އަލް ހިޖްރަ ޢުމްރާ ގްރޫޕުގެ ހަވާލުގައި އުމްރާއަށް ދިޔަ ދިވެހީންތަކަކަށް ރާއްޖެ ނާދެވި ސައުދީ އަރަބިއްޔާގައި ތާށިވެއްޖެއެެވެ.
"ސަން"އަށް މައުލޫމާތު ލިބޭ ގޮތުގައި ރާއްޖެ ނާދެވި، ސައުދީގައި ތާށިވެފައި ތިބީ އެ ގްރޫޕަށް ފައިސާ ދައްކައިގެން އުމްރާއަށް ދިޔަ 24 މީހެކެވެ. އޭގެ ތެރޭގައި ކުޑަކުދީން ވެސް ހިމެނެއެވެ.
މައުލޫމާތު ލިބޭ ގޮތުގައި އެ ގްރޫޕުގެ ހަވާލުގައި އުމްރާއަށް ދިޔަ މީހުން ރާއްޖެއިން ފުރުމުގެ އިންތިޒާމުތައް ވެސް ހަމަޖައްސައިފައި ހުރީ ވަރަށް ދަތި ގޮތަކަށެވެ.
އެގޮތުން 24 މީހުންގެ އެ ގްރޫޕު މައްކާއަށް ގެންދިޔައީ ވެސް ތިންބައި ކޮށް، ތިން ފްލައިޓެއްގައި ކަމަށާއި، ހުރުމުގެ އިންތިޒާމުތަކެއް ވެސް ހަމަޖެހިފައި ނެތް ކަމަށް މައުލޫމާތު ދިނެވެ. އެގޮތުން ދަތުރުގެ ތެރެއިން އެއް ރެއަކު، ހޮޓަލުން ވެސް ނިކުންނަށް ޖެހުނު ކަމަށް ވަނީ ބުނެފައެވެ.
މީގެ އިތުރުން އިންޑިއާގެ، ހައިދަރުއާބާދަށް ޓްރާންސިޓްކޮށްގެން ދިޔަ މީހުން ވެސް 23 ގަޑިއިރަށްވުރެ ގިނައިރު އެ ތަނުގައި ތިބެންޖެހުނުއިރު، ހޮޓަލެއްގައި ހުރުމުގެ އިންތިޒާމާއި، ކެއިންބުއިން ވެސް ހަމަނުޖައްސާކަމަށް މައުލޫމާތު ދީފައިވެއެވެ.
މިހާރު އުމްރާގެ އަޅުކަން ނިމިފައިވާއިރު، ދަތުރުގައި ދިޔަ އެންމެން ވެސް ތިބީ ރާއްޖެ ނާދެވިފައެވެ. އަދި މިހާތަނަށް އެއްވެސް މީހަކަށް ރިޓާން ޓިކެޓު ވެސް ހަމަނުޖެހޭކަމަށް އުމްރާވެރިންނާ ހަވާލާދީ، މައުލޫމާތު ހިއްސާކުރި ފަރާތުން ބުންޏެވެ.
"ޗުއްޓީ ހަމަވެ، އޮފީސްތަކަށް ނިކުންނަންޖެހޭ މީހުންނަށް އޮފީސްތަކަށް ނުދެވި، ސްކޫލުތައް ހުޅުވި ސްކޫލް ކުދިންނަށް ސްކޫލަށް ނުދެވި މި ތަނުގައި ތާށިވެފައި އެ މީހުން ތިބީ،"
އުމްރާގެ އަޅުކަމަށްފަހު ފުރަތަމަ އެ އެންމެން ވެސް ރާއްޖެ އަންނަން އޮތީ މި މަހު ފަހެއްގައެވެ. ނަމަވެސް އެ ތާރީޚު މި މަހުގެ ނުވަވަނަ ދުވަހަށް ލަސްކޮށް، އަދިވެސް ރާއްޖެ އާދެވޭނެ ދުވަހެއް ނޭނގޭކަމަށް އެ މީހުންނާ ހަވާލާދީ މައުލޫމާތު ދިން ފަރާތުން ބުންޏެވެ.
މި ކަމާ ގުޅިގެން އެ ޖަމާއަތުގެ ބަހެއް ހޯދަން މަސައްކަތްކުރި ނަމަވެސް، ފޯނަށް ޖަވާބު ނުދޭތީ، ލިބޭ ގޮތެއް ނުވެއެވެ.
މި ކަމާ ގުޅިގެން އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވިދާޅުވީ، އެ މައްސަލަ ސަމާލުކަމަށް އައިސްފައިވާ ކަމަށާއި، ވަރަށް ގާތުން އެ ކަން ބައްލަވަމުން ގެންދަވާ ކަމަށެވެ.
ކުދިކުދި އުމްރާ ގްރޫޕުތަކުން މީހުން ސައުދީއަށް ގެންގޮސް، ހާލުގައި ޖެހިގެން މީގެ ކުރިން ވެސް މައްސަލަތައް ފެންމަތިވެފައި އެބަހުއްޓެވެ.
އަދި އުމްރާއަށް ގެންދިއުމުގެ ނަމުގައި ފައިސާ ހޯދުމަށްފަހު ބޮޑެތި ސްކޭމްތައް ވެސް ހިންގައިފައި އެބަހުއްޓެވެ.