ވެނެޒުއޭލާގެ ރައީސްކަމަށް ތިންވަނަ ދައުރަކަށް އިންތިޚާބުވެވަޑައިގެންފައިވާ ނިކޮލަސް މަދޫރޯ ރައީސްކަމުގެ ހުވާ ކުރައްވައިފިއެވެ.
ހުވާ ކުރުމުގެ ރަސްމިއްޔާތު ބާއްވާފައިވަނީ އެގައުމުގެ ގާނޫނުހަދާ މަޖިލީހުގައި އިއްޔެއެވެ.
މިދިޔަ އަހަރު ޖުލައި 28ވަނަ ދުވަހު ބޭއްވި ވެނެޒުއޭލާގެ ރިޔާސީ އިންތިޚާބު މަދޫރޯ ކާމިޔާބު ކުރެއްވިކަން އިއުލާން ކުރީ، ސަރުކާރު ހިންގާ ސޯޝަލިސްޓް ޕާޓީގެ ހަރުކަށި ކޮންޓްރޯލްގެ ދަށުގައި އޮތް އިންތިޚާބީ އިދާރާތަކުންނެވެ.
ނަމަވެސް އިންތިޚާބު ކާމިޔާބު ކުރެއްވީ އިދިކޮޅު ޕާޓީތަކުން ކޯލިޝަނުން ވާދަކުރެއްވި ކެންޑިޑޭޓް އެޑްމަންޑޯ ގޮންޒާލޭޒް ކަމަށް އިދިކޮޅުން ވަނީ ބުނެފައެވެ. އެގޮތުން އިދިކޮޅަށް 67 އިންސައްތަ ވޯޓު ލިބިފައިވާ ކަމަށާއި މަދޫރޯއަށް ލިބިވަޑައިގަތީ އެންމެ 30 އިންސައްތަ ކަމަށް އެމީހުން ބުނެއެވެ.
ކާޓާ ސެންޓަރާއި ކޮލަމްބިއާގެ އިލެކްޓޯރަލް މިޝަން ފަދަ މިނިވަން އޮބްޒާވަރުންގެ އިތުރުން ސީއެންއެންގެ ދިރާސާއިން ވެސް ދައްކާގޮތުގައި އިދިކޮޅުން ބުނާ ހިސާބު ދިމާވެއެވެ. އެމެރިކާ ހިމެނޭ ގޮތަށް ބައެއް ގައުމުތަކުން ވަނީ ވެނެޒުއެލާގެ އިންތިޚާބީ ރައީސްއަކީ ގޮންޒާލޭޒް ކަމަށް ގަބޫލު ވެސް ކޮށްފައެވެ.
ހުކުރު ދުވަހުގެ މެންދުރު ފަހު ދެއްވި ތަގުރީރެއްގައި އިދިކޮޅު ލީޑަރު މާރިއާ ކޮރީނާ މަޗާޑޯ ވަނީ މަޑޫރޯގެ ސަރުކާރުން ވެނެޒުއެލާގެ ގާނޫނު އަސާސީއަށް ޚިލާފަށް ފިޔަވަޅު އަޅާ ކަމަށް ތުހުމަތު ކުރައްވާފައެވެ.
ވައިޓް ހައުސްގެ ނޭޝަނަލް ސެކިއުރިޓީ ކައުންސިލްގެ ތަރުޖަމާނު ޖޯން ކާބީ ވެސް ވަނީ މަދޫރޯ ހުވާ ކުރެއްވުމަކީ ޣައިރު ގާނޫނީ ކަމެއް ކަމަށް ސިފަކުރައްވާފައެވެ.
އެ އިންތިޚާބުގައި އިދިކޮޅަށް ކާމިޔާބު ލިބުނުނަމަ، ވެނުޒުއޭލާގައި އޮތް 25 އަހަރުގެ ސޯޝަލިސްޓް ވެރިކަން ނިމުމަކަށް އަންނާނެ ކަމަށް މަޝްރަހު ދިރާސާކުރާ ފަރާތްތަކުން ބުނެއެވެ.
މަދޫރޯ ރައީސްކަމުގެ ހުވާ ކުރެއްވިތާ މާ ގިނަ އިރުތަކެއް ނުވަނީސް އެމެރިކާއިން ވަނީ މަދޫރޯ އާއި އޭނާގެ އިސް އޮފިޝަލުން ހައްޔަރު ކުރުމަށް ބޭނުންވާ މައުލޫމާތު ދޭ މީހަކަށް ހުށަހަޅާފައިވާ އިނާމު 25 މިލިއަން ޑޮލަރަށް އިތުރުކޮށްފައެވެ.
މީގެ އިތުރުން އެމެރިކާއިން ވަނީ ޝަރުތު ހަމަވާ ވެނެޒުއެލާގެ ރައްޔިތުންނަށް ޓެމްޕަރަރީ ޕްރޮޓެކްޓެޑް ސްޓޭޓަސް ނުވަތަ އެމެރިކާގައި ތިބި ވެނެޒުއޭލާގެ ރައްޔިތުންނަށް އަނބުރާ ގައުމަށް ނުދެވޭ ގޮތަށް އޮތް މުއްދަތު އިތުރު 18 މަސް ދުވަހަށް އިތުރުކޮށްފައެވެ.
ވެނެޒުއެލާގެ އިގްތިސާދީ އަދި ސަލާމަތީ އިދާރާތައް ބަލަހައްޓާ، މަދޫރޯއާ ގުޅިފައިވާ އަށް އޮފިޝަލުންގެ މައްޗަށް ވަކިވަކިން ދަތިކުރުމުގެ ފިޔަވަޅުތައް ވެސް އެމެރިކާއިން އިއުލާނުކޮށްފައިވެއެވެ. އޭގެތެރޭގައި މަދޫރޯގެ ދަތުރުފަތުރާބެހޭ ވަޒީރު ވެސް ހިމެނެއެވެ.
މީގެ އިތުރުން އިނގިރޭސިވިލާތުން ވެސް ވަނީ މަދޫރޯއާ ގުޅުންއޮތް 15 މީހަކަށް ދަތިކުރުމުގެ ފިޔަވަޅު އަޅާފައެވެ.
ދެހާސް ތޭރަ ވަނަ އަހަރުން ފެށިގެން ވެނުޒެއޭލާގެ ވެރިކަން ކުރަމުން ގެންދަވާ މަދޫރޯ ސިޔާސީ މައިދާނަށް ނުކުމެވަޑައިގަތުމުގެ ކުރިން މަސައްކަތްކުރެއްވީ ބަސް ޑްރައިވަރެއްގެ ގޮތުގައެވެ.
އޭގެފަހުން އެ ގައުމުގެ ވިޔަފާރިވެރިންގެ ޖަމިއްޔާގެ ލީޑަރުކަން ކުރައްވައި، ސިޔާސީ މައިދާނަށް ނުކުންނެވީ 2000ވަނަ އަހަރެވެ. މަދޫރޯ ވަނީ އޭރުގެ ރައީސް ހޫގޯ ޗާވޭޒްގެ ވެރިކަމުގެ ސަރުކާރުގެ އިސް މަގާމުތަކެއް ފުރުއްވައިފައެވެ.
ދެހާސް ތޭރަ ވަނަ އަހަރު މަދޫރޯ ވެރިކަމަށް އަރައިވަޑައިގަތީ 50.62 އިންސައްތަ ވޯޓު ހޯއްދަވައިގެންނެވެ.
ނަވާރަސަތޭކަ ފަންސާހުގެ އަހަރުތަކުގައި ވަރަށް މުއްސަނދި ގައުމެއް ކަމަށްވާ ވެނެޒުއެލާ ވަނީ ފާއިތުވި އަހަރުތަކުގައި އިގްތިސާތީ ގޮތުން ވަރަށް ބޮޑަށް އިނދަޖެހި ފަގީރުވެފައެވެ. ހައިޕާއިންފްލޭޝަން ނުވަތަ އަތް ނުފޯރާ ފަށަށް ތަކެތީގެ އަގު އުފުލި، ފައިސާގެ އަގު ވެއްޓި އާންމުންގެ ދިރިއުޅަމަށް ވަރަށް ބޮޑަށް އަސަރުކޮށްފައިވާއިރު، އެ ގައުމުގެ ގާތްގަޑަކަށް ތިން ބައިކުޅަ އެއްބައި މީހުން ވަނީ ގައުމު ދޫކޮށްފަ ގޮސްފައެވެ.
މީގެ އިތުރުން ހުޅަނގުގެ ދަތިކުރުމުގެ ފިޔަވަޅުތަކުގެ ސަބަބުން އެގައުމުގެ ތެލުގެ ސިނާއަތަށް އިތުރު ގެއްލުންތަކެއް ވަނީ ލިބިފައެވެ.
އެކަމާ ގުޅިގެން މަޑޫރޯގެ މަގުބޫލުކަން ދަށްވެ، 2014ވަނަ އަހަރުން ފެށިގެން އަ ގައުމުގައި އަންނަނީ މުޒާހަރާތައް ކުރަމުންނެވެ.