އަހަރުގެ ފުރަތަމަ ގްރޭން ސްލޭމް މުބާރާތް ކަމަށްވާ އޮސްޓްރޭލިއަން އޯޕަންގެ ފިރިހެން ސިންގަލްސް އިވެންޓްގެ ދެވަނަ ބުރުން މިމުބާރާތުގެ އެންމެ ފަހުގެ ޗެމްޕިއަން އަދި މިމުބާރާތުގައި އެއްވަނައަށް ސީޑު ކުރެވިފައިވާ އިޓަލީވިލާތުގެ ޔަނިކް ސިނާ ޖާގަހޯދައިފިއެވެ.
މިމުބާރާތުގެ ދެވަނަ ބުރުން ސިނާ ޖާގަހޯދީ ފުރަތަމަ މެޗުގައި ޗިލީގެ ނިކޮލަސް ހެރީއާ ބައްދަލުކުރި މެޗު ސީދާ ތިން ސެޓުން ކާމިޔާބު ކޮށްގެންނެވެ. ނަމަވެސް މިމެޗުގެ ފުރަތަމަ ދެސެޓުވޯ ސިނާއަށް މާ ފަސޭހަ ދެސެޓަކަށް ނޫނެވެ.
ފުރަތަމަ ސެޓު ޓައި ބްރޭކަކަށް ގޮސް ހަތެއް ދެއަކުން ސިނާ ކާމިޔާބު ކުރިއިރު ދެވަނަ ސެޓުވެސް ޓައި ބްރޭކަކަށް ގޮސް ސިނާއަށް ކާމިޔާބު ކުރެވުނީ ހަތެއް ފަހަކުންނެވެ. ނަމަވެސް ތިންވަނަ ސެޓު ސިނާ ވަނީ ހައެއް އެކަކުން ކާމިޔާބު ކޮށްފައެވެ.
މެޗަށްފަހު ސިނާ ބުނީ، އޭނާގެ މައްޗަށް އުފުލައިފައިވާ، މަނާ ބޭސް ބޭނުން ކުރުމުގެ ދައުވާއާ ގުޅިގެން އޭނާއަށް ރޮދް ލެވާ އެރީނާއިން ލިބޭނީ ކޮންކަހަލަ ތަރުހީބަކާމެދު ހާސްވި ކަމަށެވެ. ނަމަވެސް މުޅި މެޗުގައިވެސް އޭނާއަށް ލިބުނު ތަރުހީބަށް އޭނާވަނީ ޝުކުރު އަދާކޮށްފައެވެ.
މިމުބާރާތުގައި ކުޅޭ އެންމެ ތަޖުރިބާކާރު ކުޅުންތެރިޔާ، ހަތް ވަނައަށް ސީޑު ކުރެވިފައިވާ ސާބިއާގެ ނޯވަކް ޖޯކޮވިޗްވެސް ވަނީ ދެވަނަ ބުރުން ޖާގަހޯދައިފައެވެ. މިމުބާރާތުގެ ދެވަނަ ބުރުން ޖޯކޮވިޗް ޖާގަހޯދީ ފުރަތަމަ ބުރުގައި އެމެރިކާއަށް ނިސްބަތްވާ އުމުރުން 19 އަހަރުގެ ޒުވާން ކުޅުންތެރިއެއް ކަމަށްވާ ނިޝޭޝް ބަސަވާ ރެޑީއާ ބައްދަލުކުރި މެޗު ތިން ސެޓް އެއް ސެޓުން ކާމިޔާބު ކޮށްގެންނެވެ.
މިމެޗުގެ ފުރަތަމަ މެޗު ޖޯކޮވިޗްގެ އިތުރުން މުޅި ސްޓޭޑިއަމް ހައިރާން ކޮށްލުމަށްފަހު ހަތަރެއް ހަޔަކުން ކާމިޔާބުކުރީ ބަސަވާރެޑީއެވެ. އަދި ދެވަނަ ސެޓުގެ މެދަކާ ހަމައަށް ދަންދެންވެސް ބަސަވާރެޑީ ވަނީ މިމެޗުގައި މޮޅު ކުޅުމެއް ދައްކާ ޖޯކޮވިޗް ހާސްކަމުގެ ތެރޭގައި ބަހައްޓާފައެވެ. ނަމަވެސް ދެން ފެނުނީ ބަސަވާރެޑީއަށް އަކުނިވަޔަށް ދެމުމުގެ މައްސަލައަކާ ކުރިމަތިވި ތަނެވެ. އަދި އެއާއެކު ދެވަނަ ސެޓު ހައެއް ތިނަކުން ޖޯކޮވިޗް ކާމިޔާބު ކުރިއިރު ޖެހިގެން އައި ދެސެޓުވެސް އޭނާ ވަނީ ހައެއް ހަތަރެއް އަދި ހައެއް ދެއަކުން ކާމިޔާބު ކޮށްފައެވެ.
އެ މެޗުގައި ބަސަވާރެޑީވަނީ ތައުރީފު ހައްގު ކުޅުމެއް ދައްކާފައެވެ. މިމެޗުވީ އެންޑީ މަރީ، ޖޯކޮވިޗްގެ ކޯޗިން ޓީމާއެކު ބޮޑު މުބާރާތެއްގައި ފެނުނު ފުރަތަމަ ފަހަރަށެވެ. މިމުބާރާތުގެ ދެވަނަ ބުރުގައި ޖޯކޮވިޗް ބައްދަލުކުރުމަށް ހަމަޖެހިފައިވަނީ ޕޯޗުގަލްގެ ޖެއިމް ފާރިއާ އާއެވެ.
މިމުބާރާތުގައި ތިންވަނައަށް ސީޑު ކުރެވިފައިވާ ސްޕެެއިންގެ ކާލޯސް އަލްކަރާޒް އާއި ކަޒަކިސްތާންގެ އެލެގްޒެންޑާ ޝެވްޗެންކޯ ބައްދަލުކުރި މެޗު ހައެއް އެކެއް، ހަތެއް ފަހެއް އަދި ހައެއް އެކަކުން ކާމިޔާބު ކޮށްފައިވަނީ އަލްކަރާޒްއެވެ. އަދި 12 ވަނައަށް ސީޑު ކުރެވިފައިވާ އެމެރިކާގެ ޓޮމީ ޕޯލް އާއި އޮސްޓްރޭލިއާގެ ކްރިސްޓޮފާ އޯކޯނެލް ބައްދަލުކުރި މެޗު ތިން ސެޓް ދެސެޓުން ކާމިޔާބު ކޮށްފައިވަނީ ޕޯލްއެވެ. އެއީ ހައެއް ދެއެއް، ތިނެއް ހައެއް، ހައެއް އެކެއް، ހައެއް ހަތެއް އަދި ހަތެއް ފަހަކުންނެވެ.