އިނގިރޭސި އެފް އޭ ކަޕްގެ ހަތަރު ވަނަ ބުރުން ޗެލްސީ ޖާގަހޯދައިފިއެވެ.
މިމުބާރާތުގެ ހަތަރު ވަނަ ބުރުން ޗެލްސީ ޖާގަހޯދީ ތިންވަނަ ބުރުގައި މޯކަމްބޭ އާއި ބައްދަލުކުރި މެޗު ފަސް ލަނޑު ސުން ލަނޑުން ކާމިޔާބު ކޮށްގެންނެވެ. ޗެލްސީގެ ދަނޑުގައި ކުޅުނު މިމެޗުގެ ފުރަތަމަ ހާފުގައި މޯކަމްބޭވަނީ ހިތްވަރު ގަދަ ކުޅުމެއް ދައްކާފައެވެ. މިހާފުގައި ޗެލްސީއަށް ލިބިގެންދިޔަ ޕެނަލްޓީއެއްވަނީ ކްރިސްޓޮފާ އެންކުންކޫ ޖެހުމުން މޯކަންބޭގެ ކީޕާ ހެރީ ބާގޮއިން ދިފާއުކޮށްފައެވެ.
މިމެޗުގައި ޗެލްސީގެ ފުރަތަމަ ލަނޑު އެޓީމަށް ކާމިޔާބު ކުރެވުނީ މެޗުގެ 39ވަނަ މިނެޓުގައެވެ. މިލަނޑު އެޓީމަށް ކާމިޔާބު ކޮށްދިނީ ޓޮސިން އަޑަރަބިއޯޔޯއެވެ. މިމެޗުގެ ފުރަތަމަ ހާފުގައި އިތުރު ލަނޑެއް ފެނިގެން ނުދިޔައިރު މިމެޗުގައި ޗެލްސީއިން ކާމިޔާބުކުރި ދެވަނަ ލަނޑު މެޗުގެ 50 ވަނަ މިނެޓުގައި އެޓީމަށް ކާމިޔާބު ކޮށްދިނީ އެންކުންކޫއެވެ.
ޗެލްސީގެ ތިންވަނަ ލަނޑު މެޗުގެ 70 ވަނަ މިނެޓުގައި ކާމިޔާބު ކޮށްދިނީ ފުރަތަމަ ލަނޑުވެސް ކާމިޔާބު ކޮށްދިން އަޑަރަބިއޯޔޯއެވެ. އަދި ޗެލްސީގެ ފަހު ދެ ލަނޑު މެޗުގެ 75 ވަނަ މިނެޓައި 77 ވަނަ މިނެޓުގައި ކާމިޔާބު ކޮށްދިނީ ޖާއޮ ފީލިކްސްއެވެ.
މިމުބާރާތުގެ ތިންވަނަ ބުރުގައި ބްރައިޓަން އެންޑް ހޯވް އެލްބިއަން އާއި ނޯވިޗް ސިޓީ ބައްދަލުކުރި މެޗު ރަށުން ބޭރުގައި ހަތަރު ލަނޑު ސުން ލަނޑުން ކާމިޔާބު ކޮށްފައިވަނީ ބްރައިޓަން އެވެ. މިމެޗުގައި ބްރައިޓަންގެ ހަތަރު ލަނޑު އެޓީމަށް ކާމިޔާބު ކޮށްދިނީ ޖިއޯޖީނިއޯ ރުޓާ ދެ ލަނޑު، ހޫލިއޯ އެންސީސޯ އާއި ސޮލީ މާޗް އިން ކުރެ ކޮންމެ ކުޅުންތެރިއެއް އެއް ލަނޑެވެ.
މިކާމިޔާބީއާއެކު ބްރައިޓަން ވެސް މިވަނީ މިމުބާރާތުގެ ހަތަރު ވަނަ ބުރުން ޖާގަހޯދައިފައެވެ. މީގެއިތުރުން ނޮޓިންހަމް ފޮރެސްޓް ވެސް ވަނީ މިމުބާރާތުގެ ހަތަރު ވަނަ ބުރުން ޖާގަހޯދައިފައެވެ. ފޮރެސްޓް ހަތަރުވަނަ ބުރުން ޖާގަހޯދީ ތިންވަނަ ބުުރުގައި ލޫޓަން ޓައުން އާއި ބައްދަލުކުރި މެޗު ދެ ލަނޑު ސުން ލަނޑުން ކާމިޔާބު ކޮށްގެންނެވެ. މިމެޗުގައި ފޮރެސްޓްގެ ދެ ލަނޑު އެޓީމަށް ކާމިޔާބު ކޮށްދިނީ ރަޔަން ޔޭޓްސް އާއި ރާމޮން ސޯސާއެވެ.