ކޮންމެ މީހެއްގެ ދިރިއުޅުމުގައި ވެސް އެކުވެރިންނަކީ ވަރަށް މުހިންމު ރޯލެއް އަދާ ކުރާ ބައެކެވެ. އެއްބައި މީހުންނަކީ އަނެއްބައި މީހުންނަށްވުރެ ޚާއްސަ މީހުންގެ ގޮތުގައި އެކުވެރިންތައް ލިސްޓު ވެސް ކުރެވެއެވެ. އޭގެ ތެރެއިން ވެސް ބައެއް ފަހަރު ޚާއްސަ އެކުވެރިއެއް ހުރެއެވެ. އެކަމު މިގޮތަށް އެކަކު ހުރުން އެހާ މުހިންމު ހެއްޔެވެ؟
ބައެއް މީހުން އެކުވެރިންގެ ލިސްޓެއް ކިޔާއިރު ބެސްޓް ފްރެންޑެއްގެ ވާހަކަ އަބަދު ވެސް ދައްކައެވެ. މިއީ މީހާގެ ހުރިހާ ވާހަކައެއް އަދި ދިރިއުޅުމުގެ ހުރިހާ ކަމެއް އެންމެ ގާތުން ހިއްސާކޮށް އެންމެ ގިނައިން އެކީގައި އުޅޭ އެކުވެރިއެވެ. ނަމަވެސް، މިގޮތަށް ބެސްޓް ފްރެންޑެއް ހުރުން ކޮންމެހެން މުހިންމު ހެއްޔެވެ؟
ބެސްޓު ފްރެންޑަކީ ދިރިއުޅުމުގެ ކޮންމެ ކަމެއް ވެސް ފަސްޖެހުމެއް ނެތި ކިޔައިދެވޭހާ ގާތްކަން އުފެދިފައި އޮންނަ އެކުވެރިޔާއެވެ. އާންމުކޮށް، ބޮޑު ކަމެއް ދިމާވުމުން ހިޔާލު ބަދަލުކޮށްލަން ގުޅާނީ ބެސްޓް ފްރެންޑަށެވެ. އަދި، ބެސްޓު ފްރެންޑަކީ ކޮންމެ ވާހަކައެއް ވެސް ބުނެވޭނެ, ކަންކަމުގައި އަބަދު ވެސް އެހީތެރިކަން ފޯރުކޮށްދޭނެ, އެންމެ އިތުބާރު ކުރެވޭ, އެންމެ ގާތް ފްރެންޑެވެ.
މީހާގެ ދިރިއުޅުމަށް މިހާ ގާތް އެކުވެރިއަކު ބޭނުންވެ މި ފަދަ އެކުވެރިއެއްގެ ސަބަބުން ދިރިއުޅުމަށް ހެޔޮ ބަދަލު އަންނަ ކަމުގައިވާނަމަ ބެސްޓް ފްރެންޑެއް ހުރުމަކީ މުހިންމު ކަމެކެވެ.
"ބެސްޓް ފްރެންޑެއް ހުރީމާ އަސްލު ލައިފްގައި ދިމާވާ އެންމެ އުނދަގޫ ކަންތައްތައް ޕްރޮސެސްކުރަން، ޖަޖް ނުކުރާނެ ކަންފަތެއް ލިބޭ،" ޒުވާނަކު ބުންޏެވެ.
ބައެއް ހާލަތުގައި ހަމައެކަނި ބޭނުންވަނީ ކޮންމެ ފަދަ ވަގުތެއްގަ އިވެސް ފާޑު ނުކިޔާނެ ގޯސް ނަޒަރަކުން ނުދެކޭނެ އަޑު އަހާނެ ކަންފަތެއް ކަމުގައި އޭނާ ފާހަގަކުރެއެވެ. އެއީ، ބެސްޓް ފްރެންޑެއް ހުރުމުން ވަރަށް ބޮޑަށް ލިބޭ ފައިދާ އެއް ކަމުގައި އޭނާ ބުންޏެވެ.
ބައެއް ހާލަތްތަކުގައި ބެސްޓް ފްރެންޑަކީ އެންމެ މީހެއް ނޫނެވެ. ނަމަވެސް، އެކުވެރިކަމުގެ ދަރަޖައެކެވެ. މި ދަރަޖައަކީ އެންމެ ގާތް އެކުވެރިންނަށް ދެވޭ ދަރަޖައެވެ.
ނަމަވެސް، ކޮންމެ ހާލަތެއްގައި ކޮންމެހެން ބެސްޓްފްރެންޑެއް ހުރުން މުހިންމެއް ވެސް ނޫނެވެ. އެއްބައި ފަހަރުތަކުގައި ބެސްޓް ފްރެންޑެއް ހުރުމަކީ މީހާއަށް ފައިދާވުމުގެ ބަދަލުގައި ގެއްލުން ވެސް ވެދާނެ ކަމެކެވެ.
މުޖުތަމައު ދެކޭގޮތުގައި ބެސްޓް ފްރެންޑެއް ހުރުމަކީ ވަރަށް އާންމު ކަމެކެވެ. އެއާއެކު ގިނަ ބަޔަކު އެފަދަ ގާތް އެކުވެރިއެއް ދިރިއުޅުމުގައި ބެހެއްޓުމަށް ވަރަށް މަސައްކަތް ކުރެއެވެ. ބައެއް ފަހަރު ދިރިއުޅުމުގައި ބަހައްޓަން ބޭނުންވާ މި އެކުވެރިޔަކީ ތިމާގެ އެންމެ ހެވަށް ވިސްނާ މީހަކަށް ނުވެދާނެއެވެ. އެހެން ވާނަމަ މިފަދަ ހާލަތެއްގައި ބެސްޓް ފްރެންޑެއް ހުރުމަށް ވުރެ އެންމެ ރަނގަޅުވާނީ އެކުވެރިކަން ރޫޅާލުމެވެ. ނުވަތަ އެކުވެރިކަމުގެ ދަރަޖަ ބަދަލުކޮށްލުމެވެ.