5،000 ހައުސިން ޔުނިޓުގެ އަމަލީ މަސައްކަތް ފަށައި، އެއް އަހަރުތެރޭ 1،000 ޔުނިޓު ނިންމަނީ

ފަހި ދިރިއުޅުން ކޯޕަރޭޝަން (އެފްޑީސީ)ން މާލެ ސަރަހައްދުގައި ތަރައްގީކުރާ 13،000 ހައުސިން ޔުނިޓުގެ ތެރެއިން ފުރަތަމަ 5،000 ޔުނިޓުގެ އަމަލީ މަސައްކަތް ކުރިއަށް އޮތް ތިން މަސްތެރޭ ފަށާނެ ކަމަށާއި، އަމާޒަކީ އޭގެ ތެރެއިން 1،000 ޔުނިޓުގެ މަސައްކަތް އެއް އަހަރުތެރޭ އެއްކޮށް ނިންމާލުން ކަމަށް އެ ކުންފުނީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވެއްޖެއެވެ.

ސަން އޮންލައިންގެ 'އެޑިޓަރުގެ ސުވާލު' ޕްރޮގްރާމްގައި ވާހަކަދައްކަވަމުން ހަމްދާން ވިދާޅުވީ، 13،000 ހައުސިން ޔުނިޓުގެ މަސައްކަތަކީ 100 ޕަސެންޓް 'ކޮންޓްރެކްޓާ ފައިނޭންސް' ޕްރޮޖެކްޓެއް ކަމަށެވެ. އަދި ގައުމު މިއަދު އޮތް ހާލަތަށް ބެލުމަށް ފަހު ދައުލަތަށް އެއްވެސް ބުރައެއް ނެތި އެ މަޝްރޫއުގެ ކަންކަން ފެށޭނެ ގޮތަަކަށް ކަންކަން ބައްޓަން ކުރަމުންދާ ކަމަށް ވެސް ހަމްދާން ވިދާޅުވިއެވެ.

އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ސަން އޮންލައިންގެ 'އެޑިޓަރުގެ ސުވާލު' ޕްރޮގްރާމްގައި ވާހަކަދައްކަވަނީ -- ސަން ފޮޓޯ

ހަމްދާން ވިދާޅުވީ އެ 13,000 ޔުނިޓުގެ އަމަލީ މަސައްކަތް ކުރިއަށް އޮތް ތިން މަސްތެރޭ އެ ކުންފުނިން ފަށާނެ ކަމަށެވެ. އެގޮތުން އެންމެ ފުރަތަމަ ފަށާނީ މިހާރު ޓާމް ޝީޓް ލިބިފައި އޮތް 5،000 ޔުނިޓުގެ އަމަލީ މަސައްކަތް ކަމަށް ހަމްދާން ވިދާޅުވިއެވެ.

...އިރާދަކުރެއްވިއްޔާ މިދެންނެވިހެން [5،000 ޔުނިޓުގެ] އަމަލީ މަސައްކަތް ފަށާތާ އެއް އަހަރު ދުވަސްތެރޭގައި ޓާގެޓަކީ ކޮންމެވެސް ވަރަކަށް މިދެންނެވިހެން ހާހެއްހައި ޔުނިޓު ނިންމާލައި، ހަވާލުކުރުން. ހަވާލުކޮށްފަ އެއަށްފަހު، ބާކީ ޔުނިޓްތައް ކުރިއަށް ގެންގޮސް ތިން އަހަރު ދުވަސްތެރޭ 5،000 ޔުނިޓު ނިންމާލުން، އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް

ހުޅުމާލޭގައި މިހާރުވެސް އިމާރާތްކުރާ ގިނަ ހައުސިން މަޝްރޫއުތަކުގައި ބިމުގެ ދަތިކަން ވަރަށް ބޮޑަށް އެބައޮތްކަން ފާހަގަކުރައްވާ ހަމްދާން ވިދާޅުވީ ގިނަފަހަރަށް ޕާކުކޮށްލާނެ ތަނެއް ނޯންނަ ކަމަށެވެ. އެ ތަނެއްގެ ވަށައިގެން ކާރުތަކާއި ސައިކަލުތައް ޕާކުކޮށްފައި ހުންނަކަން އޭނާ ފާހަގަކުރެއްވިއެވެ.

އެހެންކަމުން އެ 13،000 ހައުސިން ޔުނިޓު ތަރައްގީކުރާއިރު އެކަންކަމަށް ވިސްނައި، ޕާކިން އޭރިއާއާ އެކީ އިމާރާތްކުރާނެ ކަމަށް އޭނާ ވިދާޅުވިއެވެ.

މާލެ ސަރަހައްދުގައި އެފްޑީސީން ތަރައްގީކުރާ 13،000 ހައުސިން ޔުނިޓު އެޅުމަށް ބޭރުގެ ތިން ކުންފުންޏަކާ އެއްކޮށް ފްރޭމް ވޯކް އެއްބަސްވުންތަކެއްގައި މިހާރު އޮތީ ސޮއިކޮށްފައެވެ.

އެގޮތުން އެ މަޝްރޫއު ތިން ބަޔަކަށް ބަހާލާފައިވާއިރު، އޭގެތެރެއިން 5،000 ޔުނިޓު އަޅަން ފްރޭމްވޯކް އެއްބަސްވުމުގައި ސޮއިކޮށްފައިވަނީ ތުރުކީގެ ކުންފުންޏަކާއެވެ. އަދި 3،000 ޔުނިޓު އަޅަން ފްރޭމްވޯކް އެއްބަސްވުމުގައި ސްރީލަންކާގެ ކުންފުންޏަކާ އެއްކޮށް ސޮއިކޮށްފައިވާއިރު، ބާކީ 5،000 ޔުނިޓު އަޅަން ފްރޭމްވޯކް އެއްބަސްވުމެއް ހެދީ ޗައިނާ ކުންފުންޏަކާ އެއްކޮށެވެ.

މިހާރު ކުރިއަށްދަނީ އެ މަޝްރޫއަށް ބޭނުންވާ ފައިނޭންސް ހަމަޖެއްސުމުގެ މަސައްކަތެވެ.

ބޯހިޔާވަހިކަމުގެ މައްސަލައަށް ދާއިމީ ހައްލެއް ގެނައުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ.