ރިޕަބްލިކް އޮފް އެސްޓޯނިއާގެ ރައީސް، ޑރ. އަލަރް ކާރިސްގެ ދައުވަތުފުޅަކަށް، ރައީސް ޑރ. މުޙައްމަދު މުއިއްޒު އެ ގައުމަށް ރަސްމީ ދަތުރުފުޅެއްގައި ހޯމަ ދުވަހު ފުރައިވަޑައިގަންނަވާ ގޮތަށް ހަމަޖެހިއްްޖެއެެވެ.
ރައީސް އޮފީހުން ބުނީ މިއީ ހޯމަ ދުވަހުން ފެށިގެން މި މަހުގެ 16ވާ ބުރާސްފަތި ދުވަހުގެ ނިޔަލަށް ރައީސް ކުރައްވާ ތިން ދުވަހުގެ ދަތުރުފުޅެއް ކަމަށެވެ.
މިއީ ރާއްޖޭގެ ރައީސަކު އެސްޓޯނިއާއަށް ރަސްމީ ދަތުރުފުޅެއްގައި ވަޑައިގަންނަވާ ފުރަތަމަ ފަހަރުކަން ފާހަަގަކޮށް އެ އޮފީހުން ބުނީ މި ދަތުރުގެ މައިގަނޑު މަގްސަދަކަށް ވާނީ ދެ ގައުމުގެ ދެމެދު އެއްބާރުލުން އިތުރުކުރުމަށް މަޝްވަރާކުރުމާއި، އެކުގައި މަސައްކަތްކުރުމަށް ހުރި ފުރުސަތުތަކާ ގުޅޭގޮތުން މަޝްވަރާކުރުން ކަމަށެވެ.
މަޝްްވަރާކުރުންތައް ކުރިއަށްދާނީ ދެ ގައުމުގެ ގުޅުން ބަދަހިކުރުމާއި، ޑިޖިޓަލް ދާއިރާއާއި، ސައިބާ އަދި އީ ގަވަނަންސާއި، މޫސުމާއި ތިމާވެއްޓާ ގުޅުންހުރި މައްސަލަތަކާ ގުޅޭ ދާއިރާތަކުން ކަމަށް ރައީސް އޮފީހުން ބުންޏެވެ. މީގެ އިތުރުން ސައިންސާއި ތައުލީމުގެ ދާއިރާއިން ވެސް ދެ ގައުމު އެކުގައި މަސައްކަތްކުރެވޭނެ ފުރުސަތުތަކާމެދު މަޝްވަރާކުރަން ހަމަޖެހިފައިވާ ކަމަށް ވެސް ވަނީ ބުނެފައެވެ.
އެސްޓޯނިއާގެ ޕާލިމަންޓް "ރީގިކޮގޫ" --
ރައީސް އޮފީހުން ބުނީ މި ދަތުރުފުޅުގައި، ރައީސް މުއިއްޒު އެސްޓޯނިއާގެ ރައީސް ޑރ. ކާރިސްއާއި، އެސްޓޯނިއާގެ ޕާލިމަންޓް "ރީގިކޮގޫ"ގެ ރައީސް ލައުރީ ހުސާރް އާއި، އެކި ވަޒީރުންނާ ބައްދަލުކުރައްވާނެ ކަމަށެވެ. އެގޮތުން ބައްދަލުކުރައްވާ ބައެއް ވަޒީރުންގެ ތެރޭގައި ހިމެނެނީ:
- މިނިސްޓާ އޮފް އެޑިއުކޭޝަން އެންޑް ރިސާޗް، ކްރިސްޓީނާ ކަލާސް
- މިނިސްޓާ އޮފް ކްލައިމެޓް، ޔޯކޯ އެލެންޑާ
- މިނިސްޓާ އޮފް ހެލްތު، ރީނާ ސިކުޓް
- މިނިސްޓާ އޮފް ޖަސްޓިސް އެންޑް ޑިޖިޓަލް އެފެއާޒް، ލީސާ ލީ ޕަކޮސްތާ
- ފޮރިން އެފާޒްގެ ސެކްރެޓަރީ ޖެނެރަލް، ޖޮނަތަން ވްސެވިއޮވް
މި ދަތުރުފުޅުގައި އެސްޓޯނިއާގެ ދެވަނައަށް އެންމެ ބޮޑު ސިޓީކަމަށްވާ ޓަރްޓުއަށް ވެސް ރައީސް ޒިޔާރާތްކުރައްވާނެއެވެ. އަދި އެ ސިޓީގައި ހުންނަ ޔުނިވާސިޓީ އޮފް ޓަރްޓުއަށް ޒިޔާރާތްކުރައްވައި، އެ ޔުނިވާސިޓީގެ ރިސާޗް އެންޑް ޑިވެލޮޕްމަންޓްސް އެންޑް އެސްޓޯނިއަން ޖިނޯމް ޑޭޓާބޭސް ސެންޓަރަށް ޒިޔާރާތްކުރައްވާނެއެެވެ. މީގެ އިތުރުން އެ ޔުނިވާސިޓީގެ ގްރީނާޖީ ޑޭޓާ ސެންޓަރަށް ވެސް ޒިޔާރާތްކުރައްވާނެއެވެ.
އެ ޔުނިވާސިޓީއަކީ ކްލިނިކަލް މެޑިސިންގެ ދާއިރާއިން ބައިނަލްއަގްވާމީ ގޮތުން އެންމެ ފާހަގަކޮށްލެވޭ، އެންމެ ފެންވަރު މަތީ، ސައިންޓިފިކް މުއައްސަސާތަކުގެ ގަދަ އެއް ޕަސެންޓް ތެރޭ ހިމެނޭ ޔުނިވާސިޓީއެކެވެ.
ޔުނިވާސިޓީ އޮފް ޓަރްޓު --
މީގެ އިތުރުން އެސްޓޯނިއާގެ ރައީސަށް ލަފާދޭ ޑިޖިޓަލް އެޑްވައިޒަރީ ކައުންސިލާއެކު އޮންނަ ވަށްމޭޒު މަޝްވަރާ ބައްދަލުވުމެއްގައި ވެސް ރައީސް ބައިވެރިވެވަޑައިގަންނަވާނެއެވެ.
ހުރިހާ ބައްދަލުވުންތަކުގައި ވެސް މައިގަނޑު ގޮތެއްގައި މަޝްވަރާކުރާނީ އައު އިޖާދުތަކާއި، ޓެކްނޮލޮޖީގެ ގޮތުން އެސްޓޯނިއާއިން ހޯދައިފައިވާ ކުރިއެރުންތަކާ ގުޅޭގޮތުންނެވެ.
އެސްޓޯނިއާއަކީ ޑިޖިޓަލް ދާއިރާއިން އިންގިލާބީ ކުރިއެރުންތަކެއް ހޯދައިފައިވާ ބައިނަލްއަގްވާމީ ގޮތުން ފާހަގަކޮށްލެވޭ ގައުމެކެވެ. އެގޮތުން އެ ގައުމަކީ ޑިޖިޓަލްކޮށް، އާންމު ޚިދުމަތްތައް ދިނުމާއި އެ ނޫން ކަންކަމުގައި ދުނިޔޭގެ އެއްވަނަ ދަރަޖައިގައި ގިންތިކުރެވޭ ގައުމެކެވެ. ފާހަގަކޮށްލެވޭ ބައެއް ކަންކަމުގެ ތެރޭގައި އެ ގައުމުގެ އީ-ރެސިޑެންސީ ޕްރޮގްރާމާއި، އެކި އީ-ގަވަނަންސް ޕްލެޓްފޯމްތައް ހިމެނެއެވެ.
ރައީސްގެ މި ދަތުރުފުޅުގައި ޓެކްނޮލޮޖީ ދާއިރާގެ ކަންތައްތަކަށް ވަރަށް ބޮޑު އަހަންމިއްޔަތުކަމެއް ދެއްވާއިރު، ޑިޖިޓަލް ޓްރާންސްފޮމޭޝަނަކީ ރައީސްގެ ތަރައްގީގެ ޕްލޭންގައި އެންމެ އިސްކަންދެއްވާ މުހިންމު އެއް އަމާޒެވެ. އެ މަނިކުފާނުގެ އަމާޒަކީ ޑިޖިޓަލް އިކޮނޮމީ ވަރުގަދަކޮށް 2030ވަނަ އަހަރާ ހަމައަށްދާއިރު، އެއިން ރާއްޖޭގެ ޖީޑީޕީއަށް 15 ޕަސެންޓު ހިއްސާކުރުމެވެ. އަަދި 2040ވަނަ އަހަރާ ހަމައަށް ދާއިރު ރާއްޖެއަކީ ތަރައްގީވެފައިވާ ގައުމަކަށް ހެދުމެވެ.