އޮސްޓްރޭލިއަން އޯޕަން ޓެނިސް މުބާރާތުގެ ފިރިހެން ސިންގަލްސް އިންވެންޓްގެ ދެވަނަ ބުރުން މިމުބާރާތުގައި ދެވަނައަށް ސީޑު ކުރެވިފައިވާ ޖަރުމަނުވިލާތުގެ އެލެގްޒެންޑާ ޒުވަރޭވް ޖާގަހޯދައިފިއެވެ.
މިމުބާރާތުގެ ދެވަނަ ބުރުން ޒުވަރޭވް ޖާގަހޯދީ ފުރަތަމަ ބުރުގައި ފަރަންސޭސިވިލާތުގެ ވައިލްޑްކާޑް ކުޅުންތެރިއެއް ކަމަށްވާ ލޫކަސް ޕައުއިލްއާ ބައްދަލުކުރި މެޗު ސީދާ ތިން ސެޓުން ކާމިޔާބު ކޮށްގެންނެވެ. މިމެޗުގެ ސެޓުތައް ޒުވަރޭވް ކާމިޔާބު ކޮށްފައިވަނީ ހައެއް ހަތަރެއް، ހައެއް ހަތަރެއް އަދި ހައެއް ހަތަރަކުންނެވެ.
މިމުބާރާތުގެ ދެވަނަ ބުރުގައި ޒުވަރޭވް ބައްދަލުކުރާނީ ސްޕެއިންގެ ޕެޑްރޯ މާޓިނޭޒް އާއެވެ. މިވަގުތު ދެވަނައަށް ސީޑު ކުރެވިފައިވީ ނަމަވެސް ޒުވަރޭވްއަށް މިހާތަނަށް ގްރޭން ސްލޭމް މުބާރާތެއް ކާމިޔާބު ކުރެވިފައެއް ނުވެއެވެ. އެހެން ކަމުން މިފަހަރު އެކަން ނިމުމަކަށް ގެންނަން ޒުވަރޭވް ވަރަށް ބޮޑަށް މަސައްކަތް ކުރާނެކަމަށް ބެލެވެއެވެ.
އެންމެ ފަހު މުބާރާތުގައި ޒުވަރޭވް ސެމީ ފައިނަލްގައި ރަޝިއާގެ ޑަނީލް މެޑްވެޑޭވް އަތުން ފުރަތަމަ ދެސެޓު ކާމިޔާބު ކުރި ނަމަވެސް އޭނާ ވަނީ ބަލިވެފައެވެ. އަދި ރޯލަންޑް ގެރޯސް ނުވަވަނަ ފްރެންޗް އޯޕަންގައި އޭނާ ބަލިވީ ފައިނަލްގައި ސްޕެއިންގެ ކާލޯސް އަލްކަރާޒް އަތުންނެވެ.
މިއީ އޭނާ ވާދަކުރާ ގްރޭން ސްލޭމްގެ 36 ވަނަ މުބާރާތެވެ. އަދި އޮސްޓްރޭލިއަން އޯޕަންގައި ވާދަކުރާ 10 ވަނަ ފަހަރެވެ. މިފަހަރު މިމުބާރާތް އޭނާއަށް ކާމިޔާބު ކުރެވިއްޖެނަމަ އޭނާ ވާނީ، ސްޓޭން ވަވްރިންކާ އާއެކު، ގްރޭން ސްލޭމް މުބާރާތެއް ކާމިޔާބު ކުރުމަށް ދެވަނައަށް އެންމެ ގިނަ ދުވަހު މަސައްކަތް ކޮށްގެން ކާމިޔާބުވި ކުޅުންތެރިޔަކަށެވެ.
މިމުބާރާތުގެ ދެވަނަ ބުރުން ޖަޕާންގެ ކެއި ނިޝިކޯރީވެސް ވަނީ ޖާގަހޯދައިފައެވެ. ހަތަރު އަހަރުގެ މެދު ކެނޑުމަކަށްފަހު މިމުބާރާތުގައި ވާދަކުރަމުންދާ ނިޝިކޯރީ ދެވަނަ ބުރުން ޖާގަހޯދީ ބްރެޒިލްގެ ތިއާގޯ މޮންޓެއިރޯ އާ ބައްދަލުކުރި މެޗު ތިން ސެޓު ދެ ސެޓުން ކާމިޔާބު ކޮށްގެންނެވެ. މިމެޗުގެ ފުރަތަމަ ދެސެޓު ހަތަރެއް ހައެއް އަދި ދެވަނަ ދެސެޓު ޓައިބްރޭކަކަށް ގޮސް ހަތަރެއް ހަތަކުން ކާމިޔާބު ކޮށްފައިވަނީ މޮންޓެއިރޯއެވެ. ނަމަވެސް ނިޝިކޯރީ ވަނީ ހިތްވަރު އެލުވާނުލާ މަސައްކަތްކޮށް ޖެހިގެން އައި ތިން ސެޓު ކާމިޔާބުކޮށް މިމެޗު ކާމިޔާބު ކޮށްފައެވެ. އެއީ ހަތެއް ފަހެއް، ހައެއް ދެއެއް އަދި ހައެއް ތިނަކުންނެވެ.
މީގެއިތުރުން ހަވަނައަށް ސީޑު ކުރެވިފައިވާ ނޯވޭގެ ކެސްޕާ ރޫޑްވެސް ވަނީ ފުރަތަމަ ބުރުގެ މެޗު ކާމިޔާބު ކޮށްފައެވެ. އެއީ ސްޕެއިންގެ ހައުމޭ މުނާރު އާ ބައްދަލުކުރި މެޗު ތިން ސެޓު ދެ ސެޓުން ކާމިޔާބު ކޮށްގެންނެވެ. އުމުރުން 26 އަހަރުގެ ރޫޑް މިމެޗު ކާމިޔާބު ކުރި ހައެއް ތިނެއް، އެކެއް ހައެއް، ހަތެއް ފަހެއް، ދެއެއް ހައެއް އަދި ހައެއް އެކަކުންނެވެ.