ރާއްޖޭގެ ފަތުރުވެރިކަމުގެ މަންޒިލެއް ކަމަށްވާ ވާވު ޝިޕްރެކް ބަންޑުން ޖަހާލައި، ބޮޑެތި ގެއްލުންތަކެއް ލިބިއްޖެއެވެ.
ކެޔޮދޫގެ ގެސްޓްހައުސެއް ކަމަށްވާ 'ހެވަނަ މޯލްޑިވްސް'އިން ސޯޝަލް މީޑިއާގައި ހިއްސާކުރި ވީޑިއޯއަކުން ފެންނަ ގޮތުގައި ޝިޕްރެކް އޮތީ އެއްކޮށް ބަންޑުން ޖަހާލައިފައެވެ. އަދި ފެނުން މައްޗަށް ފެންނަން އޮތީ ވަރަށް ކުޑަކުޑަ ބައެކެވެ.
"ސަން" އާ ވާހަކަދައްކަވަމުން ވާވު އަތޮޅު ކައުންސިލްގެ ރައީސް ޝުޖާއު އަލީ ވިދާޅުވީ ރާއްޖެއަށް މިފަހުން ކުރި ވިއްސާރައިގައި ވާވު އަތޮޅުގައި އެންމެ މަޝްހޫރު އެއް ތަން ކަމަށްވާ ޝިޕްރެކް ބަންޑުން ޖަހާލާފައިވާ ކަމަށެވެ. އަދި ބޮޑެތި ގެއްލުންތަކެއް ލިބިފައިވާ ކަމަށް ޝުޖާއު ވިދާޅުވިއެވެ.
އެހެންނަމަވެސް އަދިވެސް އެ މަންޒިލް ސަލާމަތްކުރެވޭނެ ކަމުގެ އުންމީދު އެބައޮތް ކަމަށް ޝުޖާއު ވިދާޅުވިއެވެ.
އަދި އެ މަސައްކަތް ވާވު އަތޮޅު ކައުންސިލުން އެހެނިހެން ފަރާތްތަކާ ގުޅިގެން ކުރަމުން އަންނަ ކަމަށް ވެސް ޝުޖާއު މައުލޫމާތު ދެއްވިއެވެ.
ފަތުރުވެރިންނާއި އާންމުންގެ މެދުގައި ވެސް މަގުބޫލު ވާވުގެ ޝިޕްރެކް އޮންނަނީ ވ. ކެޔޮދޫ ބޭރުގައެއެވެ. މީގެ 10 ވަރަކަށް އަހަރު ކުރިން އެންމެ ފުރަތަމަ މި ބޯޓު ފެނުނީ ފެލިދޫގެ ދެ މަސްވެރިއަކަށެވެ. އޭރު އެ ބޯޓު ސަލާމަތްކުރަން އުޅުނު ނަމަވެސް އޮޔާގެންދިޔުމަށް ފަހު ބޯޓު ކަނޑުވީ މިހާރު އޮތް ސަރަހައްދަށެވެ.
ކައިރި ރިސޯޓުތަކުންނާއި މާލެއިން ވެސް ދުވާލަކު އެތައް ބަޔަކު ޝިޕްރެކަށް ޒިޔާރާތްކުރެއެވެ. މިއީ ރާއްޖޭގެ ފަތުރުވެރިކަމަށް މުހިންމު މަންޒިލެކެވެ.