އިންގްލިޝް ޕްރިމިއާ ލީގުގެ އާސެނަލްއަށް ކުޅެމުން އަންނަ ބްރެޒިލްގެ ފޯވާޑް ގެބްރިއެލް ޖޭސުސްގެ ކަކުލަށް އަނިޔާވެ އޮޕަރޭޝަނެއް ކުރަންޖެހޭކަމަށް އެ ކުލަބުން ހާމަކޮށްފިއެވެ.
ޖޭސުސްގެ ކަކުލަށް އަނިޔާވެފައިވަނީ އެފް އޭ ކަޕްގެ ތިންވަނަ ބުރުގައި މެންޗެސްޓާ ޔުނައިޓެޑާ ކުޅެ ބަލިވި މެޗުގައެވެ.
އެ މެޗުގައި ޖޭސުސްއަށް ލިބިގެންދިޔަ އަނިޔާ އާ ގުޅިގެން އޭނާ ދަނޑުން ބާލާފައިވަނީވެސް އަށިގަނޑުގައެެވެ. މި ސީޒަންގައި ޖޭސުސްވަނީ އާސެނަލްއަށް 27 މެޗު ކުޅެދީ ހަތް ލަނޑު ކާމިޔާބު ކޮށްދީފައެވެ.
އާސެނަލްއިން ނެރުނު ބަޔާނެއްގައިވާގޮތުން ޖޭސުސްގެ ކަކުލަށް ލިބުނު އަނިޔާއާ ގުޅިގެން ގިނަ ޓެސްޓްތަކެއް ވަނީ މިހާރު ހަދާފައެވެ. އަދި މި ޓެސްޓް ތަކުން ދައްކާ ގޮތުގައި ޖޭސުސްގެ ވައާތު ފައިގެ ކަކުލުގެ ލިގަމެންޓަށް އަނިޔާވެފައިވާކަމަށް އެ ކުލަބުން ބުނެއެވެ. އަދި ލިބިފައިވާ އަނިޔާއާ ގުޅިގެން ކުރިއަށް އޮތް ދެތިން ދުވަހުގެ ތެރޭގައި އޮޕަރޭޝަން ކުރެވޭނެ ކަމަށާއި އަދި އެއާއެކު ރިހެބިލިޓޭޝަންގެ މަސައްކަތް ފެށިގެންދާނެކަމަށް ވެސް އެ ކްލަބުން ހާމަކުރެއެވެ.
ދެހާސް ބާވީސް ވަނަ އަހަރު 45 މިލިއަން ޕައުންޑްގެ އަގަކަށް މެންޗެސްޓާ ސިޓީއިން އާސެނަލްއަށް ބަދަލުވި ޖޭސުސް ވަނީ މިސީޒަންގައި މީގެ ކުރިންވެސް އަނިޔާގެ ސަބަބުން ކުޅުމާއި ދުރުގައި ދުވަސް ކޮޅެއް ހޭދަކޮށްފައެވެ. އަދި އަނިޔާއިން އެނބުރި އައިސް ފޯމަކަށް އެޅެއް ދުވަސް ކޮޅެއް ނެގި ނަމަވެސް މިފަހަރު އަނިޔާވެފައިވަނީ އޭނާ ވަރަށް ރަނގަޅު ފޯމެއްގައި ހުއްޓައެވެ.
މި ގޮތުން ޖޭސުސް އެންމެ ފަހުން ކުޅުނު ހަތް މެޗުގައިވަނީ ހަ ލަނޑު ކާމިޔާބު ކޮށްފައެވެ. ޖޭސުސް ވެފައިވަނީ އާސެނަލްގައި އަނިޔާގައި ތިބި ކުޅުންތެރިންގެ ލިސްޓަށް އިތުރު ވެގެންދިޔަ އިތުރު ނަމަކަށެވެ. އެޓީމުގައި މިވަގުތު އަނިޔާގައި ތިބި ކުޅުންތެރިންނަށް ބަލާއިރު ބިކާޔޯ ސާކާ، ބެން ވައިޓް، ޓަކެހީރޯ ޓޮމިޔާސޫ، އީތަން އެންވަނޭރީ އަދި ރިކާޑޯ ކަލަފިއޯރީ ހިމެނެއެވެ.
އާސެނަލް މިވަގުތު އުޅެނީ އިންގްލިޝް ޕްރިމިއާ ލީގުގެ ތާވަލްގެ ދެވަނައިގައެވެ. އެއީ ތާވަލްގެ އެއްވަނައިގާ މިވަގުތު އުޅޭ ލިވަޕޫލަށްވުރެ ހަ ޕޮއިންޓް ފަހަތުންނެވެ.