މެޓާއިން ފެކްޓް-ޗެކިން ޕްރޮގްރާމް ނިންމާލައި، އެކްސް އާ އެއްގޮތަށް 'ކޮމިއުނިޓީ ނޯޓްސް' ތަޢާރަފްކުރަން ނިންމައިފިއެވެ.
މެޓާގެ ސީއީއޯ މާކް ޒަކަބާގް އަންގާރަ ދުވަހު އިޢުލާނުކުރި ގޮތުގައި، ކުންފުނީގެ މޮޑަރޭޝަން ސިޔާސަތުތަކަށް ބޮޑެތި ބަދަލުތަކެއް ގެންނަން ވަނީ ނިންމައިފައެވެ.
މިގޮތަށް ނިންމީ ސިޔާސީ އަދި އިޖްތިމާޢީ މައިދާނުގައި އަންނަމުންދާ ބަދަލުތަކަށް ރިޢާޔަތްކޮށް، އަދި ޚިޔާލު ފާޅުކުރުމުގެ މިނިވަންކަމަށް އިތުރު ބާރުދިނުމުގެ ގޮތުން ކަމަށް އޭނާ ވިދާޅުވިއެވެ.
ޒަކަބާގް ވިދާޅުވި ގޮތުގައި، މެޓާއިން އިތުބާރުހުރި ޕާޓްނަރުންނާއެކު ކުރިއަށްގެންދާ ފެކްޓް-ޗެކިން ޕްރޮގްރާމް ނިމުމަކަށް ގެނެސް، އޭގެ ބަދަލުގައި އެކްސްގެ ކޮމިއުނިޓީ ނޯޓްސް އާ އެއްފަދަ ނިޒާމެއް ތަޢާރަފްކުރާނެއެވެ.
ބިލިއަނަކަށްވުރެ ގިނަ ޔޫޒަރުން ތިބި ފޭސްބުކް އަދި އިންސްޓަގްރާމްގެ އިތުރުން ތްރެޑްސްއަށް ވެސް މި ބަދަލުތައް ގެނެވޭނެކަމަށް އޭނާ ވިދާޅުވިއެވެ.
"އަޅުގަނޑުމެން އަނބުރާ އަޅުގަނޑުމެންގެ އަސްލަށް ދާނަން. އަދި ކުށްތައް މަދުކުރުމަށާއި، އަޅުގަނޑުމެންގެ ސިޔާސަތުތައް ފަސޭހަކުރުމަށާއި، އަޅުގަނޑުމެންގެ ޕްލެޓްފޯމްތަކުގައި ޚިޔާލުފާޅުކުރުމުގެ މިނިވަންކަން އަނބުރާ ގެނައުމަށް އިސްކަންދޭނަން،" ޒަކަބާގް ވީޑިއޯއެއްގައި ވިދާޅުވިއެވެ.
ޒަކަބާގް އިތުރަށް ވިދާޅުވީ މެޓާ ޕްލެޓްފޯމްތަކުގައި ގިނަ ކަންކަން ރަނގަޅު ކުރުމަށް އިތުރު ފިޔަވަޅުތައް އަޅާނެކަމަށެވެ. އެގޮތުން ފެކްޓް ޗެކަރުން ނައްތާލުމަކީ މިއީ މިބާވަތުގެ ފުރަތަމަ ކަންތައް ކަމަށް އޭނާ ވިދާޅުވިއެވެ.
ފޭސްބުކްގެ ފެކްޓް ޗެކިން ފީޗާއަކީ ޕްލެޓްފޯމްގައި ހިއްސާކުރެވޭ މަޢުލޫމާތުގެ ސައްޙަކަން ޔަގީންކުރުމަށް ބޭނުންކުރެވޭ މުހިންމު ވަސީލަތެކެވެ. މިއީ ގޯސް މަޢުލޫމާތު ފެތުރުން ހުއްޓުވުމަށް ފޭސްބުކުން އަޅާފައިވާ ފިޔަވަޅުތަކުގެ ތެރެއިން އެއް ފިޔަވަޅެވެ.
މި ފީޗާ މެދުވެރިކޮށް ޕޯސްޓެއްގައި ހިމެނޭ މަޢުލޫމާތަކީ ގޯސް ނުވަތަ އޮޅުވާލުމުގެ ގޮތުން ހިއްސާކުރެވޭ މަޢުލޫމާތެއްތޯ މިނިވަން ފެކްޓް ޗެކަރުން ބަލައި ޗެކްކުރެއެވެ. މިގޮތަށް ޗެކްކުރުމަށްފަހު، މަޢުލޫމާތު ގޯސްކަމަށް ފާހަގަކުރެވިއްޖެނަމަ އެ ޕޯސްޓެއްގައި ވޯނިން ލޭބަލެއް ޖަހައި، ޔޫޒަރުންނަށް އިތުރު މަޢުލޫމާތު ހޯދުމަށް ގުޅޭ ލިންކްތަކާއި ރިސޯސްތައް ފޯރުކޮށްދެއެވެ.
މި ނިޒާމުގެ މައިގަނޑު މަޤްޞަދަކީ ފޭސްބުކް ބޭނުންކުރާ ފަރާތްތަކަށް ކަށަވަރު މަޢުލޫމާތު ލިބިދިނުމާއި، އޮޅުވާލުމުގެ ގޮތުން ހިއްސާކުރެވޭ މަޢުލޫމާތު ފެތުރުން މަދުކުރުމެވެ.
މި ފީޗާގެ ބަދަލުގައި މެޓާއިން އަލަށް ތަޢާރަފްކުރާ ކޮމިޔުނިޓީ ނޯޓްސްއަކީ ޕޯސްޓްތަކުގައި އާންމު ބޭނުންކުރާ ފަރާތްތަކަށް އިތުރު މަޢުލޫމާތު އެޑްކުރެވޭ ފީޗާއެކެވެ.
މި ފީޗާ މެދުވެރިކޮށް ޕޯސްޓެއްގައިވާ މަޢުލޫމާތަކީ އޮޅުވާލުމުގެ ގޮތުން ނުވަތަ ދޮގު މަޢުލޫމާތެއްތޯ ޔޫޒަރުންނަށް ފާހަގަކުރެވޭނެއެވެ. އަދި ޕޯސްޓްގައިވާ މަޢުލޫމާތާ ގުޅޭގޮތުން އިތުރު ހެކި ހުށަހެޅުމުގެ ފުރުސަތު ލިބިގެންދާނެއެވެ.
މި މަޢުލޫމާތު ގިނަ ބަޔަކު ވޯޓު ދީ، ރަނގަޅުކަމަށް ބެލެވޭނަމަ އެ ޕޯސްޓެއްގައި ކޮމިޔުނިޓީ ނޯޓެއްގެ ގޮތުގައި ފެންނަން ހުންނާނެއެވެ.
މިއީ އެކްސް ޕްލެޓްފޯމްގައި ހިއްސާކުރެވޭ މަޢުލޫމާތުގެ ސައްޙަކަން ކަށަވަރުކޮށް، ގޯސް މަޢުލޫމާތު ފެތުރުން ހުއްޓުވުމަށް ދާދިފަހަކުން އަޅާފައިވާ ފިޔަވަޅެކެވެ.