ޕްރެޝަރު ބޮޑުވެ، ކެނެޑާގެ ބޮޑުވަޒީރު އިސްތިއުފާ ދެއްވައިފި

އަމިއްލަފުޅު ޕާޓީގެ ޕްރެޝަރު ބޮޑުވެ، ކެނެޑާގެ ބޮޑުވަޒީރު ޖަސްޓިން ޓްރޫޑޯ މަގާމުން އިސްތިއުފާ ދެއްވައިފިއެވެ.

ނަމަވެސް، އަމިއްލަފުޅު ލިބަރަލް ޕާޓީން ބޮޑު ވަޒީރަކު އައްޔަން ކުރަންދެން އޮފީހުގައި މަޑުކުރައްވާނެ ކަމަށާއި މާޗު 24 ވަނަ ދުވަހުގެ ނިޔަލަށް ގާނޫނު ހަދާ މަޖިލީސް ސަސްޕެންޑުކުރާނެ ކަމަށް ވެސް ޓްރޫޑޯ ވިދާޅުވިއެވެ.

"މި ގައުމަށް ކުރިއަށް އޮތް އިންތިޚާބުގައި މި ގައުމަށް ރަނގަޅު ލީޑަރަކު ބޭނުންވޭ، އެތެރޭގެ ހަނގުރާމަތައް ކުރަން ޖެހިއްޖެ ނަމަ އެ އިންތިޚާބުގައި އެންމެ ރަނގަޅު ކެންޑިޑޭޓަށް ނުވެވޭނެކަން އަޅުގަނޑަށް ސާފުވެއްޖެ،" ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ޓްރޫޑޯ ވިދާޅުވިއެވެ.

މި އަހަރުގެ ފަހުކޮޅު ބާއްވާ ފެޑެރަލް އިންތިޚާބަށް ކެނެޑާއިން ތައްޔާރުވަމުންދާއިރު، ކެނެޑާގެ ރައްޔިތުންގެ މެދުގައި ޓްރޫޑޯއަށް އޮތް މަގުބޫލުކަން ދަށްވުމަކީ އެ ޕާޓީއަށް ކާމިޔާބު ލިބުމަށް އޮތް ހުރަހެއް ކަމަށް ބީބީސީން ރިޕޯޓުކޮށްފައިވެއެވެ.

ލިބަރަލް ޕާޓީގެ ރައީސް ސަޗިތު މެހެރާ ވިދާޅުވީ، ޕާޓީގެ އާ ލީޑަރަކު ހޮވުމުގެ މަސައްކަތް ފެށުމަށް ޕާޓީގެ ޑިރެކްޓަރުންގެ ބޯޑުގެ ބައްދަލުވުމެއް މި ހަފުތާގައި ބާއްވާނެ ކަމަށެވެ.

"އަޅުގަނޑުމެންގެ ޕާޓީއަށާއި ގައުމަށް 10 އަހަރަށް ވުރެ ގިނަ ދުވަހު ޚިދުމަތްކޮށްދެއްވި ދެއްވި ޖަސްޓިން ޓްރޫޑޯއަށް މުޅި ގައުމުގެ އިންތިހާއަށް ޝުކުރުވެރިވަން،" އެ ކަމާ ގުޅިގެން ނެރުއްވި ބަޔާނެއްގައި ސަޗިޗު މެހެރާ ވިދާޅުވިއެވެ.

އުމުރުން 53 އަހަރުގެ ޓްރޫޑޯއަށް އަމިއްލަފުޅުގެ ޕާޓީގެ ތެރެއިން އިސްތިއުފާ ދެއްވުމަށް ޕްރެޝަރު ބޮޑުވެފައިވަނިކޮށް، އެ ވާހަކަތައް ބޮޑަށް ދެކެވެން ފެށީ ޑިސެމްބަރު މަހު ބޮޑުވަޒީރުގެ ނައިބު ކްރިސްޓިއާ ފްރީލެންޑް ކުއްލިއަކަށް އިސްތިއުފާދެއްވުމާ ގުޅިގެންނެވެ. އެ ކަމަނާ ވަނީ އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ކެނެޑާގެ މުދަލުން ޓެރިފް ނަގާނެ ކަމަށް ވިދާޅުވި ވިދާޅުވުން ޓްރޫޑޯ ސީރިއަސްކޮށް ނުނަންގަވާ ކަމަށް ތުހުމަތުކުރައްވާފައެވެ.

ޓްރަޕްމްގެ އެ ނިންމެވުމުން ކުރިމަތިވެފައިވާ ބޮޑު ގޮންޖެހުމަށް ހައްލެއް ހޯދުމަށް އެކަށީގެންވާ މަސައްކަތްތަކެއް ޓްރޫޑޯ ނުކުރައްވާ ކަމަށް އިސްތިއުފާ ދެއްވިކަން އިއުލާނުކުރައްވައި އާންމުކުރެއްވި ސިޓީފުޅުގައި ފްރީލެންޑް ލިޔުއްވާފައިވެއެވެ.

ޓްރަމްޕް ވަނީ ކެނެޑާގެ އިމްޕޯޓް މުދަލުން 25 އިންސައްތަ ޓެކްސް ނެގުމަށް ވައުދުވެވަޑައިގެންފައެވެ. އެއީ، ކެނެޑާގެ އިގުތިސާދަށް ވަރަށް ބޮޑަށް ގެއްލުންވާނެ ކަމެއް ކަމަށް އިގުތިސާދީ މާހިރުން ވިދާޅުވެއެވެ. އޭގެ ފަހުން ކެނެޑާއިން ވަނީ އެ ގައުމުގެ އެމެރިކާގެ ބޯޑަރުގައި ސަލާމަތީ ގޮތުން ފުޅާ އާ ފިޔަވަޅުތަކެއް އަޅާނެކަން އިއުލާނުކޮށްފައެވެ.

ޓްރޫޑޯގެ ވެރިކަމުގައި ލިބަރަލް ޕާޓީން ކުދި ބައެއް ޕާޓީތަކުގެ ތާއީދާ އެކު މައިނޯރިޓީ ޕާޓީއެއްގެ ގޮތުގައި ވެރިކަން ކުރި ނަމަވެސް ބޮޑުވަޒީރު ވަނީ އިންފްލޭޝަން މަތިވުމާއި ބޯހިޔާވަހިކަމުގެ އަގުތަކާ ދެކޮޅަށް މަސައްކަތް ކުރަމުން ކޯލިޝަން އެކުގައި ބެލެހެއްޓުމަށް ވެސް މަސައްކަތް ކުރައްވާފައެވެ.

ފްރީލެންޑް އިސްތިއުފާ ދެއްވުމާ ގުޅިގެން ޓްރޫޑޯއަށް ކުރިން ލިބަރަލް ޕާޓީ ވެރިކަމުގައި ދެމިތިބުމަށް އެހީތެރިވި ޕާޓީތަކުގެ ތާއީދު ގެއްލުނެވެ. ޓްރޫޑޯ އިސްތިއުފާ ދެއްވުމުން އޮކްޓޯބަރު މަހުގެ 20 ވަނަ ދުވަހުގެ ކުރިން ބާއްވަން ޖެހޭ ކުރިއަށްއޮތް އިންތިޚާބަށް ޕާޓީ ލިބަރަލް ޕާޓީން މިހާރު އާ ލީޑަރަކު ހޮވާނެއެވެ.

ޓްރޫޑޯގެ ނިމުން

ޓްރޫޑޯއަކީ 1970 އާއި 80 ގެ އަހަރުތަކުގައި އެ ގައުމުގެ ސިޔާސީ މަސްރަހުގައި ވެރިކަން ކުރެއްވި ކެނެޑާގެ ބޮޑުވަޒީރު ޕިއެރޭ ޓްރޫޑޯގެ ދަރިކަލުންނެވެ.

ޓްރޫޑޯ ބޮޑުވަޒީރު ކަމަށް ވެވަޑައިގަތީ 2015 ވަނަ އަހަރު ބޭއްވި އިންތިޚާބުގައި ލިބަރަލް ޕާޓީއަށް ބޮޑު އަޣުލަބިއްޔަތެއް ލިބުމުންނެވެ. އެ މަނިކުފާނަކީ ކެނެޑާގެ 23 ވަނަ ބޮޑުވަޒީރެވެ.

އެ މަނިކުފާނު ވެރިކަމަށް ވަޑައިގަތުމަށް ގިނަ ވައުދުތަކެއް ވެވަޑައިގަތެވެ. އޭގެ ތެރޭގައި ކެނެޑާގެ ކެބިނެޓްގެ 50 އިންސައްތައަކީ އަންހެނުން ކަމަށް ހެދުމާއި، ކެނެޑާ އަސްލު ދަރިކޮޅުގެ މީހުންނާ ސުލްހަ ގާއިމުކުރުން އަދި ގައުމީ ކާބަން ޓެކްސް ތައާރަފުކުރުން ހިމެނެއެވެ.

ނަމަވެސް، ފާއިތުވި އަހަރުތަކުގައި ޓްރޫޑޯގެ ސަރުކާރަށް ފާޑުކިޔުން އަމާޒުވެފައިވަނީ ކޮރަޕްޝަންގެ ދައުވާ އުފުލާފައިވާ ކެނެޑާގެ ކުންފުންޏަކާ އެކު ހެދި އެއްބަސްވުމަކާ ގުޅިގެންނެވެ.

ކުރިން 2019 ވަނަ އަހަރު ލިބަރަލް ޕާޓީގެ މެޖޯރިޓީ ގެއްލި، އޭގެ ފަހުން ވެރިކަން ކުރަމުން އައީ މައިނޯރިޓީ ޕާޓީއެއްގެ ގޮތުގައެވެ.

ކޮވިޑް 19 ގެ ދުވަސްވަރު ސަރުކާރުން އެޅި ފިޔަވަޅުތަކުގެ ސަބަބުން ފާޑުކިޔުން އިތުރުވެ، 2022 ވަނަ އަހަރުގެ ކުރީކޮޅު ފްރީޑަމް ކޮންވޯއީގެ މުޒާހަރާތައް ސަރުކާރާ ދެކޮޅަށް ފެށިއެވެ. އެއާ އެކު ޓްރޫޑޯ ވަނީ ބާރުގެ ބޭނުންކޮށްގެން މުޒާހަރާތައް ރޫޅާލާފައެވެ.

ކޮވިޑްގެ ބަލިމަޑުކަމުން އަރައިގަނެގެން އައި ދުވަސްވަރު، ބޯހިޔާވަހިކަމާއި ކާބޯތަކެތީގެ އަގުތައް އުފުލި، އާންމު ޚިދުމަތްތައް ހޯދުމަށް ވެސް ދަތިވިއެވެ.

އެހެންވެ، ކެނެޑާގައި ޓްރޫޑޯގެ މަގުބޫލުކަން ވަރަށް ބޮޑަށް ދަށްވިއެވެ. އެ ދުވަސްވަރު ނެގި ޕޯލަކުން ދައްކާ ގޮތުގައި ޓްރޫޑޯގެ މަސައްކަތްތައް ރަނގަޅު ކަމަށް ފާހަގަކޮށްފައިވަނީ އެންމެ 22 އިންސައްތަ މީހުންނެވެ.