މޯލްޑިވްސް އެސޯސިއޭޝަން އޮފް ހިޔުމަން ރިސޯސް ޕްރޮފެޝަނަލްސް (މާޕް)އިން އިންތިޒާމުކޮށްގެން ބާއްވާ ފަސްވަނަ 'ނޭޝަނަލް އެޗްއާރް ކޮންވެންޝަން އަދި އެކްސްޕޯ 2025' ބޭއްވުމަށް ތައްޔާރުވެއްޖެއެވެ.
ކޮންވެންޝަން އޮންނާނީ ފެބްރުވަރީ 8، 2024 ވާ ހޮނިހިރު ދުވަހާއި ފެބްރުވަރީ 9، 2024 ވާ އާދީއްތަ ދުވަހެވެ.
މި އަހަރުގެ ކޮންވެންޝަންގެ ތީމަކީ "އާ ގޮތްތައް ހޯދައި، ހާލަތަށް ބަދަލުވެ، ކުރިއަށް ދިއުން: ބަދަލުވަމުންދާ ދުނިޔެއަކަށް ގާބިލުކަން ބިނާކުރުން" މިއެވެ. މި ތީމުން ފާހަގަކޮށްދެނީ އަދުގެ އަވަސް ބާރުމިނުގައި ބަދަލުވަމުންދާ ދުނިޔޭގެ މާހައުލުގައި ހަލުވިކަމާއި، އާ ގޮތްތައް ހޯދުމާއި، މުސްތަގުބަލަށް ތައްޔާރުވެފައިވާ ލީޑަޝިޕްގެ މުހިންމުކަމެވެ.
ސަބް-ތީމްތަކާއި މަޝްވަރާކުރެވޭނެ ދާއިރާތައް:
- ހަލުވިކަމާއި އާ ގޮތްތައް ހޯދުން.
- އިންސާނީ ގާބިލުކަމާއި ލީޑަޝިޕް ތަރައްގީކުރުން .
- އާޓިފިޝަލް އިންޓެލިޖެންސް މެދުވެރިކޮށް އެޗްއާރް އިންގިލާބީ ބަދަލަކަށް ގެނައުން.
- ދުޅަހެޔޮކަމާއި ހެޔޮ ދިރިއުޅުމެއް މެދުވެރިކޮށް މަސައްކަތުގެ ބާރުތައް އަލުން އެކުލަވާލުން.
ކޮންވެންޝަންގެ ތައްޔާރީތައް ވަރަށް ފުރިހަމަކަމާ އެކު ކުރިއަށްދާކަން ފާހަގަކޮށް މާޕްއިން ބުނީ، މި ކޮންވެންޝަނަކީ އަހަރުގެ އެންމެ ހަރަކާތްތެރި އެއް އިވެންޓަށް ވާނެކަމަށެވެ. މި އިވެންޓަށް ރެޖިސްޓާވުމުގެ ފުރުސަތު މިހާރު ހުޅުވާލާފައިވާ ކަމަށް ވެސް މާޕްއިން ބުންޏެވެ.
އަބަދު ވެސް ބަދަލުވަމުން މިދާ ދުނިޔޭގައި، އެއްބާރުލުން ދިނުމަކީ ވަރަށް މުހިންމު ކަމެއް. އަދި މާޕްގެ އެޗް.އާރް ކޮންވެންޝަނަކީ މި މުހިންމު މަޝްވަރާތަކާއި ތަފާތު ހިޔާލުތަކަށް އެންމެ އެކަށީގެންވާ މަންސައެއް، މާޕްގެ ރައީސް އަޙްމަދު އިބްރާހީމް
މާޕްއިން ބުނީ، މި އަހަރުގެ އިވެންޓުގައި 350 އަށްވުރެ ގިނަ ބައިވެރިން ބައިވެރިވާނެކަމަށް ލަފާކުރެވޭ ކަމަށެވެ.
މިދިޔަ އަހަރު މާޕްއިން ބޭއްވި ނޭޝަނަލް އެޗްއާރް ކޮންވެންޝަންގެ ތެރެއިން -- ފޮޓޯ/ މާޕް
މި ފަހަރުގެ ކޮންވެންޝަންގައި ބައިނަލްއަޤްވާމީ އަށް ކީނޯޓް ސްޕީކަރުންނާއި، ރާއްޖެއާއި ރާއްޖެއިން ބޭރުގެ ދާއިރާއާ ގުޅުންހުރި 16 މާހިރުންގެ ހުށަހެޅުން ހިމެނޭނެ ކަމަށް މާޕްއިން ބުންޏެވެ. މީގެ އިތުރުން، މި އަހަރު އަލަށް ތަޢާރަފުކުރާ ހަތަރު މާސްޓާ ކްލާސްތަކެއް ވެސް ހިމެނޭއިރު، މިއީ މިހާތަނަށް މާޕްގެ ފަރާތުން ބޭއްވޭ އެންމެ ބޮޑު އަދި އެންމެ ފުރިހަމަ ކޮންވެންޝަންކަމުގައި ވާނެ ކަމަށް ވެސް މާޕްއިން ބުންޏެވެ.
އިވެންޓުގައި ކީނޯޓު ސްޕީކަރުންގެ ގޮތުގައި ހަމަޖެހިފައިވާ ފަރާތްތައް:
- އެންޑްރޫ ބްރަޔަންޓް
- ރޮބިން ސްޕެކިއުލަންޑް
- ގްރާންޓް ބޮސްނިކް
- ރަވަން ހަސަން
މީގެ އިތުރުން، ރާއްޖޭގެ ތަޖުރިބާކާރު މާހިރުން ވެސް ބައިވެރިވެވަޑައިގަންނަވާނެ ކަމަށް މާޕްއިން މައުލޫމާތުދެއެވެ.
ދެހާސް ނަވާރަވަނަ އަހަރު ފެށުނީއްސުރެ، މާޕްގެ އެޗްއާރް ކޮންވެންޝަން ވެފައި ވަނީ ދިވެހިރާއްޖޭގައި އެޗްއާރް ޕްރޮފެޝަނަލުންނާއި ދާއިރާއާ ގުޅުންހުރި ލީޑަރުންނާއި އިސްވެރިންގެ އެންމެ ބޮޑު އެއްވުމަށެވެ. އަދި މިހާތަނަށް މާޕްގެ ފަރާތުން ބާއްވާފައިވާ ހަތަރު އިވެންޓުގައި 1،650 އަށްވުރެ ގިނަ ބައިވެރިން ވަނީ ބައިވެރިވެފައެވެ.
ދެހާސް އަށާރަވަނަ އަހަރު އުފެދުނު މާޕް އަކީ ދިވެހިރާއްޖޭގައި އިންސާނީ ވަސީލަތްތައް ތަރައްގީކޮށް، އެ ދާއިރާގައި ފާހަގަކޮށްލެވޭ ކުރިއެރުންތަކެއް ހޯދުމަށް މަސައްކަތްކުރާ ޖަމިއްޔާއެކެވެ. އަހަރީ އެޗްއާރް ކޮންވެންޝަންގެ އިތުރުން މާޕްއިން ގިނަ އަދަދެއްގެ މުހިންމު ހަރަކާތްތަކެއް ވަނީ ހިންގާފައެވެ. މީގެ ތެރޭގައި ފާއިތުވި އަހަރު ބޭއްވުނު ހަތަރުވަނަ އެޗްއާރް ކޮންވެންޝަނާއި، ފަސްވަނަ ލާނިން އެންޑް ޑިވެލޮޕްމަންޓް (އެލް އެންޑް ޑީ) ކޮންފަރެންސް ހިމެނެއެވެ.