއީ ހައެއް ސުމެއް، ހައެއް އެކެއް އަދި ހައެއް ހަތަރަކުންނެވެ. ތިންވަނަ ބުރުގައި އަލްކަރާޒް ބައްދަލުކުރުމަށް ހަމަޖެހިފައިވަނީ ޕޯޗުގަލްގެ ނޫނޯ ބޯގެސް އާއެވެ.
މިމުބާރާތުގެ ތިންވަނަ ބުރުން ބޯގެސް ޖާގަހޯދީ 27 ވަނައަށް ސީޑު ކުރެވިފައިވާ އޮސްޓްރޭލިއާގެ ޖޯޑަން ތޮމްޕްސަންއާ ބައްދަލުކުރި މެޗު ހައެއް ތިނެއް، ހައެއް ދެއެއް އަދި ހައެއް ހަތަރަކުން ކާމިޔާބު ކޮށްގެންނެވެ.