އުފަންދުވަސް ފާހަގަ ކުރުމަށް މިދިޔަ ހޯމަ ދުވަހު ރާއްޖެއަށް ޒިޔާރަތް ކުރި އިންޑިއާގެ ކުރީގެ ބަތަލާ ބިޕާޝާގެ އާއިލާއިން ރާއްޖެއަށް އޮތް ލޯބި ހާމަކޮށްދިނުމުގެ ގޮތުން ރުކެއް އިންދައިފިއެވެ.
ބިޕާޝާގެ އިންސްޓަގްރާމްގައި ހިއްސާކުރި ވީޑިއޯއިން ފެންނަނީ ދެ އަހަރުގެ ދަރިފުޅު ދޭވީއާއެކު އެ މީހުން ޗުއްޓީ ހޭދަކުރަމުން އަންނަ ފުޝިފަރު ރިސޯޓުގައި ރުކެއް އިންދާ މަންޒަރެވެ.
މި ރުއް އިންދުމަށްފަހު އޭގެ ކައިރީގައި ބިޕާޝާގެ އާއިލާއިން ވަނީ އެ އާއިލާ ރަމްޒުކޮށްދޭ ލިޔުމެއް ފެންނަ ލަކުޑި ބޯޑެއް ވެސް ބަހައްޓާފައެވެ. ބިޕާޝާ ސަޕޯޓަރުންނާ ހިއްސާކުރި ވީޑިއޯގެ ކެޕްޝަންގައި ލިޔެފައި ވަނީ 'ޕްލާންޓިންގް ޖޯއި އެންޑް ހޯޕް ފޯ އޯލް އޮފް އަސް' މިހެންނެވެ.
މި އަހަރު 45 ވަނަ އުފަންދުވަސް ފާހަގަކުރަން ބިޕާޝާ ރާއްޖެއަށް ޒިޔާރަތްކޮށްފައިވާއިރު މިދިޔަ އަހަރު ވެސް ބަތަލާ ވަނީ އާއިލާއާ އެކު ދެ ފަހަރު ރާއްޖެ އައިސްފައެވެ.
ބިޕާޝާ އާއި ކަރަން ރާއްޖޭގައި--ފޮޓޯ/ވިޒިޓްމޯލްޑިވްސް
މިދިޔަ އަހަރުގެ ނޮވެމްބަރު މަހު ދަރިފުޅު ދޭވީއަށް ދެ އަހަރު ފުރުން ފާހަގަކުރަން ބިޕާޝާ ރާއްޖެ އައިއިރު އެކްޓަރު ކަރަން ސިންގްއާ ދެ މީހުންގެ ކައިވެނީގެ އެނިވާސަރީ ފާހަގަކޮށްފައި ވަނީ ވެސް ރާއްޖޭގެ ރިސޯޓެއްގައެވެ.
ބަތަލާ ޗުއްޓީ ހޭދަކުރަމުން އަންނަ ފުޝިފަރުގެ ތަޖުރިބާތައް ހިއްސާކުރި ވީޑިއޯއެއްގައި ބިޕާޝާ ބުނީ ކުރިއަށް އޮތްތަނުގައި ވެސް ޗުއްޓީ ޕްލޭން ކުރާއިރު ރާއްޖެ އައުމަށް އިސްކަންދޭނެ ކަމަށެވެ. އަލަތު ދަރިފުޅު ލިބުމާ ގުޅިގެން ބިޕާޝާ ހުރިހާ ވަގުތެއް ދަރިފުޅަށް ހުސްކޮށްފައިވާއިރު ބަތަލާ ފިލްމުތަކާ ދުރުގައި އުޅޭތާ މިހާރު އަހަރުތަކެއް ވަނީ ވެފައެވެ.
ބިޕާޝާގެ ފިރިމީހާ އަދި ޓެލެވިޒަން އެކްޓަރު ކަރަން ސިންގް ގްރޯވަރު މިހާރު ބޮޑަށް ފެންނަނީ ފިލްމުތަކުންނެވެ. ކަރަން އެންމެ ފަހުން ބެލުންތެރިންނަށް ފެނިގެންދިޔައީ މިދިޔަ އަހަރު ރިލީޒް ކުރި ޑައިރެކްޓަރު ސިދާތު އާނަންދުގެ ފިލްމު "ފައިޓާ"ގެ ރޯލަކުންނެވެ.