އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕާއި އޭނާގެ ޕާޓީގެ ގިނަ މެންބަރުން ޓިކްޓޮކް މައްސަލައިގައި ދެބަސްވެއްޖެއެވެ.
މިހާރު ސުޕްރީމް ކޯޓުގައި ބަހުސްކުރެވޭ މި މައްސަލައިގައި ޓްރަމްޕް ވަނީ ޓިކްޓޮކް ބަންދުނުކުރަމް އެދިފައެވެ. ނަމަވެސް، ގިނަ ރިޕަބްލިކަނުން ބޭނުންވަނީ އެ އެޕް ބަންދުކުރުމަށެވެ.
މި މައްސަލައަކީ ވާހަކަދެއްކުމުގެ މިނިވަންކަމާއި ޤައުމީ ސަލާމަތާ ދެމެދު އޮތް ހަނގުރާމައެއް ކަމަށް ސައިބާ ސެކިއުރިޓީ މާހިރު ޓިމޮތީ އެޑްގާ ވިދާޅުވިއެވެ. އެމެރިކާގެ އާބާދީގެ ދެބައިކުޅަ އެއްބައި މީހުން ބޭނުންކުރާ މި އެޕް ބަންދުކުރުމުން ވާހަކަދެއްކުމުގެ މިނިވަންކަމަށް ބޮޑު އަސަރެއް ކުރާނެކަމަށް އޭނާ ވިދާޅުވިއެވެ.
ޗައިނާއިން އެމެރިކާގެ ޑޭޓާއަށް އެކްސެސް ލިބިދާނެކަމުގެ ބިރުން ކޮންގްރެސްއިން ފާސްކޮށް، ރައީސް ބައިޑަން ސޮއިކުރެއްވި ޤާނޫނަކުން ޓިކްޓޮކްގެ ޗައިނާގެ މައި ކުންފުނި ބައިޓްޑާންސްއަށް ވަނީ 19 ޖެނުއަރީގެ ކުރިން އެޕް ވިއްކާލުމަށް ނުވަތަ ބަންދުކުރުމަށް އަންގާފައެވެ.
މި މައްސަލައިގައި ސުޕްރީމް ކޯޓުން ނިންމާ ނިންމުމަކީ އެމެރިކާގެ ޚިޔާލު ފާޅުކުރުމުގެ މިނިވަންކަމަށް ވަރަށް މުހިންމު ނިންމުމަކަށް ވާނެއެވެ.
މި މައްސަލަ ސުޕްރީމް ކޯޓަށް ހުށަހެޅިފައިވަނީ ދުނިޔޭގެ އެންމެ ބޮޑު ދެ އިޤުތިޞާދުގެ ދެމެދުގައި ވިޔަފާރީގެ ގުޅުން ގޯސްވަމުންދާ ދަނޑިވަޅެއްގައެވެ. އަދި، ޓްރަމްޕްގެ ދެވަނަ ދައުރު ފެށުމުގެ 10 ދުވަސް ކުރިންނެވެ.
އެމެރިކާގެ ޖަސްޓިސް ޑިޕާޓްމަންޓުން ބުނާ ގޮތުގައި ޓިކްޓޮކްއަކީ އެމެރިކާގެ ޤައުމީ ސަލާމަތަށް ނުރައްކަލެކެވެ. އެއީ، އެމެރިކާގެ ރައްޔިތުންގެ ޒާތީ މަޢުލޫމާތު އެޕަށް ލިބޭތީއެވެ. ނަމަވެސް، ޓިކްޓޮކްއިން ބުނަނީ މި ޤާނޫނަކީ ވާހަކަދެއްކުމުގެ މިނިވަންކަމާ ޚިލާފު ޤާނޫނެއް ކަމަށެވެ.
ޓްރަމްޕް ވަނީ ޓިކްޓޮކަށް ކުރިމަގު އޮތް ކަމަށާއި އެޕް "ސަލާމަތްކުރާނެ" ކަމަށް ވިދާޅުވެފައެވެ.
އެ މަނިކުފާނުގެ ވަކީލު ޖޯން ސޯއާ ވަނީ ޓްރަމްޕް މި ވަގުތު ޓިކްޓޮކް ބަންދުކުރުމާ ދެކޮޅު ކަމަށާއި، ރައީސްކަމަށް ވަޑައިިގަތުމަށް ފަހު ސިޔާސީ ގޮތުން މައްސަލަ ހައްލުކުރަން ބޭނުންވާ ކަމަށް ސުޕްރީމް ކޯޓަށް ހުށަހެޅި ލިޔުމެއްގައި ބުނެފައެވެ.